ຄຳມ່ວນ ສະຫຼຸບວຽກງານໂພຊະນາການ

  ໃນວັນທີ 7 ສິງຫາ 2020 ທີ່ແຂວງຄຳມ່ວນໄດ້ຈັດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2020 ຂອງກອງເລຂາຄະນະກຳມະການຂັ້ນແຂວງດ້ານໂພຊະນາການໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ, ມີບັນດາທ່ານໃນຄະ ນະໂພຊະນາການຂັ້ນແຂວງ ແລະ 10 ເມືອງຂອງແຂວງຄຳມ່ວນຕະຫຼອດຮອດຕາງໜ້າອົງການຈັດຕັ້ງສາກົນ ແລະພາກສ່ວນກ່ຽວຂ້ອງເຂົ້າຮ່ວມ.
  ທ່ານ ນາງ ພາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກແຂວງ, ໃນນາມຫົວໜ້າກອງເລຂາໄດ້ລາຍງານການຈັດຕັ້ງປະຕິບັດໃນ 22 ມາດຕະການ ຂອງວຽກງານໂພຊະນາການຂອງບັນດາຂະແໜງການຕະຫຼອດໄລຍະ 6 ເດືອນຕົ້ນປີເພື່ອທົບທວນຄືນຄາດໝາຍສູ້ຊົນ ແລະທິດທາງແຜນການຈັດຕັ້ງປະຕິບັດຍຸດທະ ສາດໃນຜ່ານມາໂດຍສັງເຂບໂດຍຊະເພາະແມ່ນສະພາບດ້ານໂພສະນາການຊຶ່ງສະແດງໃຫ້ເຫັນອັດຕາເດັກຂາດສານອາຫານປະເພດນໍ້າໜັກຫຼຸດມາດຕະຖານໃນ 10 ເມືອງແມ່ນຢູ່ໃນລະດັບຕໍ່າກວ່າ 18,37% ຖ້າທຽບໃສ່ຄາດໝາຍຂອງແຂວງທີກຳນົດໃຫ້ແມ່ນ 23,2% ແລະຄາດໝາຍສະເພາະບໍ່ໃຫ້ເກີນ 20% ເຫັນວ່າສາມາດບັນລຸຄາດໝາຍໄດ້, ອັດຕາເດັກນ້ອຍຂາດສານອາຫານລວງສູງບໍ່ໄດ້ມາດຕະຖານໃນ 10 ເມືອງແມ່ນຢູ່ໃນລະດັບຕໍ່າກວ່າ 23,28%,ຄາດໝາຍຂອງແຂວງກໍານົດໃຫ້ແມ່ນ 28,47 ແລະຄາດໝາຍສະເພາະແມ່ນບໍ່ເກີນ 32% ແມ່ນເຫັນວ່າບັນລຸຄາດໝາຍໄດ້, ສ່ວນອັດຕາເດັກນ້ອຍຂາດສານອາຫານແບບຈ່ອຍທຽບໃສ່ຄາດໝາຍທີ່ສະພາກຳນົດ 10% ເຫັນວ່າບໍ່ສາມາດບັນລຸຄາດໝາຍໄດ້,ອັດຕາຂາດສານອາຫານເດັກນ້ອຍລຸ່ມ 5 ປີ ໃນ 3 ແບບນີ້ແມ່ນມີ 5 ເມືອງທີ່ມີອັດຕາຕົວເລກສູງເກີນຄາດ ໝາຍທີ່ວາງອອກຄື: ເມືອງມະຫາໄຊ, ໄຊບົວທອງ, ຍົມມະລາດ, ໜອງບົກ ແລະເມືອງຄູນຄຳ, ສ່ວນອີກ 5 ເມືອງທີ່ມີຕົວເລກຕໍ່າຫຼຸດຄາດໝາຍໄດ້ແກ່ເມືອງບົວລະ ພາ, ເຊບັ້ງໄຟ, ຫີນບູນ, ນາກາຍ ແລະເມືອງທ່າແຂກ.
  ຈາກຂໍ້ມູນດັ່ງກ່າວນີ້ສາມາດສະຫຼຸບໄດ້ວ່າການເຂົ້າເຖິງພໍ່ແມ່ປະຊາຊົນໃນແຕ່ລະເຂດຍັງບໍ່ທັນທົ່ວເຖິງໃນການສະໜອງຄວາມຮູ້ດ້ານໂພຊະນາການອີກດ້ານໜຶ່ງຄວາມອາດສາມາດຂອງພະນັກງານໃນດ້ານເຕັກນິກວິຊາການ, ການໃຫ້ຄວາມຮູ້ສຸຂະສຶກສາຍັງບໍ່ທັນສູງລວມເຖິງອຸປະກອນນຳໃຊ້ເຂົ້າໃນການປະເມີນເດັກບໍ່ໄດ້ມາດຖານ.
   ພ້ອມດຽວກັນນັ້ນຍັງໄດ້ຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດວຽກງານຜ່ານມາທີ່ຕິດພັນກັບວຽກງານກອງເລຂາ ແລະຜົນການຈັດຕັ້ງປະຕິບັດທີ່ຕິດພັນກັບ 22 ມາດຕາ, ພ້ອມທັງຈຸດດີຂໍ້ຄົງຄ້າງສິ່ງທ້າທາຍ ແລະ ທິດທາງແຜນການໃນທ້າຍປີ 2020, ນອກນັ້ນຍັງໄດ້ທົບທວນຄືນການຈັດຕັ້ງປະຕິບັດວຽກງານກອງເລຂາຂອດການປະສານງານຂັ້ນແຂວງ ແລະ ເມືອງລວມເຖິງການເຜີຍແຜ່ຄູ່ມືການສ້າງບ້ານໂພຊະນາການຕົວແບບດ້ວຍການຈັດຕັ້ງປະຕິບັດຍຸດທະສາດແບບໜຶ່ງດຽວໂດຍຫຼາຍຂະແໜງການທັງນີ້ກໍ່ເພື່ອແນໃສ່ເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າໄດ້ຮັບການພັດທະນາດີຂຶ້ນ ແລະປະສົບຜົນສຳເລັດຕາມລະດັບຄາດໝາຍ.

----------------

ຂ່າວ: ມະນີວັນ. ຮູບພາບ: ໜັງສືພິມເສດຖະກິດ-ສັງຄົມ

  

แชร์