ກະຊວງແຮງງານ ມອບເຄື່ອງເກືອບ 3 ຕື້ກີບ ຊ່ວຍປະຊາຊົນຖືກນໍ້າຖ້ວມຢູ່ໄຊຍະ

  ວັນທີ 6 ສິງຫາ 2020 ທີ່ພະແນກແຮງງານ ແລະສະຫວັດດີການສັງຄົມ ແຂວງໄຊຍະບູລີ ໄດ້ຕ້ອນຮັບທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະທີ່ມາຢ້ຽມຢາມ ແລະເຄື່ອນໄຫວເຮັດວຽກຢູ່ແຂວງໄຊຍະບູລີ, ໂດຍການຕ້ອນຮັບຂອງທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ,ມີຫົວໜ້າ, ຮອງຫົວໜ້າພະແນກ, ຫົວໜ້າ, ຮອງຫົວໜ້າຂະແໜງຕະຫຼອດຮອດພະນັກງານພາຍໃນພະແນກ ຮສສ ຕ້ອນຮັບຢ່າງອົບອຸ່ນ.
  ທ່ານ ນາງ ແພງຈັນ ແກ້ວມະນີວົງ ຫົວໜ້າພະແນກແຮງງານ ແລະສະຫວັດດີການສັງຄົມແຂວງໄຊຍະບູລີໄດ້ລາຍງານຜົນກະທົບເບື້ອງຕົ້ນຈາກໄພນໍ້າຖ້ວມໃນວັນທີ 2-3 ສິງຫາ 2020 ໂດຍໄດ້ຮັບຜົນກະທົບຈາກພາຍຸຊິນລາກູໄດ້ເຮັດໃຫ້ມີຝົນຕົກຕິດຕໍ່ກັນຫຼາຍຊົ່ວໂມງຈຶ່ງເຮັດໃຫ້ແມ່ນໍ້າສາຍຫຼັກ ແລະສາຂາແມ່ນໍ້າຫຼາຍສາຍຍຶ່ງຂຶ້ນ ເກີດມີນໍ້າເຂົ້າຖ້ວມຂັງ ແລະຖ້ວມຊຸໃນເຂດທີ່ຢູ່ອາໄສ, ຊັບສິນ ແລະພື້ນທີ່ທໍາການຜະລິດ, ເສັ້ນທາງ ແລະຂົວ.
 ຜ່ານການເກັບກໍາຂໍ້ມູນໃນເບື້ອງຕົ້ນເຫັນວ່າ: ມີຜົນເສຍຫາຍຢູ່ 8 ເມືອງ, ມີ 64 ບ້ານ, ມີ 2.629 ຄອບຄົວ, ຈໍານວນພົນ 8.761 ຄົນ, ຍິງ 4.161 ຄົນ ລວມມູນຄ່າເສຍຫາຍ 26,5 ຕື້ກີບ ໃນນີ້ເມືອງແກ່ນທ້າວຂົວຂາດ 2 ຈຸດມູນຄ່າເສຍຫາຍ 495 ລ້ານກີບ; ເມືອງໄຊສະຖານດິນເຈື່ອນຖົມເສັ້ນທາງ, ທາງເຈື່ອນ 17 ຈຸດ ລວມມູນຄ່າເສຍຫາຍ 5,5 ຕື້ກີບ, ນໍ້າຖ້ວມນາ 2 ບ້ານ, ມີ 20 ຄອບຄົວ ມູນຄ່າເສຍຫາຍ 158,4 ລ້ານ ກີບ; ເມືອງຄອບ 10 ບ້ານ, ມີ141 ຄອບຄົວ,ມີຈໍານວນ 216 ຄົນ, ຍິງ 104 ຄົນ ເນື້ອທີ່ເສຍຫາຍ 34,40 ເຮັກຕາ ຄ່າເສຍຫາຍ 312 ລ້ານກີບ; ເມືອງພຽງ ນໍ້າຖ້ວມນາ 18 ບ້ານ, ມີ 581 ຄອບຄົວ, ມີຈໍານວນ 3.569 ຄົນ, ຍິງ 1.537 ຄົນ ເນື້ອທີ່ນໍ້າຖ້ວມ 325,41 ເຮັກຕາ, ເນື້ອທີ່ເສຍຫາຍ 186,14 ເຮັກຕາ ຄ່າເສຍຫາຍ 2,5 ຕື້ກີບ;
