ສຳເລັດກອງປະຊຸມວຽກງານກວດກາ ທຫລ

  ກອງປະຊຸມວຽກງານກວດກາທະນາຄານແຫ່ງ ສປປ ລາວ (ທຫລ) ປະຈໍາປີ 2019 ໄດ້ຈັດຂຶ້ນ ແລະສຳເລັດລົງໃນວັນທີ 7 ສິງຫາ 2020 ໂດຍພາຍໃຕ້ການເປັນປະທານຂອງສະຫາຍ ສອນໄຊ ສິດພະໄຊ ກຳມະການສຳຮອງສູນກາງພັກ, ເລຂາຄະນະພັກ-ຜູ້ວ່າການ ທຫລ; ພ້ອມນີ້, ຍັງມີສະຫາຍ ໄຊຄຳ ອຸ່ນມີໄຊ ຮອງປະທານຄະນະກວດກາສູນກາງພັກ, ຮອງປະທານກວດກາລັດຖະບານ; ສະຫາຍ ພຸດທະໄຊ ສີວິໄລ ຄະນະປະຈຳພັກ, ຮອງຜູ້ວ່າການ ທຫລ, ປະທານຄະນະກວດກາພັກ ທຫລ, ບັນດາສະຫາຍຄະນະພັກ, ຄະນະຮາກຖານພັກ-ຄະນະໜ່ວຍພັກ ແລະພະນັກງານຫຼັກແຫຼ່ງທົ່ວອົງຄະນະພັກ ທຫລ ເຂົ້າຮ່ວມ.
   ສະຫາຍ ນາງ ຂັນແກ້ວ ຫຼ້າມະນີເງົາ ຮອງປະທານຄະນະກວດກາພັກ ທຫລ-ຫົວໜ້າກົມບັນຊີ ແລະ ການເງິນໄດ້ນຳສະເໜີຮ່າງບົດສະຫຼຸບການເຄື່ອນໄຫວວຽກ ງານກວດກາ ທຫລ ປະຈໍາປີ 2019 ທີ່ສ່ອງແສງໃຫ້ເຫັນບັນດາຜົນງານທີ່ພົ້ນເດັ່ນທີ່ຄະນະກວດກາຂອງ ທຫລ ສາມາດຍາດມາໄດ້ເປັນຕົ້ນແມ່ນການຄົ້ນຄວ້າສ້າງ ແລະ ເຜີຍແຜ່-ໂຄສະນານິຕິກຳ; ການຕິດຕາມ, ກວດກາຮາກຖານພັກ-ໜ່ວຍພັກ ທີ່ນຳສະເໜີຄະນະພັກ ທຫລ ພິຈາລະນາເອົາບັນດາຮາກຖານພັກເປັນໜ່ວຍພັກປອດໃສເຂັ້ມແຂງໜັກແໜ້ນຈຳນວນ 23 ໜ່ວຍພັກ. ພ້ອມນັ້ນ, ຍັງຕິດຕາມການດຳເນີນຊີວິດການເມືອງເພື່ອກ້າວເຂົ້າສູ່ກອງປະຊຸມໃຫຍ່ 3 ຂັ້ນ ແລະຕິດຕາມການກວດກາການເຄື່ອນໄຫວຂອງສະມາຊິກພັກ-ພະນັກງານ ໃນຂົງເຂດຄວາມຮັບຜິດຊອບຂອງຕົນຢ່າງເຂັ້ມງວດ ແລະ ເດັດຂາດເອົາສະມາຊິກພັກທີ່ເຊື່ອມຄຸນປ່ຽນທາດ ແລະລະເມີດຕໍ່ລະບຽບຫຼັກການອອກຈາກການຈັດຕັ້ງພັກຈຳນວນໜຶ່ງ; ການຕິດຕາມ, ກວດກາການບໍລິຫານລັດກໍ່ດຳເນີນເປັນປົກກະຕິສາມາດກວດກາທັງໝົດ 16 ເປົ້າໝາຍໃນນີ້ສຳເລັດການກວດກາທະນາຄານທຸລະກິດ 