ງົບປະມານແຫ່ງລັດ 6 ເດືອນຕົ້ນປີເກັບລາຍຮັບໄດ້ 41,52% ຂອງແຜນດັດແກ້

  ເນື່ອງຈາກເສດຖະກິດທັງພາຍໃນ ແລະພາຍນອກມີການຜັນແປບວກກັບການແຜ່ລະບາດຂອງພະຍາດໂຄວິດ-19, ສົ່ງຜົນກະທົບຕໍ່ການຈັດເກັບລາຍຮັບເຂົ້າງົບປະ ມານປີ 2020 ຊຶ່ງຄາດວ່າໝົດປີຈະບໍ່ບັນລຸຕາມແຜນການປະມານ 6.322 ຕື້ກີບ, ໂດຍໃນ 6 ເດືອນຕົ້ນປີປະຕິບັດໄດ້ພຽງແຕ່ 9.463 ຕື້ກີບ ເທົ່າກັບ 41,52% ຂອງແຜນດັດແກ້, ແຕ່ຖ້າທຽບໃສ່ແຜນເບື້ອງຕົ້ນປະຕິບັດໄດ້ 32,54%.

 ອີງຕາມການລາຍງານຂອງທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດກະຊວງການເງິນຕໍ່ກອງປະຊຸມວິຊາການຮ່ວມກັບບັນດາກະຊວງ, ອົງການຂັ້ນສູນ ກາງກ່ຽວກັບສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ, ທິດທາງແຜນ 6 ເດືອນທ້າຍ ປີ 2020 ແລະ ແນະນຳການສ້າງແຜນງົບປະມານແຫ່ງລັດປີ 2021 ໃຫ້ຮູ້ວ່າ: ການຈັດຕັ້ງງົບປະມານແຫ່ງລັດ 6 ເດືອນຕົ້ນປີ 2020 ດ້ານລາຍຮັບສາມາດປະຕິບັດໄດ້ 9.463 ຕື້ກີບ ເທົ່າກັບ 41,52% ຂອງ ແຜນດັດແກ້, ແຕ່ຖ້າທຽບໃສ່ແຜນເບື້ອງຕົ້ນປະຕິບັດໄດ້ 32,54% ໃນນັ້ນ ລາຍຮັບ ພາຍໃນປະຕິບັດໄດ້ 8.505 ຕື້ກີບ ເທົ່າກັບ 42,23% ຂອງຂອງແຜນດັດແກ້ (ຖ້າທຽບໃສ່ໄລຍະດຽວກັນປີຜ່ານມາເຫັນວ່າຫຼຸດລົງ 9,35% ເປັນເງິນປະມານ 651 ຕື້ກີບ); ດ້ານລາຍຈ່າຍປະຕິບັດໄດ້ທັງໝົດ 10.529 ຕື້ກີບ ເທົ່າກັບ 31,87% ຂອງແຜນດັດແກ້ ຫຼືເທົ່າກັບ 29% ຂອງແຜນເບື້ອງຕົ້ນໃນນັ້ນຂັ້ນສູນກາງປະຕິບັດໄດ້ 7.047 ຕື້ກີບ ເທົ່າກັບ 29,74% ຂອງ ແຜນການດັດແກ້. 

    ສໍາລັບທິດທາງແຜນການຄາດຄະເນການປະຕິບັດແຜນງົບປະມານແຫ່ງລັດໝົດປີ 2020 ດ້ານລາຍຮັບຄາດວ່າຈະບໍ່ບັນລຸຕາມແຜນປະມານ 6.322 ຕື້ກີບ, ສ່ວນດ້ານລາຍຈ່າຍຄາດວ່າຈະບໍ່ໄດ້ຕາມແຜນການ, ເນື່ອງໄດ້ຮັບການຊີ້ນຳຈາກລັດຖະບານໃຫ້ຄົ້ນຄວ້າມາດຕະການຕ່າງໆ ເພື່ອຫຼຸດຜ່ອນລາຍຈ່າຍທີ່ເຫັນວ່າບໍ່ຈໍາເປັນຕາມຂໍ້ຕົກລົງເລກທີ 31 ຂອງນາຍົກລັດຖະມົນຕີກະຊວງການເງິນກໍ ໄດ້ຜັນຂະຫຍາຍອອກແຈ້ງການເລກທີ 1037/ກງ ເພື່ອຄຸ້ມຄອງລາຍຈ່າຍໃຫ້ຮັດກຸມໂດຍຈັດລຽງບູລິມະສິດອັນໃດຈໍາເປັນອັນໃດບໍ່ຈໍາເປັນເພື່ອຊຳລະ, ເລື່ອນຈ່າຍ ຫຼືໂຈະບາງລາຍຈ່າຍທີ່ບໍ່ສໍາຄັນ, ໂດຍສະເພາະລາຍຈ່າຍຈັດກອງປະຊຸມ, ເຄື່ອນໄຫວພາຍໃນ ແລະຕ່າງປະເທດລວມແລ້ວຈະສາມາດຫຼຸດຜ່ອນລົງໄດ້ພຽງ 2.650 ຕື້ກີບ ໃນນັ້ນຫຼຸດແຜນລາຍຈ່າຍເງິນບໍລິຫານ ແລະ ເງິນດັດສົມສົ່ງເສີມຂອງບັນດາກະຊວງ, ອົງການຂັ້ນສູນກາງລົງປະມານ 30% ຂອງແຜນການປີ (ບໍ່ລວມສອງກຳລັງ ແລະລາຍຈ່າຍສຳຄັນຈຳນວນໜຶ່ງຂອງລັດຖະບານ) ເປັນເງິນປະມານ 350 ຕື້ກີບ, ສຳລັບທ້ອງຖິ່ນຫຼຸດລາຍຈ່າຍ 10% ຂອງແຜນລາຍຈ່າຍເງິນດັດສົ່ງເສີມ (ບໍ່ລວມເງິນກອງທຶນກອງປະຊຸມໃຫຍ່) ເປັນເງິນປະມານ 27 ຕື້ກີບ,ເລື່ອນລາຍຈ່າຍລົງທຶນພາຍໃນຢ່າງຕໍ່າ 50% ແລະຫຼຸດບັນດາລາຍຈ່າຍອື່ນໆຂອງລັດຖະບານ.
  ສ່ວນການຂາດດຸນງົບປະມານອີງໃສ່ການຄາດຄະເນລາຍຮັບ ແລະ ລາຍຈ່າຍຈະເຮັດໃຫ້ການຂາດດຸ່ນງົບປະມານເພີ່ມຂຶ້ນຕື່ມປະມານ 3.622 ຕື້ກີບ ຈາກ 6.696 ຕື້ກີບ (3,77% ຂອງ GDP) ມາເປັນ 10.318 ຕື້ກີບ ເທົ່າກັບ 5,87% ຂອງ GDP (ຄາດຄະເນມູນຄ່າ GDP 175.720 ຕື້ກີບ),ສໍາລັບການຂາດດຸນເພີ່ມລັດຖະບານຈະພະຍາຍາມລະດົມແຫ່ງດຸ່ນດ່ຽງພາຍໃນ, ແຕ່ຈະບໍ່ກູ້ຢືມຈາກຕ່າງປະເທດເພື່ອມາດຸ່ນດ່ຽງອີງໃສ່ສະພາບຂອງໜີ້ສິນທີ່ໜັກໜ່ວງໃນປະຈຸບັນ.

--------------

 #ຫນັງສືພິມເສດຖະກິດສັງຄົມ

แชร์