ສໍາຜັດທະເລໝອກໃນຍາມຝົນ ປ່າສະຫງວນພູຖະແຫຼງ

 ລະດູຝົນ ເປັນລະດູການທີ່ເໝາະແກ່ການໄປທ່ອງທ່ຽວຊຶ່ງໃນຄໍລໍາທ່ອງທຽວສະບັບນີ້ຈະມາແນະນໍາບາງສະຖານທີ່ທ່ອງທ່ຽວພາຍໃນປະເທດທີ່ເໝາະແກ່ການໄປສຳຜັດໃນໄລຍະລະດູຝົນນີ້ເພາະຫຼາຍຄົນກໍ່ອາດບໍ່ເຄີຍໄປສຳຜັດຫຼືບໍ່ເຄີຍຮູ້ວ່າສະຖານທີ່ທ່ອງທ່ຽວໃນລາວກໍ່ມີດີຫຼາຍແຫ່ງ ແລະອາກາດກໍ່ດີອີກດ້ວຍເນື່ອງຈາກຕົ້ນໄມ້ຊີວະນາໆພັນກຳລັງຂຽວສະອຸ່ມໃນການອີ່ມນໍ້າຈາກລະດູຝົນດັ່ງນັ້ນ,ທຳມະຊາດແມ່ນກຳລັງງົດງາມປະສົມກັບໝອກໃນຍາມເຊົ້າເຮັດໃຫ້ຫຼາຍແຫ່ງເກີດມີທະເລໝອກທີ່ງົດງາມ.

  ປ່າສະຫງວນພູຖະແຫຼງເປັນສະຖານທີ່ທ່ອງທ່ຽວທາງທຳມະຊາດທີ່ອ້ອມຮອບດ້ວຍພູຜາປ່າໄມ້ທີ່ສະຫຼັບສັບຊ້ອນມີຄວາມງົດງາມຢູ່ໃນຕົວເຖິງວ່າໄລຍະທາງຈະໄກແດ່ແຕ່ເມື່ອທ່ານໄດ້ໄປຮອດໄປເຖິງແລ້ວຮັບຮອງວ່າຈະບໍ່ຜິດຫວັງແນ່ນອນ ແລະເປັນເຂດທີ່ອຸດົມສົມບູນໄປດ້ວຍທຳມະຊາດ, ສັດນໍ້າ, ສັດບົກ ແລະພືດພັນນາໆຊະນິດ, ອີກທັງຍັງເປັນຈຸດຊົມວີວທີ່ສວຍງາມຂອງພູຜາປ່າໄມ້ ແລະ ໜ່ວຍພູສະຫຼັບສັບຊ້ອນເປັນໜ້າສະອອນເມື່ອໄດ້ສຳພັດ, ສະຖານທີ່ໆວ່າຕັ້ງຢູ່ເມືອງບຸນເໜືອແຂວງຜົ້ງສາລີ ແຂວງເໜືອສຸດຂອງປະເທດລາວຊຶ່ງມີໄລຍະທາງຫ່າງຈາກເທສະບານແຂວງລົງໄປທາງທິດໃຕ້ປະມານ 30 ກິໂລແມັດ.

 ສະຖານທີ່ທ່ອງທ່ຽວທີ່ນໍາສະເໜີມານັ້ນເປັນພຽງສ່ວນໜຶ່ງຂອງແຫຼ່ງທ່ອງທ່ຽວທີ່ໜ້າສົນໃຈໃນລະດູຝົນ ແລະເຊື່ອວ່າຫຼາຍຄົນຍັງບໍ່ເຄີຍໄປສຳຜັດຈຶ່ງຝາກໃຫ້ທ່ານພິຈາ ລະນາເພື່ອລະບຸໄວ້ໃນເປົ້າໝາຍປາຍທາງການພັກຜ່ອນຂອງທ່ານ.

___________

ຂ່າວ: ວົງມະນີ. ຮູບພາບ: ໜັງສືພິມເສດຖະກິດ-ສັງຄົມ

 

แชร์