54 ບ້ານໃນ 8 ເມືອງ ແຂວງໄຊຍະຮັບຜົນກະທົບຈາກນໍ້າຖ້ວມ

  ປະຊາຊົນ 8 ເມືອງຄື: ເມືອງໄຊຍະບູລີ, ບໍ່ແຕນ, ເມືອງເງິນ, ເມືອງຄອບ, ເມືອງພຽງ, ແກ່ນທ້າວ, ທົ່ງມີໄຊ ແລະເມືອງໄຊສະຖານ ແຂວງໄຊຍະບູລີ ຈຳນວນ 54 ບ້ານ, 1.740 ຄອບຄົວ ກວມເອົາ 8.000 ກວ່າຄົນໄດ້ຮັບຜົນກະທົບໜັກສົມຄວນຈາກສະພາບນໍ້າຖ້ວມຊຸຍ້ອນພາຍຸຊິນລາກູພັດຜ່ານລະຫວ່າງວັນທີ 1 ຫາ 4 ສິງ ຫາ ນີ້ລວມມູນຄ່າເສຍຫາຍເບື້ອງຕົ້ນຫຼາຍກວ່າ2,8 ຕື້ກີບ.

  ອີງຕາມການລາຍງານຂ່າວຂອງວິທະຍຸກະຈາຍສຽງແຫ່ງຊາດໂດຍຂໍ້ມູນທ່ານ ນາງ ບຸນພັກ ອິນທະປັນຍາ, ຮອງເຈົ້າແຂວງໆໄຊຍະບູລີທັງເປັນຫົວໜ້າຄະນະກຳມະ ການປ້ອງກັນໄພພິບັດຂັ້ນແຂວງໃຫ້ສຳພາດວ່າ: ເມືອງທີ່ໄດ້ຮັບຜົນກະທົບໜັກແມ່ນເມືອງພຽງມີເນື້ອທີ່ນາຖືກນໍ້າຖ້ວມຫຼາຍກວ່າ 300 ເຮັກຕາ, ເມືອງບໍ່ແຕນມີເສັ້ນ ທາງຂາດຫຼາຍຈຸດ,ຂົວອູ່ 2 ແຫ່ງບໍ່ສາມາດນໍາໃຊ້ໄດ້,ສະເພາະເທສະບານແຂວງຄືເມືອງໄຊຍະບູລີແມ່ນປະຊາຊົນທີ່ອາໄສຢູ່ລຽບແຄມແມ່ນໍ້າຮຸ່ງກວມເອົາ 12 ບ້ານ, ມາ ຮອດປະຈຸບັນຫຼາຍເມືອງລະດັບນໍ້າໄດ້ຫຼຸດລົງ ແລະ ເລີ່ມເຂົ້າສູ່ສະພາບປົກກະຕິແລ້ວຕໍ່ສະພາບການດັ່ງກ່າວອົງການປົກຄອງແຂວງ ແລະ ເມືອງພວມລະດົມການຊ່ວຍ ເຫຼືອປະຊາຊົນທີ່ໄດ້ຮັບຜົນກະທົບໃນເບື້ອງຕົ້ນຕາມເງື່ອນໄຂຕົວຈິງ.

   ຮອງເຈົ້າແຂວງໆໄຊຍະບູລີທັງເປັນຫົວໜ້າຄະນະກຳມະການປ້ອງກັນໄພພິບັດຂັ້ນແຂວງໃຫ້ຮູ້ຕື່ມວ່າ: ປະຈຸບັນອົງການປົກຄອງແຂວງໄດ້ແຕ່ງຕັ້ງຄະນະກຳມະການປ້ອງກັນໄພພິບັດຂັ້ນແຂວງ, ຂັ້ນເມືອງລົງຕິດຕາມສະພາບການຢູ່ບັນດາເມືອງຢ່າງໃກ້ຊິດເພື່ອປະເມີນຜົນເກັບກຳສະພາບຄວາມເສຍຫາຍລະອຽດ ແລະແກ້ໄຂສຸກເສີນບ່ອນທີ່ມີຄວາມຈຳເປັນຕ້ອງການຊ່ວຍເຫຼືອຮີບດ່ວນເປັນຕົ້ນການສະໜອງເຂົ້າສານ, ເຄື່ອງໃຊ້ຄົວເຮືອນສຳລັບຄອບຄົວທີ່ເກັບມ້ຽນບໍ່ ທັນພ້ອມທັງເຕືອນປະຊາຊົນເພີ່ມຄວາມ ລະມັດລະວັງຕື່ມໂດຍສະເພາະເຮືອນທີ່ອາໄສຢູ່ແຄມນໍ້າເພື່ອຫຼຸດຜ່ອນເສຍຫາຍໃຫ້ໜ້ອຍລົງ.

__________

ໜັງສືພິມເສດຖະກິດ-ສັງຄົມ

แชร์