ໂຮງໝໍແຂວງສະຫວັນນະເຂດ ເລີ່ມໃຊ້ເຄື່ອງທັນສະໄໝບົ່ງມະຕິພະຍາດ

  ວັນທີ 5 ສິງຫາ 2020 ໂຮງໝໍແຂວງສະຫວັນນະເຂດ ໄດ້ຈັດພິທີເປີດນຳໃຊ້ເຄື່ອງ TC sacanner ເພື່ອຄວາມຊັດເຈນໃນການບົ່ງມະຕິພະຍາດ, ຊຶ່ງພິທີດັ່ງກ່າວ ໂດຍການເຂົ້າຮ່ວມຂອງ ທ່ານ ແສງດາວ ສີດາໄລ ຮັກສາການຫົວໜ້າພະແນກສາທາລະນະສຸກແຂວງ, ທ່ານ ນາງພູວິໄລ ແກ້ວມຸງຄຸນ ຫົວໜ້າອຳນວຍການໂຮງໝໍ ແຂວງສະຫວັນນະເຂດ ພ້ອມຄະນະ, ມີບໍລິສັດຜູ້ຮ່ວມທຶນ (ບໍລິສັດໄຊມັງກອນການຢາຈຳກັດ ແລະໂຮງໝໍໄຊມັງກອນ) ພ້ອມດ້ວຍບັນດາແຂກ, ແພດ-ໝໍຕະຫຼອດເຖິງພະຍາບານພາຍໃນໂຮງໝໍແຂວງເຂົ້າຮ່ວມ.

 ໃນໂອກາດດັ່ງກ່າວທ່ານ ນາງ ແສງວອນຖັງ ຜູ້ອຳນວຍການບໍລິສັດ ໄຊມັງກອນການຢາ ຈຳກັດ ຊຶ່ງເປັນບໍລິສັດທີ່ລົງທຶນກໍໄດ້ຂຶ້ນກ່າວມອບເຄື່ອງ TC scanner ລຸ້ນ neuviz16, ທີ່ໄດ້ຕິດຕັ້ງ, ພ້ອມໃຫ້ບໍລິການແກ່ຄົນເຈັບທີ່ຈະມາໃຊ້ບໍລິການ, ຊຶ່ງເຄື່ອງດັ່ງກ່າວເປັນການລົງທຶນຂອງບໍລິສັດໄຊມັງກອນການຢາ ຈຳກັດ ໂດຍຮ່ວມກັບໂຮງໝໍແຂວງສະຫວັນນະເຂດເພື່ອນຳໃຊ້ເຂົ້າໃນການບົ່ງມະຕິພະຍາດທີ່ມີຄຸນນະພາບ, ມີຄວາມຊັດເຈນໃຫ້ແກ່ຄົນເຈັບ.

  ຈາກນັ້ນ ທ່ານ ຄຳປິງ ລາວຖັງ ຜູ້ອຳນວຍການໂຮງໝໍໄຊມັງກອນກໍ່ໄດ້ຍົກໃຫ້ເຫັນເຖິງຄຸນນະພາບ ແລະຄວາມສາມາດຂອງເຄື່ອງ TC scanner ໂດຍມີການຍົກໃຫ້ເຫັນຄວາມຊັດເຈນຂອງເຄື່ອງດັ່ງກ່າວ ແລະມີການປຽບທຽບລະຫວ່າງເຄື່ອງ TC scanner ກັບເຄື່ອງສາຍລັງສີຕ່າງໆເຫັນວ່າເຄື່ອງດັ່ງກ່າວນີ້ມີຄວາມຊັດເຈນ, ເມັ້ນຢຳ, ສາມາດບົ່ງມະຕິຖືກຕ້ອງ.

  ໂອກາດນີ້ ທ່ານ ແສງດາວ ສີດາໄລ ກໍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການຕັດສິນໃຈຂອງຄະນະອຳນວຍການໂຮງໝໍແຂວງທີ່ມີແນວຄິດລິເລີ່ມແກ້ບັນຫາດ້ານຄຸນນະພາບການບໍລິການ, ຍົກສູງຄຸນະພາບການບົ່ງມະຕິຊຶ່ງໄດ້ມີການດຳເນີນການ, ປະສານ, ມີການປຶກສາຫາລື ແລະສ້າງນິຕິກຳໃນການເຊັນ MOU ກັບບໍລິສັດໄຊມັງກອນຂຶ້ນໃນໄລຍະຜ່ານມາ.

 ການທີ່ມີເຄື່ອງ TC scanner ນີ້ແມ່ນມີຄວາມສຳຄັນຫຼາຍໃນການຊ່ວຍບົ່ງມະຕິພະຍາດໃຫ້ມີຄວາມຊັດເຈນ ແລະມີຄຸນນະພາບ, ສິ່ງທີ່ຄວນເອົາໃຈໃສ່ໃນຕໍ່ໜ້າກໍຄື: ບັນຫາດ້ານການບຳລຸງຮັກສາ, ການຕິດຕາມ, ກວດກາ ແລະບັນຫາອື່ນໆ.

  ໂອກາດສຸດທ້າຍ ທ່ານ ແສງ ດາວ ສີດາໄລ ກໍ່ໄດ້ກ່າວເປີດການນຳໃຊ້ເຄື່ອງ TC scanner ພ້ອມທັງຮ່ວມກັນຕັດແຖບຜ້າເປີດການນຳໃຊ້ຢ່າງເປັນທາງການ.

แชร์