ກະເບື້ອງກາສິງເນັ້ນຄຸນນະພາບເປັນຫຼັກເພື່ອມັດໃຈຜູ້ຊົມໃຊ້

   ໂຮງງານຜະລິດກະເບື້ອງກາສິງເມືອງນໍ້າບາກ ເປັນໜຶ່ງໂຮງງານທີ່ຜະລິດສົ່ງອອກກະເບື້ອງຫຼາຍຊະນິດຊຶ່ງກໍາລັງການຜະລິດມືໜຶ່ງບໍ່ຕໍ່າກວ່າ 3.000 ແຜ່ນທີ່ສະ ໜອງໃຫ້ກັບພາຍໃນເມືອງນໍ້າບາກກໍຄືພາຍໃນແຂວງຫຼວງພະບາງ ແລະຕ່າງແຂວງກາຍເປັນທີ່ຍອມຮັບຂອງລູກຄ້າຜູ້ຊົມໃຊ້ຢ່າງກວ້າງຂວາງຍ້ອນທາງໂຮງງານເນັ້ນຄຸນ ນະພາບເປັນຫຼັກເພື່ອລູກຄ້າຜູ້ຊົມໃຊ້ທີ່ແທ້ຈິງ.

   ທ່ານ ສິງຄໍາ ຈັນທະວົງ ຜູ້ອໍານວຍການໂຮງງານກະເບື້ອງກາສິງເມືອງນໍ້າບາກໄດ້ໃຫ້ສໍາພາດຕໍ່ສື່ຂ່າວເສດຖະກິດ-ສັງຄົມປະຈຳແຂວງຫຼວງພະບາງວ່າງບໍ່ດົນນີ້ວ່າ: ໂຮງງານຜະລິດກະເບື້ອງກາສິງສ້າງຂຶ້ນໃນປີ 2012 ຕັ້ງຢູ່ບ້ານຊາງ ເມືອງນໍ້າບາກວັດຖຸດິບນໍ້າເຂົ້າໃນການຜະລິດແມ່ນເອົາຢູ່ພາຍໃນ ແລະນໍາເຂົ້າຈາກຕ່າງປະເທດກໍາລັງການຜະລິດມືໜຶ່ງບໍ່ຕໍ່າກວ່າ 3.000 ແຜ່ນ, ຜະລິດຕະພັນຂອງໂຮງງານທີ່ຜະລິດປະຈຸບັນມີກະເບື້ອງ 2 ຮ່ອງ ແລະ 4 ຮ່ອງນ້ອຍ ໂດຍການຜະລິດແມ່ນໄດ້ເນັ້ນຄຸນນະພາບເປັນຫຼັກ, ບໍ່ເອົາປະລິມານທີ່ບໍ່ໄດ້ຄຸນນະພາບໄປໃຫ້ລູກຄ້າຊົມໃຊ້, ສໍາລັບກະເບື້ອງແມ່ນໄດ້ສະໜອງໃຫ້ພໍ່ແມ່ປະຊາຊົນທີ່ຢູ່ພາຍໃນເມືອງນໍ້າບາກກໍຄືພາຍໃນ ແຂວງຫຼວງພະບາງ ແລະ ຕ່າງແຂວງມີ ແຂວງອຸດົມໄຊ, ຫຼວງນໍ້າທາ, ຜົ້ງສາລີ, ຫົວພັນ ແລະ ແຂວງໄຊຍະບູລີ ແລະ ໃນຊ່ວງນີ້ເປັນໄລຍະຊ່ວງການແຜ່ລະບາດໂຄວິດ-19 ທາງໂຮງງານແມ່ນໄດ້ຮັບຜົນກະທົບພໍສົມຄວນເຊັ່ນວ່າການນໍາເຂົ້າວັດຖຸດິບຈາກໄລຍະຜ່ານມາເຫັນວ່າມີຄ່າສີ້ນເປືອງເພີ່ມຂຶ້ນ ແລະຜູ້ຊົມໃຊ້ກໍຄືລູກຄ້າມີກໍາລັງຊື້ຫຼຸດລົງເປັນຈໍານວນຫຼາຍຍ້ອນເຫດເນື່ອງມາຈາກການແຜ່ລະບາດຂອງພະຍາດໂຄວິດ-19.

  ສໍາລັບແຜນຕໍ່ໜ້າທາງໂຮງງານຜະລິດກະເບື້ອງກາສິງກໍຍັງຈະເນັ້ນການຜະລິດທີ່ໄດ້ຄຸນນະພາບມາດຕະຖານລະດັບສາກົນແລະຈະເພີ່ມເຄື່ອງພົ່ນສີກະເບື້ອງເຂົ້າມາອີກຕື່ມເພື່ອໃຫ້ລູກຄ້າໄດ້ມີທາງເລືອກໃໝ່ຊົມໃຊ້ຕາມຄວາມມັກຂອງລູກຄ້າ, ພ້ອມນີ້ທ່ານ ສິງຄໍາ ຈັນທະວົງ ຍັງສະແດງຄວາມພູມໃຈທີ່ໄດ້ເປັນສ່ວນໜຶ່ງໃນການປະ ກອບສ່ວນຊ່ວຍປະຊາຊົນອ້ອມຂ້າງໄດ້ມີວຽກເຮັດງານທໍານັບຫຼາຍ 100 ຄົນ.

_____________

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์