  ເມືອງທົ່ງມີໄຊ ມີ 10 ບ້ານ, ມີ 189 ຄອບຄົວ, ມີຈໍານວນ 931 ຄົນ, ຍິງ 470 ຄົນ ລວມມູນຄ່າເສຍຫາຍ 990 ລ້ານກີບ; ເມືອງເງິນ ມີ 3 ບ້ານ, ມີ 52 ຄອບຄົວ, ມີຈໍານວນ 260 ຄົນ, ຍິງ 125 ຄົນ ລວມມູນຄ່າເສຍຫາຍ 47,5 ລ້ານກີບ; ເມືອງບໍ່ແຕນ ມີ 11 ບ້ານ, ມີ 757 ຄອບຄົວ, ມີຈໍານວນ 3.785 ຄົນ, ຍິງ 1.925 ຄົນ ລວມມູນຄ່າເສຍຫາຍ 4,19 ຕື້ກີບ; ເມືອງໄຊຍະບູລີ ມີ 30 ບ້ານ, ມີ 889 ຄອບຄົວ ມີເຮືອນທີ່ໄດ້ຮັບຄວາມເສຍຫາຍຢ່າງໜັກ 11 ຫຼັງ, ມີເນື້ອ ທີ່ທໍາການຜະລິດເສຍຫາຍ 187,34 ເຮັກຕາ, ມີໜອງປາ ແລະໜອງກົບຖືກນໍ້າຖ້ວມ 42 ໜອງ ໃນນັ້ນມີປາຈໍານວນ 92 ລ້ານໂຕ, ກົບ 6.750 ໂຕ, ມີສັດລ້ຽງຕາຍໄຫຼນໍ້າ 4 ໂຕ (ງົວ, ໝູ) ແລະສັດປີກ 4 ແສນກວ່າໂຕ, ຊົນລະປະທານ 3 ແຫ່ງ,ເສັ້ນທາງ 6 ເສັ້ນ,ຕ້ານເຈື່ອນ 1 ແຫ່ງ ລວມມູນຄ່າເສຍຫາຍທັງໝົດ 12,4 ຕື້ກີບ ສ່ວນຂໍ້ມູນຜົນເສຍຫາຍລະອຽດພາກສ່ວນກ່ຽວຂ້ອງກໍາລັງລົງເກັບກໍາ ແລະຈະໄດ້ລາຍງານໃຫ້ຊາບພາຍຫຼັງ.
  ໃນໂອກາດນີ້ທ່ານ ຄໍາແພງ ໄຊສົມແພງ ພ້ອມດ້ວຍຄະນະກໍ່ໄດ້ມອບເຄື່ອງຊ່ວຍເຫຼືອໃຫ້ແກ່ປະຊາຊົນທີ່ປະສົບໄພພິບັດເພື່ອມອບຕໍ່ໃຫ້ປະຊາຊົນທີ່ໄດ້ຮັບຜົນກະທົບເຊິ່ງປະກອບມີ: ເຂົ້າສານ, ເຄື່ອງນຸ່ງຮົ່ມ, ເຄື່ອງໃຊ້ຄົວເຮືອນ ແລະເຕັ້ນລວມມູນຄ່າທັງໝົດ 2,8 ຕື້ກວ່າກີບ ຊຶ່ງຕາງໜ້າກ່າວຮັບໂດຍ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ.

___________

ຂ່າວ: ມະໄລວັນ 

ຮູບພາບ: ໜັງສືພິມເສດຖະກິດ-ສັງຄົມ

แชร์