17 ແຫ່ງ, ກວດກາສະເພາະກິດ 4 ແຫ່ງ ແລະກວດກາສະຖາບັນການເງິນທັງໝົດ 104 ແຫ່ງ, ກວດກາສຸກເສີນສະຖາບັນການເງິນຈຸລະພາກ 7 ແຫ່ງ, ນອກນີ້ຍັງຮ່ວມກັບອົງການກວດກາລັດຖະບານດຳເນີນການກວດກາທະນາຄານທຸລະກິດລັດ 1 ແຫ່ງ ແລະ ທະນາ ຄານສະເພາະກິດ 1 ແຫ່ງ.
  ກ່ຽວກັບການສະກັດກັ້ນ-ຕ້ານການສໍ້ລາດບັງຫຼວງກໍ່ໄດ້ມີການເຄື່ອນໄຫວຢ່າງແຂງແຮງ ແລະເປັນປົກກະຕິໂດຍຖືເປັນບັນຫາສຳຄັນ ແລະສອດຫ້ອຍໃນທຸກວຽກງານເພື່ອຕິດຕາມຊຸກຍູ້-ກວດກາ ແລະແກ້ໄຂປາກົດການຫຍໍ້ທໍ້ໃຫ້ມີປະສິດທິຜົນ,ມີຄວາມໂປ່ງໃສ ແລະທັນສະພາບການໃນນີ້ໄດ້ສົມທົບກັບອົງການກວດກາລັດຖະບານເຄື່ອນ ໄຫວຕິດຕາມ ຊຸກຍູ້-ກວດກາວຽກງານສະກັດກັ້ນ ແລະ ຕ້ານການສໍ້ລາດບັງຫຼວງແຕ່ຫົວທີທົ່ວຂະແໜງການທະນາຄານ ແລະສາມາດແກ້ໄຂບັນດາປາກົດການຫຍໍ້ທໍ້ໄດ້ຈຳນວນໜຶ່ງ; ນອກນັ້ນ, ກໍໄດ້ມີການຄົ້ນຄວ້າຄຳຮ້ອງ-ຄຳສະເໜີ ແລະ ປັບປຸງກົງຈັກການຈັດຕັ້ງ ແລະ ບຳລຸງກໍ່ສ້າງພະນັກງານໄດ້ເປັນຢ່າງດີຈາກນັ້ນ, ກໍ່ໄດ້ຜ່ານ ທິດທາງແຜນການປີ 2020.
   ກອງປະຊຸມຍັງໄດ້ຮັບຟັງການເຜີຍແຜ່ບົດສະຫຼຸບຫຍໍ້ການເຄື່ອນໄຫວວຽກງານກວດກາປີ 2019 ແລະ ທິດທາງແຜນການປີ 2020 ຂອງຄະນະກວດກາສູນກາງພັກ; ເຜີຍແຜ່ຂໍ້ກຳນົດວ່າດ້ວຍການຄົ້ນຄວ້າພິຈາລະນາແກ້ໄຂຄຳຮ້ອງຟ້ອງ, ຮ້ອງທຸກ. ຈາກນັ້ນ, ສະຫາຍ ສອນ ໄຊ ສິດພະໄຊ ເລຂາຄະນະພັກ ທຫລ ກໍໄດ້ເຜີຍແຜ່ບົດໂອ້ລົມຂອງສະຫາຍ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ອົງການກວດກາລັດຖະບານ ແລະ ຕ້ານການສໍ້ລາດບັງຫຼວງຕໍ່ກອງປະຊຸມວຽກງານກວດກາທົ່ວປະເທດປະຈຳປີ 2019 ແລະ ໃນເວລາຕໍ່ມາກໍ່ໄດ້ມີການປະກອບຄວາມເຫັນຈາກຄະນະພັກຮາກຖານທະນາຄານການຄ້າຕ່າງປະເທດລາວມະຫາຊົນໃນຫົວຂໍ້ການປັບປຸງວຽກງານກວດກາພາຍໃນໄລຍະໃໝ່; ຄະນະພັກຮາກ ຖານທະນາຄານສົ່ງເສີມກະສິກຳປະກອບຄວາມເຫັນກ່ຽວກັບທິດທາງລວມໃນການແກ້ໄຂໜີ້ເສຍ (NPL); ຄະນະພັກຮາກຖານທະນາຄານນະໂຍບາຍປະກອບຄວາມເຫັນກ່ຽວກັບການປະຕິບັດວຽກງານກວດກາໃນໄລຍະຜ່ານມາ ແລະທິດທາງແຜນການໃນຕໍ່ໜ້າ; ຄະນະພັກຮາກຖານທະນາຄານພັດທະນາລາວປະກອບຄວາມເຫັນໃນຫົວຂໍ້ການຈຳກັດ ແລະສະກັດກັ້ນປາກົດການຫຍໍ້ທໍ້ໃນຂົງເຂດຄວາມຮັບຜິດຊອບຂອງຕົນ ແລະ ຄະນະສາຂາ ທຫລ ແຂວງສະຫວັນນະເຂດປະກອບຄວາມເຫັນໃນວຽກງານສຸມໃສ່ຕ້ານ ແລະສະກັດກັ້ນປາກົດການຫຍໍ້ທໍ້ໃນຖັນແຖວສະມາຊິກພັກ-ພະນັກງານ.
    ພ້ອມນັ້ນ,ຜູ້ແທນຂອງກອງປະຊຸມຍັງໄດ້ມີການປະກອບຄຳຄິດຄຳເຫັນໃສ່ຮ່າງບົດສະຫຼຸບການເຄື່ອນໄຫວວຽກງານກວດກາ ທຫລ ປະຈໍາປີ 2019, ທິດທາງແຜນ ການປີ 2020 ຢ່າງມີປະຊາທິປະໄຕເພື່ອຮັບປະກັນທິດນຳຂອງພັກທີ່ວ່າ: ວຽກງານກວດກາເປັນໜຶ່ງໃນພາລະບົດບາດ ແລະ ແບບແຜນການນຳພາຂອງພັກ “ບໍ່ມີ ການກວດກາກໍ່ໝາຍຄວາມວ່າບໍ່ມີການນຳພາ”. ໃນຕອນທ້າຍທີ່ປະຊຸມຍັງໄດ້ຮັບຟັງການໂອ້ລົມຈາກສະຫາຍເລຂາຄະນະພັກ ທຫລ ຊຶ່ງສະຫາຍໄດ້ຕີລາຄາສູງຕໍ່ການເຄື່ອນໄຫວທີ່ຕັ້ງໜ້າຂອງຄະນະກວດກາຂອງ ທຫລ ໂດຍສະເພາະຕໍ່ພະນັກງານຂັ້ນນຳ ແລະຂັ້ນວິຊາການຂອງກົມກວດກາພາຍໃນຂອງ ທຫລ ທີ່ມີຄວາມຮັບຜິດຊອບສູງໃນການຈັດຕັ້ງປະຕິບັດໜ້າທີ່ການເມືອງຕົນ, ພ້ອມດຽວກັນນັ້ນກໍ່ໃຫ້ສືບຕໍ່ເສີມຂະຫຍາຍຈຸດດີທີ່ຕັ້ງໜ້າ ແລະປັບປຸງແກ້ໄຂຂໍ້ຄົງຄ້າງໃນໄລຍະຜ່ານມາເຮັດໃຫ້ປາກົດ ການຫຍໍ້ທໍ້ໃນຂະແໜງການທະນາຄານຫຼຸດໜ້ອຍລົງເປັນກ້າວໆ.

_____________

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

 

แชร์