ໂຄງການປູກໄມ້ຂອງບົວລະພາຈະສ້າງຜົນປະໂຫຍດຢ່າງຫຼວງຫຼາຍຕໍ່ລາວ

 ໃນໄລຍະຜ່ານມາໂຄງການການລົງທຶນປູກໄມ້ແບບມີສ່ວນຮ່ວມຂອງບໍລິສັດບົວລະພາກະສິກຳ-ປ່າໄມ້ ໄດ້ສ້າງຜົນປະໂຫຍດຢ່າງຫຼວງຫຼາຍຕໍ່ເທດຊາດໂດຍສະເພາະການປະກອບສ່ວນເຮັດໃຫ້ເນື້ອທີ່ປ່າໄມ້ປົກຫຸ້ມໃຫ້ໄດ້ 70% ຂອງແຜນລັດຖະບານຈະບັນລຸໄວ, ການສ້າງລາຍຮັບໃຫ້ລັດຖະບານ, ການພັດທະນາຊົນນະບົດ ແລະ ແກ້ໄຂຄວາມທຸກຍາກເປັນຕົ້ນການສ້າງວຽກເຮັດງານທຳ, ປະຊາຊົນທ້ອງຖິ່ນໄດ້ມີສ່ວນຮ່ວມກັບໂຄງການເຮັດປະຊາຊົນມີຢູ່ມີກິນ ແລະມີຊີວິດການເປັນຢູ່ດີຂຶ້ນເທື່ອລະກ້າວ.

  ບໍລິສັດບົວລະພາກະສິກຳ-ປ່າໄມ້ຈຳ ກັດເປັນບໍລິສັດປູກໄມ້ ແລະປຸງແຕ່ງໄມ້ທີ່ລົງທຶນຮ່ວມກັນລະຫວ່າງນັກທຸລະກິດຈາກປະເທດຊູແອດຖືຮຸ້ນ 95% ແລະ ນັກທຸລະ ກິດລາວຖືຮຸ້ນ 5%, ບໍລິສັດດັ່ງກ່າວໄດ້ສ້າງຕັ້ງຂຶ້ນໃນ ສປປ ລາວ ໃນປີ 1993 ມີເງິນຈົດທະບຽນ 31 ລ້ານໂດລາ ແລະໄດ້ລົງທຶນປະຈຸບັນ 49,6 ລ້ານໂດລາ, ສຳລັບຜະລິດຕະພັນປູກໄມ້ຂອງບໍລິສັດບົວລະພາແມ່ນຈຳໜ່າຍທັງພາຍໃນປະເທດ ແລະ ສົ່ງອອກໄປຫຼາຍກວ່າ 10 ປະເທດເຊັ່ນ: ມານດິບທີ່ເປັນລູກຄ້າລາຍໃຫຍ່, ຮອງລົງ ມາແມ່ນອາເມລິກາ, ສ.ເກົາຫຼີ, ອີຕາລີ, ຣັດເຊຍ ແລະອື່ນໆ.

  ມາຮອດປີ 2018 ບໍລິສັດໄດ້ຮັບສິດນຳໃຊ້ທີ່ດິນໃນເນື້ອທີ່ປະມານ 10.628 ເຮັກຕາ ແລະໄດ້ລົງທຶນປູກໄມ້ໄປແລ້ວ 4.165 ເຮັກຕາ ແລະກຳລັງດຳເນີນການປູກໄມ້ 2.000 ເຮັກຕາ ຢູ່ປ່າຜະລິດແຫ່ງຊາດໜອງເປັດ-ນາແຊງບ້ານນາອັນເມືອງຫີນເຫີບ, ປ່າຜະລິດແຫ່ງຊາດພູເຍີຍເມືອງຊະນະຄາມ ແລະເມືອງເຟືອງແຂວງວຽງຈັນໂດຍສ່ວນໃຫຍ່ແມ່ນໄມ້ວິກ, ໄມ້ກະຖິນນະໂລງ, ໄມ້ສັກ ແລະໄມ້ດູ່ຈຳນວນໜຶ່ງ, ປະຈຸບັນບໍລິສັດບົວລະພາມີໂຮງເລື່ອຍ ແລະໂຮງງານເຟີນິເຈີທັນສະໄໝ 1 ແຫ່ງ ຢູ່ນະ ຄອນຫຼວງວຽງຈັນ,ນອກນັ້ນບໍລິສັດຍັງສ້າງຕັ້ງໂຮງງານໄມ້ອັດ ແລະໄມ້ຝານທີ່ທັນສະໄໝຂຶ້ນອີກໜຶ່ງແຫ່ງຢູ່ເມືອງຫີນເຫີບແຂວງວຽງຈັນເພື່ອນຳໃຊ້ວັດຖຸດິບຈາກສວນໄມ້ປູກຂອງບໍລິສັດມາຜະລິດເປັນສິນຄ້າ ຫຼືເປັນຜະລິດຕະພັນໄມ້ສົ່ງອອກສູ່ຕະຫຼາດຕ່າງປະເທດ.

