ກະຊວງ ຖວທ ປັບປຸງການຈັດຕັ້ງໃໝ່

  ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ໄດ້ປະກາດປັບປຸງການຈັດຕັ້ງໃຫ້ພະນັກງານອອກພັກການ-ຮັບອຸດໜູນບຳນານ, ແຕ່ງຕັ້ງຕຳແໜ່ງບໍລິຫານປະເພດ 2, ຍົກຍ້າຍ, ຊັບຊ້ອນ ແລະແຕ່ງຕັ້ງຕຳແໜ່ງບໍລິຫານ ປະເພດ 3, ທັງນີ້ກໍເພື່ອຕອບສະໜອງ ແລະ ໃຫ້ສອດຄ່ອງຕາມຄວາມຮ້ອງຕ້ອງການຂອງໜ້າທີ່ວຽກງານໃນຂົງເຂດຖະແຫຼງຂ່າວ, ວັດທະນະທຳ ແລະທ່ອງທ່ຽວໃນປະຈຸບັນ.

  ພິທີປະກາດປັບປຸງການຈັດຕັ້ງຄັ້ງນີ້ຈັດຂຶ້ນໃນຕອນບ່າຍວັນທີ 7 ສິງຫາ 2020 ຢູ່ຫໍວັດທະນະທຳແຫ່ງຊາດພາຍໃຕ້ການເປັນປະທານຂອງທ່ານ ກິແກ້ວ ໄຂຄຳພິທູນ ລັດຖະ ມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວໂດຍມີບັນດາຮອງລັດຖະມົນຕີ,ຫົວໜ້າກົມ,ຮອງຫົວໜ້າກົມ, ພ້ອມດ້ວຍພະນັກງານ-ລັດຖະກອນອ້ອມຂ້າງທີ່ກ່ຽວຂ້ອງເຂົ້າຮ່ວມ.

 ໃນການປະກາດຄັ້ງນີ້ຜູ້ທີ່ໄດ້ຮັບອະນຸມັດອອກພັກການ-ຮັບອຸດໜູນບຳນານອີງຕາມດຳລັດຂອງນາຍົກລັດຖະມົນຕີລວມມີ: ທ່ານ ບຸນເລື່ອນ ບຸບຜາ ຫົວໜ້າກົມຮ່ວມມືສາກົນ, ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ, ທ່ານ ຄຳພວງ ອິນທະວົງສີ ຫົວໜ້າກົມສິລະປະການສະແດງ, ທ່ານ ສູນມະນີວົງ ຫົວໜ້າກົມໂຄ ສະນາການທ່ອງທ່ຽວ, ທ່ານ ວິທູນ ສູນດາລາ ຫົວໜ້າກົມຮູບເງົາ, ທ່ານ ດວງຈິດ ສະຫວັດບຸນມີ ຫົວໜ້າບັນນາທິການໜັງສືພິມປະຊາຊົນ, ທ່ານ ວິໄລທອງ ສີຊາ ນົນ ຫົວໜ້າສະຖາບັນສື່ມວນຊົນ, ວັດທະນະທຳ ແລະທ່ອງທ່ຽວ, ທ່ານ ໄມ່ສິງ ຈັນບຸດດີ ຫົວໜ້າສະຖານບັນວິຈິດສິນແຫ່ງຊາດ, ທ່ານ ສູນທອນ ຄັນທະວົງ ຜູ້ອຳ ນວຍການໃຫຍ່ສຳນັກຂ່າວສານປະເທດລາວ ແລະທ່ານ ຕ່ວນ ມ່ວນຈັນ ຫົວໜ້າອຳນວຍການໂຮງຮຽນສິລະປະແຫ່ງຊາດ, ພ້ອມກັນນັ້ນລັດຖະມົນຕີກະຊວງ ຖວທ ໄດ້ອອກຂໍ້ຕົກລົງອະນຸມັດໃຫ້ທ່ານ ບຸນມາ ເພັດສາວົງ ຫົວໜ້າກົມຄຸ້ມຄອງການທ່ອງທ່ຽວອອກພັກການ-ຮັບອຸດໜູນບຳນານ, ຂະນະດຽວກັນ, ນາຍົກລັດຖະມົນຕີກໍໄດ້ອອກດຳລັດວ່າດ້ວຍການແຕ່ງຕັ້ງ ທ່ານ ວັນໄຊ ຕະວິນຍານ ເປັນຫົວໜ້າບັນນາທິການໃຫຍ່ໜັງສືພິມປະຊາຊົນ, ທ່ານ ສົມສະຫວາດ ພົງສາ ເປັນຫົວໜ້າກົມສື່ມວນ ຊົນ, ທ່ານ ຄຳເພົ້າ ວັນນະວົງ ເປັນຫົວໜ້າກົມຮູບເງົາ, ທ່ານ ນາງ ດາລານີ ພົມມະວົງສາເປັນຫົວໜ້າກົມຄຸ້ມຄອງການທ່ອງທ່ຽວ, ທ່ານ ຄຳສຸກ ແກ້ວວົງຊາຍ ເປັນຜູ້ອຳນວຍການສະຖາບັນວິຈິດສິນແຫ່ງຊາດ ແລະທ່ານ ຄຳເຜີຍ ພິລາພາ ເປັນຜູ້ອຳນວຍການໃຫຍ່ສຳນັກຂ່າວສານປະເທດລາວ.

