ອພສ ແຂວງບໍ່ແກ້ວ ຫາລືກຽມເປີດກອງປະຊຸມໃຫຍ່ຜູ້ແທນພະສົງ

  ກອງປະຊຸມຄົ້ນຄວ້າປຶກສາຫາລືຜ່ານຮ່າງບົດລາຍງານການເມືອງທັງສອງພາກ, ເພື່ອກະກຽມຄວາມພ້ອມໃນການເປີດກອງປະຊຸມຄົບຄະນະບໍລິຫານງານປະຈໍາການ ແລະຄະນະກຳມະການບໍລິຫານງານ ອພສ ແຂວງບໍ່ແກ້ວ, ໄດ້ຈັດຂຶ້ນໃນວັນທີ 7 ສິງຫາ ຜ່ານມາ,ທີ່ຫ້ອງປະຊຸມໂຮງຮຽນມັດທະຍົມສຶກສາສົມບູນສົງແຂວງ (ວັດຈອມເຂົາມະນີຣັດ) ໂດຍການເປັນປະທານຂອງພະຫຼັກຄຳຣັດຕະນະມະນີໂຊຕິກາຈານ (ອາດຍາທັມມະຫາຄໍາເງິນຄໍາວົງ) ເຈົ້າຄະນະແຂວງ, ມີບັນດາເຈົ້າຮອງເຈົ້າຄະນະແຂວງ, ເຈົ້າຄະນະເມືອງ-ຮອງເຈົ້າຄະນະເມືອງ 5 ເມືອງ ແລະຮອງຫົວໜ້າຫ້ອງການບໍລິຫານງານເຂົ້າຮ່ວມ.

  ພະປີຣຊາສາສະນະໂສພົນມຸນິ (ປທ ໄຊຍະພອນ ສິປັນຍາ) ຮອງເຈົ້າຄະນະແຂວງ, ໄດ້ລາຍງານແຜນວຽກບັນດາເນື້ອໃນ, ຄະນະຮັບຜິດຊອບ, ອະນຸກໍາມະການກອງປະຊຸມເພື່ອກະກຽມຄວາມພ້ອມໃນການຈັດກອງປະຊຸມໃຫຍ່ຜູ້ແທນພະສົງທົ່ວແຂວງຄັ້ງທີ VII, ເພື່ອນໍາມາຄົ້ນຄວ້າພິຈາລະນາຮ່າງບົດລາຍງານທັງສອງພາກ ແລະທິດທາງແຜນການ, ເບິ່ງຄວາມພ້ອມຂອງການຈັດກອງປະຊຸມໃຫ້ມີເນື້ອໃນຄົບຖ້ວນ; ການຈັດຕັ້ງຄະນະຮັບຜິດຊອບກອງປະຊຸມ ແລະອະນຸກຳມະການ; ຄົ້ນຄວ້າງົບປະມານຈັດຊື້ພາຫະນະປະເພດລົດໃຫຍ່ຈໍານວນ 1 ຄັນ ຂອງຫ້ອງການກຳມາທິການສຶກສາສົງແຂວງ ແລະດ້ານວຽກງານອື່ນໆ, ບັນດາຜູ້ເຂົ້າຮ່ວມໄດ້ປະກອບຄໍາເຫັນເປັນເອກະພາບກັນຕໍ່ບົດສະຫຼຸບລາຍງານການເມືອງສອງພາກ ແລະ ທິດທາງແຜນການ 5 ປີຕໍ່ໜ້າຕີລາຄາດ້ານດີ-ດ້ານອ່ອນຂໍ້ສະດວກ ແລະບາງບົດຮຽນທີ່ຖອດຖອນໄດ້ຕໍ່ກັບການຈັດຕັ້ງປະຕິບັດລະບົບແບບແຜນວິທີການເຮັດວຽກຂອງຄະນະ ອພສ ແຂວງໃນໄລຍະຜ່ານມາ.

ໂອກາດດັ່ງກ່າວ, ເຈົ້າຄະນະແຂວງໄດ້ມີຄຳເຫັນຊີ້ນໍາໃຫ້ເອົາໃຈໃສ່ເພີ່ມທະວີຄວາມສາມັກຄີເຂົ້າເປັນກ້ອນກຳລັງແຮງມະຫາສານສືບຕໍ່ເສີມຂະຫຍາຍມູນເຊື້ອອັນສະຫງ່າລາສີຂອງອົງການພຸດທະສາສະໜາສໍາພັນລາວແຂວງ,ເປັນເຈົ້າການຈັດຕັ້ງປະຕິບັດແບບແຜນການບໍລິຫານ-ວິຊາການຕົວຈິງໃຫ້ແທດເໝາະ ແລະສອດຄ່ອງກັບຄວາມຮຽກຮ້ອງຕ້ອງການເພື່ອກະກຽມຄວາມພ້ອມໃນການເປີດກອງປະຊຸມໃຫຍ່ຄັ້ງນີ້ໃຫ້ມີຜົນສໍາເລັດຮັບປະກັນຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮ້ອຍໄປດ້ວຍດີ.

____________

ໜັງສືພິມເສດຖະກິດ-ສັງຄົມ

แชร์