ສາລະວັນ ກຽມສ້າງຕັ້ງສະມາຄົມນັກທຸລະກິດໜຸ່ມ

 ສາລະວັນກຽມສ້າງຕັ້ງສະມາຄົມນັກທຸລະກິດໜຸ່ມຂອງແຂວງທັງນີ້ກໍເພື່ອເປັນການຊຸກຍູ້ຜູ້ປະກອບການທຸກສາຂາວິຊາຊີບໃຫ້ມີຄວາມເຂັ້ມແຂງ, ສ້າງຊາວໜຸ່ມໃຫ້ກາຍ ເປັນຜູ້ປະກອບການໃໝ່ ແລະໄດ້ມີການແລກປ່ຽນບົດຮຽນກ່ຽວກັບການດຳເນີນທຸລະກິດເຊິ່ງກັນ ແລະກັນ.

ເພື່ອເຮັດໃຫ້ການສ້າງຕັ້ງໄດ້ເກີດຂຶ້ນໄວເມື່ອບໍ່ດົນຜ່ານມານີ້ທີ່ຫ້ອງການຊາວໜຸ່ມແຂວງໄດ້ຈັດກອງປະຊຸມຄົ້ນຄວ້າ, ຂົນຂວາຍກຽມສ້າງຕັ້ງສະມາຄົມນັກທຸລະກິດໜຸ່ມ, ໂດຍໃຫ້ກຽດເຂົ້າຮ່ວມຂອງທ່ານ ແສງດາວ ແກ້ວຂາວມະນີ ຫົວໜ້າກົມກວດກາ ສຊປລ, ມີທ່ານ ຈັນເພັງ ສາຍທຳມະວົງ ເລຂາຊາວໜຸ່ມແຂວງສາລະວັນ ແລະທ່ານ ອາລາວອນ ວົງສັນຕິ ຮອງປະທານນັກທຸລະກິດໜຸ່ມແຫ່ງຊາດ, ພ້ອມດ້ວຍບັນດາບໍລິສັດ, ຜູ້ປະກອບການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

 ທ່ານ ດົນຕຣີ ຫຼວງໄຊທຳ ຫົວໜ້າຂົນ ຂວາຍນັກທຸລະກິດໜຸ່ມແຂວງສາລະວັນໄດ້ລາຍງານກ່ຽວກັບການເຕົ້າໂຮມເອົານັກທຸລະກິດໃນແຕ່ລະທ້ອງຖິ່ນ,ແຕ່ລະເມືອງໃນໄລຍະຜ່ານມາ, ຊຶ່ງສາມາດເຕົ້າໂຮມບັນດານັກທຸລະກິດ, ຜູ້ປະກອບການທົ່ວແຂວງສາລະວັນຈຳນວນ 21 ທ່ານຄື: ເມືອງສາລະວັນ 17 ທ່ານ, ເລົ່າງາມ 3 ທ່ານ ແລະເມືອງຄົງເຊໂດນ 1 ທ່ານ ແລະໄດ້ມີການເຄື່ອນໄຫວຖອດຖອນບົດຮຽນຫຼາຍຄັ້ງທັງພາຍໃນ ແລະຕ່າງປະເທດ, ແຕ່ການຈັດຕັ້ງເຄື່ອນໄຫວວຽກງານດັ່ງກ່າວຍັງບໍ່ທັນເປັນປົກກະຕິ, ບໍ່ຕໍ່ເນື່ອງ,ເນື່ອງຈາກບັນດານັກທຸລະກິດຍັງບໍ່ທັນເຂົ້າໃຈຢ່າງເລີກເຊິ່ງຕໍ່ກັບພາລະບົດບາດ, ຄວາມສຳຄັນ ແລະຜົນໄດ້ຮັບຕໍ່ກັບວຽກງານດັ່ງກ່າວ, ຊຶ່ງຍັງເປັນບັນຫາຫຼັກ, ເປັນຂໍ້ຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂ ແລະສ້າງຄວາມຮັບຮູ້ເຂົ້າໃຈໃຫ້ກັບນັກທຸລະກິດຢ່າງເລີກເຊິ່ງຕື່ມອີກ.

 ໂອກາດດຽວກັນນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງກ່ຽວກັບພາລະບົດບາດ ແລະຄວາມສຳຄັນວຽກດັ່ງກ່າວເປັນຕົ້ນ: ແມ່ນເພື່ອຊຸກຍູ້ສົ່ງເສີມຜູ້ປະກອບການທຸກສາຂາອາຊີບໃຫ້ມີຄວາມເຂັ້ມແຂງ, ສ້າງຊາວໜຸ່ມໃຫ້ກາຍເປັນຜູ້ປະກອບການໃໝ່, ເປັນຜູ້ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກນັກທຸລະກິດໜຸ່ມ ແລະມະຕິການຈັດຕັ້ງເຄື່ອນໄຫວຂອງສະມາຄົມນັກທຸລະກິດໜຸ່ມຊຶ່ງມີທັງໝົດ 6 ໝວດ, 18 ມາດຕາ.

  ຈາກນັ້ນ, ຜູ້ເຂົ້າຮ່ວມກໍ່ຍັງໄດ້ປະກອບຄຳຄິດເຫັນຕໍ່ກັບການຈັດຕັ້ງປະຕິບັດວຽກງານດັ່ງກ່າວເປັນຕົ້ນ: ຮູບແບບການເຄື່ອນໄຫວ, ແບບແຜນວິທີເຮັດວຽກ, ຂອບເຂດສິດ ແລະໜ້າທີ່, ການຈັດຕັ້ງ ແລະອື່ນໆ, ເພື່ອແນໃສ່ເຮັດໃຫ້ການເຄື່ອນໄຫວວຽກງານດັ່ງກ່າວໄດ້ຮັບການສ້າງຕັ້ງຂຶ້ນ ແລະຈັດຕັ້ງປະຕິບັດຢ່າງເປັນຮູບປະທຳ, ຊຶ່ງໄດ້ມີການເຕົ້າໂຮມ, ຂົນຂວາຍມາແລ້ວຫຼາຍຄັ້ງໃນໄລຍະຜ່ານມາແຕ່ຍັງບໍ່ທັນສາມາດປະຕິບັດໄດ້ດີເທົ່າທີ່ຄວນ.

--------------

ຂ່າວ: ວິໄລວອນ ສິດທິໄຊ

ຮູບພາບ: ໜັງສືພິມເສດຖະກິດ-ສັງຄົມ

แชร์