ສຳເລັດ 25 ໂຄງການ ສ້ອມແປງສຸກເສີນຊົນລະປະທານຫຼັງນ້ຳຖ້ວມ

    ການເລັ່ງແກ້ໄຂສຸກເສີນສຳລັບການສ້ອມແປງລະບົບຊົນລະປະທານຫຼັງນ້ຳຖ້ວມໃນປີ 2018 ຜ່ານມາ, ເປັນບັນຫາໜຶ່ງທີ່ສຳຄັນ ແລະ ມີຄວາມຈຳເປັນ ຫຼາຍ, ໂດຍຜ່ານມາລັດຖະບານໄດ້ຈັດສັນງົບເຂົ້າແກ້ໄຂແລ້ວ ແລະໜ່ວຍງານທີ່ຮັບຜິດຊອບກໍໄດ້ເອົາໃຈໃສ່, ພ້ອມທັງ ມີ 25 ໂຄງການສຳເລັດ ແລະຈຳນວນ ໜຶ່ງພວມສືບຕໍ່ຢູ່.

    ຈາກຂໍ້ມູນຂອງກະຊວງກະສິກຳ ແລະ ປ່າໄມ້ໃຫ້ຮູ້ຫຼ້າສຸດວ່າ: ສະເພາະວຽກຊົນລະປະທານເປັນວຽກໜຶ່ງທີ່ມີຄວາມສຳຄັນຫຼາຍທີ່ຈະເຮັດໃຫ້ແຜນການປູກເຂົ້າ ແລະພືດໃນຊ່ວງລະດູແລ້ງເພື່ອທົດແທນການຜະລິດຂອງລະດູຝົນຜ່ານມາທີ່ໄດ້ຮັບຄວາມເສຍຫາຍແລ້ວນັ້ນບັນລຸຕາມແຜນການ, ດັ່ງນັ້ນລັດຖະບານຈຶ່ງໄດ້ແບ່ງງົບປະມານຈຳນວນໜຶ່ງເຂົ້າໃສ່ວຽກດັ່ງກ່າວ, ໂດຍຫຼ້າສຸດເຫັນວ່າໜ່ວຍງານທີ່ກ່ຽວຂ້ອງໄດ້ສືບຕໍ່ຊີ້ນຳຂະແໜງຊົນລະປະທານແຂວງ, ນະຄອນ ຫຼວງວຽງຈັນ ຕິດຕາມສັງລວມຂໍ້ມູນໂຄງການລະອຽດທີ່ສະໜອງນ້ຳໃຫ້ແກ່ການຜະລິດລະດູ ແລ້ງສົກປີ 2018-2019 ໃນຂອບເຂດທົ່ວປະເທດໃນເນື້ອທີ່ທັງໝົດ 1,65 ແສນເຮັກຕາ, ໃນນັ້ນສະໜອງນ້ຳໃຫ້ເນື້ອທີ່ປູກເຂົ້ານາແຊງ 1 ແສນເຮັກຕາ, ພືດ 65 ພັນເຮັກຕາ ໃນຈຳນວນ 7,8 ພັນ ໂຄງການ, ພ້ອ ມກັນນັ້ນຍັງໄດ້ລົງຕິດຕາມກວດກາເຕັກນິກໂຄງການແກ້ໄຂສຸກເສີນສ້ອມແປງລະບົບຊົນລະປະທານຫຼັງນ້ຳຖ້ວມປີ 2018, ຊຶ່ງບັນດາໂຄງການທີ່ຈັດຕັ້ງປະ ຕິບັດສຳເລັດມີ 25 ໂຄງການ ແລະກວດກາໂຄງການຟື້ນຟູ ປ່ຽນຖ່າຍຈັກສູບນ້ຳ 6 ໂຄງການ, ໂດຍ ເປັນທຶນກູ້ຢືມຈາກລັດຖະບານອິນເດຍເພື່ອປະຕິບັດ ຢູ່ໃນ 3 ເມືອງຄື: ເມືອງຫາດຊາຍຟອງ, ນາຊາຍທອງ ແລະໄຊທານີ ນະຄອນຫຼວງວຽງຈັນ, ຊຶ່ງມາຮອດປະຈຸບັນປະຕິບັດໄດ້ 93%.

  ຄຽງຄູ່ກັນນັ້ນ ຍັງໄດ້ຕິດຕາມສ້ອມ ແປງຈັກສູບນ້ຳ ແລະລວງຄອງເໝືອງ ຢູ່ໃນ 5 ເມືອງ (ສີໂຄດຕະບອງ, ໄຊທາ ນີ, ປາກງື່ມ, ນາຊາຍທອງ ແລະຫາດ ຊາຍຟອງ) ນະຄອນຫຼວງວຽງຈັນ ຈໍານວນ 25 ໂຄງການ, ສຳລັບບ້ວງງົບປະມານ ແກ້ໄຂສຸກເສີນສ້ອມແປງລະບົບຊົນລະ ປະທານ ຫຼັງນ້ຳຖ້ວມປີ 2018 ມູນຄ່າ 3 ຕື້ກີບ, ປະຈຸບັນປະຕິບັດໄດ້ 2,3 ຕື້ກີບ ເທົ່າກັບ 91% ຂອງມູນຄ່າທັງໝົດ.

ສ່ວນວຽກການປູກເຂົ້າ, ປູກພືດ ແລະການຜະລິດເປັນສິນຄ້າ ແມ່ນຍັງ ສືບຕໍ່ຈັດຕັ້ງປະຕິບັດຢູ່, ພ້ອມທັງເຫັນວ່າ ຫຼາຍໜ້າວຽກຄືບໜ້າຢ່າງຕໍ່ເນື່ອງ ໂດຍ ສະເພາະການປັກດຳເຂົ້ານາແຊງຂອບ ເຂດທົ່ວປະເທດ ດຽວນີ້ສຳເລັດແລ້ວ 84 ພັນກວ່າເຮັກຕາ ເທົ່າກັບ 84% ຂອງ ແຜນການທັງໝົດ, ນອກນັ້ນ ປະຊາຊົນຈຳ ນວນໜຶ່ງຍັງຫັນມາປູກພືດລົ້ມລຸກແທນ ທີ່ເຫັນວ່າລາຍຮັບສູງກວ່າ.

แชร์