ເຮືອບິນອິນເດຍຕົກເສຍຊີວິດ 18 ຄົນ

   ອຸບັດເຫດເຮືອບິນໂບອິ້ງ 737 ຂອງສາຍການບິນແອອິນເດຍເອັກເພສ ພ້ອມຜູ້ໂດຍສານ ແລະພະນັກງານລວມ 191 ຄົນ ຕົກອອກນອກທາງແລ່ນໃນລັດກະເຣລະ ທາງພາກໃຕ້ຂອງອິນເດຍຫຼ້າສຸດມີຜູ້ເສຍຊີວິດຢ່າງໜ້ອຍ 18 ຄົນ.

  ຕາມຂ່າວຕ່າງປະເທດລາຍງານວ່າເຮືອບິນໂບອິ້ງ 737 ຂອງສາຍການບິນແອ ອິນເດຍເອັກ ເພສ ພ້ອມຜູ້ໂດຍສານ ແລະ ພະນັກງານເຮືອບິນລວມ 191 ຄົນ ຕົກອອກນອກທາງແລ່ນໃນວັນທີ 8 ສິງຫາທີ່ຜ່ານມາຂະນະທີ່ພະຍາຍາມລົງຈອດທີ່ສະໜາມບິນນານາຊາດໂກລີໂກດ 2 ຄັ້ງແຕ່ບໍ່ສຳເລັດທ່າມກາງຝົນຕົກໜັກເຮັດໃຫ້ມີຜູ້ເສຍຊີວິດ 18 ຄົນ ແລະໄດ້ຮັບບາດເຈັບຫຼາຍກວ່າ 120 ຄົນ ເຮືອບິນຫັກອອກເປັນ 2 ທ່ອນ ແຕ່ໂຊກດີບໍ່ເກີດໄຟໄໝ້ຫຼັງຈາກເກີດເຫດເຈົ້າໜ້າທີ່ກູ້ໄຟ ແລະຜູ້ທີ່ຢູ່ໃກ້ ຄຽງກໍເຂົ້າໄປຊ່ວຍເຫຼືອຜູ້ທີ່ຢູ່ຂ້າງໃນເຮືອນບິນໂດຍຕ້ອງໃຊ້ອຸປະກອນຕັດເຫຼັກເພື່ອຊ່ວຍຄົນເຈັບອອກມາໃຊ້ເວລາດົນເຖິງ 3 ຊົ່ວໂມງ ຈຶ່ງຊ່ວຍເຫຼືອຜູ້ທີ່ໄດ້ຮັບບາດເຈັບ ແລະລໍາລຽງຜູ້ເສຍຊີວິດອອກມາໄດ້ໝົດ.

  ເຮືອບິນລໍາດັ່ງກ່າວນີ້ເດີນທາງຈາກນະຄອນຫຼວງດູໄບຂອງສະຫະລັດອາຣັບອາມິເຣດ ໂດຍເປັນໜຶ່ງໃນຖ້ຽວບິນຫຼາຍຮ້ອຍຖ້ຽວທີ່ຖືກສົ່ງໄປຮັບຄົນອິນເດຍທີ່ຕິດຄ້າງຢູ່ ໃນຕ່າງປະເທດເພາະການແຜ່ລະບາດຂອງເຊື້ອໂຄວິດ-19 ສຳລັບສາເຫດຂອງການເກີດອຸບັດເຫດໃນຄັ້ງນີ້ຄາດວ່າອາດມີບັນຫາ ກ່ຽວກັບລະບົບເກຍລົງຈອດຂະນະນີ້ເຈົ້າໜ້າທີ່ພົບກ່ອງດຳ ແລະກ່ອງບັນທຶກສຽງພາຍໃນຫ້ອງນັກບິນແລ້ວ.

แชร์