ເຈົ້າໜ້າທີ່ຕຳຫຼວດເມືອງສອງຄອນກັກຕົວຜູ້ກໍ່ເຫດຊິງຊັບພ້ອມເງິນ 130,000 ບາດ

  ໃນຕອນເຊົ້າຂອງວັນທີ 3 ສິງຫາ 2020 ທີ່ຜ່ານມາ, ຢູ່ທີ່ກອງບັນຊາການ ປກສ ເມືອງສອງຄອນ, ທາງເຈົ້າໜ້າທີ່ວິຊາສະເພາະໜ່ວຍງານຄະດີອາຍາ-ເສດຖະກິດ ກອງບັນຊາການ ປກສ ເມືອງສອງຄອນໄດ້ນຳເອົາເງິນສົດຈຳນວນ 130.000 ບາດມອບຄືນໃຫ້ເຈົ້າຂອງເງິນຄົບຕາມຈຳນວນ.

   ຕາມການລາຍງານຂອງທ່ານ ຮອ ບົນສະຫວັນ ອິນທິສານ ຫົວໜ້າໜ່ວຍງານຄະດີອາຍາ-ເສດຖະກິດໄດ້ໃຫ້ຮູ້ວ່າ: ໃນເວລາ 15 ໂມງຂອງວັນທີ 23 ກໍລະກົດ 2020 ທາງເຈົ້າໜ້າທີ່ໜ່ວຍງານຄະດີອາຍາ-ເສດຖະກິດໄດ້ຮັບລາຍງານຈາກເຈົ້າໜ້າທີ່ປະຈຳຢູ່ສູນກັກກັນໂຮງຮຽນທິດສະດີການເມືອງຫ້ວຍສາງເຂົ້າວ່າມີຄົນຮ້າຍຂຶ້ນມາຫ້ອງພັກຂອງສູນກັກກັນ ແລະໄດ້ດຶງເອົາກະເປົາເງິນຂອງ ນາງ ຂະໜົມ ອາຍຸ 21 ປີ ອາຊີບເຮັດນາຢູ່ບ້ານກໍຊອງ ເມືອງວາປີ ແຂວງສາລະວັນ.

  ຈາກນັ້ນທາງເຈົ້າໜ້າທີ່ວິຊາສະເພາະຈຶ່ງໄດ້ຈັດຕັ້ງກຳລັງລົງໄປກວດກາສະຖານທີ່ເກີດເຫດຕົວຈິງໂດຍສົມທົບກັບພາກສ່ວນທີ່ກ່ຽວຂ້ອງເພື່ອເກັບກຳເອົາຂໍ້ມູນຫຼັກຖານພະຍານຜ່ານການກວດກາເຫັນວ່າເປັນມູນຄວາມຈິງແທ້.

  ຈາກນັ້ນ, ທາງເຈົ້າໜ້າທີ່ວິຊາສະເພາະຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງໄດ້ກວດກາຈຳນວນພົນທີ່ເຂົ້ານອນໃນສູນກັກກັນເຫັນວ່າບໍ່ຄົບ 2 ຄົນ ຄືທ້າວ ຄຳຟອງ ອາຍຸ 26 ປີ ອາຊີບເຮັດນາບ້ານຜັກຂະ ເມືອງສອງຄອນ ແຂວງສະຫວັນນະເຂດ ແລະທ້າວ ວິທະຍາ ຫຼືນ້ອຍອາຍຸ 26 ປີອາຊີບເຮັດນາບ້ານນາອຸດົມ ເມືອງສອງຄອນ ແຂວງສະຫວັນນະເຂດ,ຕົກມາຮອດເວລາປະມານ 21 ໂມງຂອງວັນດຽວກັນທາງເຈົ້າໜ້າທີ່ຈຶ່ງໄດ້ພົບເຫັນ ທ້າວ ວິທະຍາ ຫຼືນ້ອຍຢູ່ເຮືອນຂອງຜູ້ກ່ຽວທີ່ບ້ານນາອຸດົມ ເມືອງສອງຄອນ.

 ຈາກນັ້ນ, ທາງເຈົ້າໜ້າທີ່ຈຶ່ງໄດ້ກັກຕົວພ້ອມທັງດຳເນີນການສືບສວນສອບສວນເບື້ອງຕົ້ນເຊິ່ງຜູ້ກ່ຽວກໍ່ໄດ້ຮັບສາລະພາບວ່າໄດ້ກໍ່ເຫດຊີງຊັບແທ້. ດັ່ງນັ້ນທາງເຈົ້າໜ້າທີ່ຈຶ່ງໄດ້ໃຫ້ຜູ້ກ່ຽວຕິດຕໍ່ພົວພັນເອົາທ້າວ ຄຳຟອງ ມາພົບທີ່ບ້ານນາອຸດົມ ແລະຕົກຮອດເວລາ 21 ໂມງ 30 ນາທີ ທາງເຈົ້າໜ້າທີ່ຈຶ່ງໄດ້ກັກຕົວທ້າວຄຳຟອງພ້ອມດ້ວຍເງິນຈຳນວນ 100.000 ບາດ ແລະຍັງບໍ່ຄົບຈຳນວນ 30.000 ບາດ.

  ຜ່ານການສືບສວນສອບສວນເຫັນວ່າພວກຜູ້ກ່ຽວຍອມຮັບສາລະພາບວ່າເປັນຄົນກໍ່ເຫດແທ້ເຊິ່ງມາຮອດປະຈຸບັນຈຳນວນເງິນ 130.000 ບາດ ທາງເຈົ້າໜ້າທີ່ວິຊາສະເພາະໜ່ວຍງານຄະດີອາຍາ-ເສດຖະກິດກອງບັນຊາການ ປກສ ເມືອງສອງຄອນໄດ້ມອບຄືນໃຫ້ແກ່ເຈົ້າຂອງເດີມຄົບຖ້ວມແລ້ວ, ໂດຍການເຂົ້າຮ່ວມເປັນສັກຂີພະ ຍານຂອງທ່ານ ພັຕ ວຽງໄຊ ແກ້ວພິລາວົງ ຮອງພະແນກຕຳຫຼວດຊີ້ນຳຄະດີອາຍາກອງບັນຊາການ ປກສ ເມືອງສອງຄອນ ສ່ວນຜູ້ກະທຳຜິດແມ່ນໄດ້ດຳເນີນຕາມຂັ້ນຕອນຂອງກົດໝາຍຕໍ່ໄປ.

แชร์