  ພ້ອມກັນນັ້ນ, ລັດຖະມົນຕີກະຊວງ ຖວທ ໄດ້ອອກຂໍ້ຕົກລົງແຕ່ງຕັ້ງທ່ານ ບົວໄລ ພານຸວົງ ຮອງຫົວໜ້າຫ້ອງການເປັນຜູ້ວ່າການຫົວໜ້າຫ້ອງການ, ທ່ານ ຄຳພັນ ພົນທອງສີ ຜູ້ອຳນວຍການຫໍວັດ ທະນະທຳແຫ່ງຊາດເປັນຜູ້ວ່າການຫົວ ໜ້າກົມສິລະປະການສະແດງ, ທ່ານ ຄົມດວງຈັນທາ ຮອງຫົວໜ້າກົມຮ່ວມມືສາກົນເປັນຜູ້ວ່າການຫົວໜ້າກົມໂຄສະນາການທ່ອງທ່ຽວ, ທ່ານ ຄຳຫຼ້າ ຍອຍສາຄຳ ຮອງຫົວໜ້າສະຖາບັນສື່ມວນຊົນ, ວັດທະນະທຳ ແລະທ່ອງທ່ຽວເປັນຜູ້ວ່າການຫົວໜ້າສະຖາບັນສື່ມວນຊົນ, ວັດທະນະທຳ ແລະທ່ອງທ່ຽວ, ທ່ານ ນາງວັນສີ ຈະເລີນສຸກ ຫົວໜ້າກອງ ລະຄອນຕຸກກະຕາແຫ່ງຊາດເປັນຮອງຫົວໜ້າກົມສີລະປະການສະແດງ ແລະ ທ່ານ ວຽງພອນ ສຸກຂະວົງ ຫົວໜ້າພະແນກຄຸ້ມຄອງປ້າຍ ແລະສວນສາທາລະນະສັງກັດກົມວັດທະນະທຳມະຫາຊົນເປັນຜູ້ອຳນວຍການໂຮງຮຽນສິລະປະແຫ່ງຊາດ.

   ໂອກາດດັ່ງກ່າວ, ທ່ານ ກິແກ້ວ ໄຂຄຳພິທູນ ກ່າວວ່າ: ມື້ນີ້ເປັນມື້ໜຶ່ງທີ່ມີຄວາມໝາຍສຳຄັນສຳລັບກະຊວງ ຖວທ ທີ່ໄດ້ພ້ອມກັນຈັດຕັ້ງພິທີເພື່ອປັບປຸງການຈັດຕັ້ງ ແລະກົງຈັກການຈັດຕັ້ງເພື່ອຍົກລະດັບຄວາມສາມາດໃນການຈັດຕັ້ງປະຕິບັດໜ້າທີ່ການເມືອງທີ່ພັກ-ລັດມອບໝາຍໃຫ້ໄດ້ຮັບໝາກຜົນຍິ່ງໆຂຶ້ນ, ພ້ອມກັນນັ້ນກໍໄດ້ສະ ແດງຄວາມຊົມເຊີຍບັນດາສະຫາຍທີ່ໄດ້ຮັບອະນຸມັດອອກພັກການ-ຮັບອຸດໜູນບຳນານທີ່ມີຜົນງານ ແລະໄດ້ອຸທິດເຫື່ອແຮງ ແລະສະຕິປັນຍາເຂົ້າໃນການປະຕິບັດໜ້າທີ່ວຽກງານໃນການພັດທະນາປະເທດຊາດຕະຫອດຫຼາຍປີທີ່ຜ່ານມາ.

  ພ້ອມກັນນັ້ນ, ກໍໄດ້ສະແດງຄວາມຊົມເຊີຍ ແລະຍິນຕໍ່ຜູ້ທີ່ໄດ້ຮັບໜ້າທີ່ໃໝ່ເພື່ອສືບຕໍ່ພາລະກິດປະຕິວັດ ແລະສືບຕໍ່ນຳພາໜ້າທີ່ວຽກງານໃຫ້ສຳເລັດໜ້າທີ່ການເມືອງແນໃສ່ປະກອບສ່ວນສຳຄັນເຂົ້າໃນພາລະກິດຂອງພັກ-ລັດ ໃຫ້ບັນລຸເປົ້າໝາຍ.

______________

ໜັງສືພິມເສດຖະກິດ-ສັງຄົມ

แชร์