  ສຳລັບເນື້ອທີ່ 60.000 ເຮັກຕາ ທີ່ລັດຖະບານອະນຸມັດໃໝ່ມໍໆມານີ້ໃນເນື້ອທີ່ປ່າໄມ້ຊຸດໂຊມແມ່ນຄົບຕາມແຜນຕ້ອງການຂອງບໍລິສັດດ້ວຍການສຳປະທານໃນເວລາ 50 ປີ ໂດຍຈະໃຊ້ງົບປະມານໃນການລົງທຶນ 670 ລ້ານກວ່າໂດລາ, ການລົງທຶນປູກໄມ້ອຸດສາຫະກຳຢູ່ເຂດປ່າໄມ້ຊຸດໂຊມໃນເຂດປ່າຜະລິດແຫ່ງຊາດ, ນອກຈາກຈະສ້າງຜົນກຳໄລໃຫ້ແກ່ຜູ້ປະກອບການທີ່ລົງທຶນແລ້ວ, ຍັງສ້າງຜົນປະໂຫຍດມະຫາສານທາງດ້ານເສດຖະກິດ, ດ້ານສັງຄົມ ແລະ ດ້ານສິ່ງແວດລ້ອມໃນລະດັບສູນກາງ ແລະທ້ອງຖິ່ນ ເປັນຕົ້ນການປະກອບສ່ວນຈັດຕັ້ງປະຕິ ບັດນະໂຍບາຍການພັດທະນາແບບຍືນ ຍົງຕາມຈັງຫວະການເຕີບໂຕສີຂຽວ, ການປະກອບສ່ວນສ້າງລາຍຮັບໃຫ້ແກ່ລັດຖະບານ, ການປະກອບສ່ວນຈັດຕັ້ງປະຕິບັດນະໂຍບາຍພັດທະນາຊົນນະບົດ ແລະ ແກ້ໄຂຄວາມທຸກຍາກ, ການສະໜອງວຽກເຮັດງານທຳ ແລະ ແຫຼ່ງລາຍຮັບ, ການຄໍ້າປະກັນດ້ານສະບຽງອາຫານ ແລະອື່ນໆ.

 ໃນໄລຍະ 50 ປີ ບໍລິສັດບົວລະພາມີແຜນການນຳໃຊ້ແຮງງານທ້ອງຖິ່ນປະມານ 8.501 ຄົນຕໍ່ປີ ຄິດເປັນມູນຄ່າການຈ້າງງານປະມານ 461 ລ້ານກວ່າໂດລາ ຫຼືປະ ມານ 7.687 ໂດລາຕໍ່ ເຮັກຕານອກນັ້ນການສະໜອງເນື້ອທີ່ໃຫ້ທຳການຜະລິດພືດກະສິກຳອາຍຸສັ້ນ, ປະຊາຊົນສາມາດຜະລິດເຂົ້າໄດ້ເຖິງ 6.863 ໂຕນຕໍ່ປີ ມູນຄ່າປະມານ 4 ລ້ານກວ່າໂດລາຕໍ່ປີ ຫຼືສາມາດສະໜອງເຂົ້າໃຫ້ກຸ້ມກິນໃນທ້ອງຖິ່ນໄດ້ປະມານ27.511 ຄົນຕໍ່ປີ.

  ນອກນີ້ບໍລິສັດຍັງມີພັນທະຕ້ອງໄດ້ປູກໄມ້ວິກໃສ່ພື້ນທີ່ປູກໄມ້ຂອງໂຄງການ 60 ພັນເຮັກຕາ ພາຍຫຼັງສິ້ນສຸດສັນຍາສຳປະທານບໍລິສັດຈະຮັກສາໄມ້ທີ່ປູກດັ່ງກ່າວຕື່ມອີກເປັນເວລາປະມານ 7 ປີ ຈຶ່ງມອບຄືນໃຫ້ລັດຖະບານເພື່ອສືບຕໍ່ຄຸ້ມຄອງຊຶ່ງປ່າໄມ້ນັ້ນຈະກາຍເປັນເສດຖະກິດທີ່ສາມາດສ້າງຜົນປະໂຫຍດໃຫ້ແກ່ລັດຖະບານໄດ້ 69,18 ລ້ານໂດລາ.

แชร์