ກອງປະຊຸມສະໄໝສາມັນຂອງ ສພຂ ຈຳປາສັກ ຮັບຮອງເອົາ 5 ບັນຫາສຳຄັນ

  ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຊຸດທີ I ອັດລົງດ້ວຍຜົນສໍາຢ່າງຈົບງາມຊຶ່ງໄດ້ດຳເນີນມາແຕ່ວັນທີ 30-31 ກໍລະກົດ 2020 ທີ່ສະ ໂມສອນຫຼັກ 4 ຂອງແຂວງໂດຍການເປັນປະທານຂອງ ທ່ານ ເມກສະຫັວນ ພົມພິທັກ ຮອງເລຂາພັກແຂວງປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງ ທ່ານ ວິໄລວົງ ບຸດດາຄໍາ ກໍາມະການສູນກາງພັກເລຂາພັກແຂວງເຈົ້າແຂວງຈໍາປາສັກ, ມີທ່ານຮອງເຈົ້າແຂວງ, ສະມາຊິກສະພາແຫ່ງຊາດເຂດ 15, ສະມາຊິກສະພາປະຊາຊົນແຂວງ, ເຈົ້າເມືອງ 9 ເມືອງ 1 ນະຄອນ, ອົງການແນວລາວສ້າງຊາດແຂວງ, ຕາງໜ້າອົງການຈັດຕັ້ງມະຫາຊົນ ແລະພາກສ່ວນກ່ຽວຂ້ອງເຂົ້າຮ່ວມ.
 ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຊຸດທີ I ເທື່ອນີ້ດໍາເນີນໄປດ້ວຍບັນຍາກາດທີ່ສ້າງສັນບົນພື້ນຖານຄວາມຮັບຜິດຊອບການເມືອງຂອງສະ ມາຊິກສະພາປະຊາຊົນແຂວງຈຳປາສັກໃນການຄົ້ນຄວ້າ, ປະກອບຄຳເຫັນໃສ່ທຸກເນື້ອໃນທີ່ນຳມາພິຈາລະນາຊຶ່ງກອງປະຊຸມໄດ້ພິຈາລະນາຮັບຮອງເອົາ 5 ບັນຫາສຳຄັນຄື: 1 ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນ ຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2020 ຂອງແຂວງຈຳປາສັກ; 2 ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020 ຂອງແຂວງຈຳປາສັກ; 3 ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີ 2020 ຂອງສະພາປະຊາຊົນແຂວງ ແລະແຜນເຄື່ອນໄຫວຮອດກອງປະຊຸມຄັ້ງປະຖົມມະລືກຂອງສະພາປະຊາ ຊົນແຂວງຊຸດທີ II; 4 ຮັບຮອງເອົາການເລືອກຕັ້ງທ່ານ ນາງ ແສງສຸວັນ ຊຸຍພະສິດ ເປັນຄະນະປະຈຳສະພາປະຊາຊົນແຂວງ; 5 ຮັບຮອງເອົາຮ່າງແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະສິ່ງແວດລ້ອມແຂວງຈຳປາສັກ.
  ການອອກມະຕິກອງປະຊຸມຄັ້ງນີ້ຈະເປັນນິຕິກຳພື້ນຖານເພື່ອໃຫ້ອົງການປົກຄອງແຂວງສືບຕໍ່ຊີ້ນຳ-ນຳພາບັນດາຂະແໜງການພ້ອມທັງປຸກລະດົມປະຊາຊົນລາວບັນ ດາເຜົ່າສູ້ຊົນຜ່ານຜ່າຂໍ້ຫຍຸ້ງຍາກທາງດ້ານເສດຖະກິດ-ການເງິນ, ສືບຕໍ່ຈັດຕັ້ງປະຕິບັດບັນດານະໂຍບາຍ, ມາດຕະການທາງດ້ານເສດຖະກິດ-ສັງຄົມໃຫ້ມີປະສິດທິຜົນ ເພື່ອແກ້ໄຂຂໍ້ອຸດຕັນໃນການຄຸ້ມຄອງ ແລະບໍລິຫານລັດໃນຂະແໜງການຕ່າງໆໃຫ້ມີຄວາມໂລ່ງລ່ຽນຕາມກົດໝາຍກຳນົດໄວ້.
 ຈາກຜົນສຳເລັດຂອງກອງປະຊຸມໃນຄັ້ງນີ້ແມ່ນໝາກຜົນອັນລວມຍອດຕໍ່ການເສີມຂະຫຍາຍສະຕິປັນຍາລວມໝູ່, ການປະສານສົມທົບຢ່າງກົມກຽວແຕ່ຫົວທີລະຫວ່າງສະພາປະຊາຊົນແຂວງກັບອົງການປົກຄອງແຂວງ, ລະຫວ່າງບັນດາຄະນະກຳມະການຂອງສະພາປະຊາຊົນແຂວງກັບບັນດາພະແນກການ, ອົງການທີ່ກ່ຽວຂ້ອງຂອງແຂວງທີ່ໄດ້ເຊີດຊູຄວາມຮັບຜິດຊອບໃນການຄົ້ນຄວ້າ ແລະນຳສະເໜີຜ່ານໃນກອງປະຊຸມຄັ້ງນີ້; ການປະກອບຄຳຄິດເຫັນຕໍ່ບັນດາເນື້ອໃນທີ່ນຳມາພິຈາລະນາ ແລະ ຮັບ ຮອງເອົາໃນກອງປະຊຸມຄັ້ງນີ້ກໍມີລັກສະນະສ້າງສັນ, ມີເຫດຜົນ, ມີເນື້ອໃນເລິກເຊິ່ງ.

-----------------

ຂ່າວ: ໂພທິຣາຊ 

ຮູບພາບ: #ຫນັງສືພິມເສດຖະກິດສັງຄົມ

แชร์