ມອບ-ຮັບອຸປະກອນໃຫ້ແກ່ກຸ່ມລ້ຽງສັດບ້ານທ່າຫຼວງ

 ຫ້ອງການກະສິກຳ ແລະປ່າໄມ້ເມືອງວຽງພູຄາ ໄດ້ຈັດພິທີມອບ-ຮັບອຸປະກອນໃຫ້ແກ່ສະມາຊິກກຸ່ມລ້ຽງສັດບ້ານທ່າຫຼວງ ເມືອງວຽງພູຄາ ໃນວັນທີ 5 ສິງຫາ 2020 ທີ່ຫ້ອງການບ້ານທ່າຫຼວງ, ພາຍໄຕ້ການເປັນປະທານຂອງທ່ານ ບຸນມາ ພິລາວົງ ຮັກສາການຫົວໜ້າຫ້ອງການກະສິກຳ ແລະປ່າໄມ້ເມືອງເຂົ້າຮ່ວມທ່ານ ນາງ ເຮືອຍ ສົມຫວັງ ຮອງເຈົ້າເມືອງວຽງພູຄາ, ຜູ້ຊີ້ນຳວຽກງານຂົງເຂດວັດທະນະທຳສັງຄົມ, ມີນາຍບ້ານໆທ່າຫຼວງ, ປກສ ກຸ່ມບ້ານທົ່ງລາດ, ທີມງານຫ້ອງການກະສິກຳ ແລະປ່າໄມ້ເມືອງ, ຕະຫຼອດຮອດສະມາຊິກກຸ່ມລ້ຽງສັດເຂົ້າຮ່ວມ.
 ອຸປະກອນທີ່ນໍາມາມອບຄັ້ງນີ້ມີເຫຼັ້ກໜາມໝາກຈັບນໍ້າໜັກ 5 ກິໂລຕໍ່ໂຄ້ງ, ຍາວ 50 ແມັດຕໍ່ໂຄ້ງລວມທັງໝົດຈໍານວນ 308 ໂຄ້ງ, ໄດ້ຮັບການສະໜັບສະໜູນຈາກໂຄງການລ້ຽງສັດເພື່ອຜະລິດເປັນສິນຄ້າຢູ່ເຂດພາກເໜືອຂອງ ສປປ ລາວ ປະຈໍາແຂວງຫຼວງນໍ້າທາມູນຄ່າທັງໝົດ 21 ລ້ານກີບ, ບ້ານທ່າຫຼວງມີກຸ່ມລ້ຽງງົວມີ 1 ກຸ່ມ ມີ 7 ຄອບຄົວ, ມີງົວທັງໝົດ 130 ໂຕ, ມີເນື້ອທີ່ປູກຫຍ້າທັງໝົດ 11 ກວ່າເຮັກຕາ, ແຜນຕໍ່ໜ້າຈະຂະຫຍາຍເນື້ອທີ່ປູກຫຍ້າອອກຕື່ມເພື່ອຜະລິດຫຍ້າໃຫ້ສັດລ້ຽງໃຫ້ພຽງພໍ, ໃນ 6 ເດືອນຕົ້ນປີ 2020 ສະມາຊິກພາຍໃນກຸ່ມສາມາດຂາຍສັດລ້ຽງປະເພດງົວຈຳນວນ 7 ໂຕມູນຄ່າ 56 ລ້ານກີບ, ຜ່ານມາວິຊາການຫ້ອງການກະສິ ກຳ ແລະປ່າໄມ້ເມືອງກໍ່ໄດ້ເອົາໃຈໃສ່ລົງກະຕຸກຊຸກຍູ້ສົ່ງເສີມປະຊາຊົນກ່ຽວກັບການປູກ-ການລ້ຽງຂອງບ້ານເປົ້າໝາຍຂອງໂຄງການຢູ່ພາຍໃນເມືອງ.


   ໃນພີທີທ່ານ ນາງ ເຮືອຍ ສົມຫວັງ ຮອງເຈົ້າເມືອງໄດ້ໂອ້ລົມຕໍ່ຊາວກະສິກອນກຸ່ມລ້ຽງສັດໃຫ້ປະຕິບັດຕາມເຕັກນິກວິທະຍາສາດການປູກ-ການລ້ຽງໃຫ້ຖືກຕ້ອງຕາມເປົ້າໝາຍເພື່ອເຮັດໃຫ້ສັດລ້ຽງມີຄວາມປອດໄພ,ແຜ່ພັນຫຼາຍຂຶ້ນກວ່າເກົ່າ, ຂາຍເປັນສິນຄ້າສ້າງລາຍຮັບໃຫ້ແກ່ຄອບຄົວ, ຊຸກຍູ້ສົ່ງເສີມປະຊາຊົນໃຫ້ເຂົ້າກຸ່ມລ້ຽງສັດຜະ ລິດຫຍ້າອາຫານສັດໃຫ້ຫຼາຍຂຶ້ນເອົາໃຈໃສ່ເບິ່ງແຍງດູແລຮັກສາສຸຂະພາບສັດລ້ຽງຂອງຕົນໃຫ້ແຂງແຮງນອກຈາກການລ້ຽງສັດແລ້ວກໍ່ໃຫ້ປະຊາຊົນປູກພືດຕົ້ນໄມ້ໃຫ້ໝາກເພື່ອຂາຍເປັນສິນຄ້າໂດຍຕິດພັນກັບວຽກງານ 3 ສ້າງ,
 ພ້ອມນັ້ນທ່ານ ນາງ ເຮືອຍ ສົມຫວັງ ຮອງເຈົ້າເມືອງ ແລະທ່ານ ບຸນມາ ພິລາວົງ ຮັກສາການຫົວໜ້າຫ້ອງການກະສິກຳ ແລະປ່າໄມ້ເມືອງກໍ່ໄດ້ມອບອຸປະກອນໃຫ້ແກ່ກຸ່ມລ້ຽງສັດຢ່າງເປັນທາງການກ່າວຮັບໂດຍນາຍບ້ານທ່າຫຼວງເພື່ອນຳໄປແຈກຢາຍໃຫ້ກຸ່ມລ້ຽງສັດ.

แชร์