ໜອງສະເດັດເຈົ້າສຸພານຸວົງ ພວມຈະກາຍເປັນແຫຼ່ງທ່ອງທ່ຽວໜ້າສົນໃຈອີກແຫ່ງຂອງແຂວງຊຽງຂວາງ

  ໜອງນໍ້າ ຫຼືສະເດັດເຈົ້າສຸພານຸວົງກຳລັງຈະກາຍເປັນສະຖານທີ່ທ່ອງທ່ຽວທີ່ໜ້າສົນໃຈອີກແຫ່ງຂອງແຂວງຊຽງຂວາງກໍຄື ສປປ ລາວ ພາຍຫຼັງທີ່ບໍລິສັດ ກຸ່ມຄຳໄພຊະ ນະຈຳກັດຜູ້ດຽວຈະພັດທະນາໜອງນໍ້າແຫ່ງນີ້ຈາກເມື່ອກ່ອນເປັນໜອງນໍ້າທຳມະຊາດໃຫ້ກາຍເປັນສະຖານທີ່ທ່ອງທ່ຽວສວຍງາມໃນຮູບແບບທ່ອງທ່ຽວທຳມະຊາດຕິດພັນກັບປະຫວັດສາດອັນຈະກາຍເປັນໃບໜ້າຕາໃໝ່ໃຫ້ກັບແຂວງໄດ້ມີສະຖານທີ່ຮອງຮັບນັກທ່ອງທ່ຽວ, ເປັນສູນລວມຄົນຮັກມັກໃນການຍ່າງອອກກຳລັງກາຍເພື່ອສຸຂະ ພາບ,ບໍລິການຮ້ານອາຫານ,ທີ່ປະຊຸມ, ຂີ່ງສະລິງ, ຕູບ, ຊົມວິວເບິ່ງຄວາມມະຫັດສະຈັນຂອງທຳມະຊາດແລະສູດດົມອາກາດບໍລິສຸດທີ່ສຸດຊົມຄວາມສວຍງາມຂອງເທສະບານເມືອງ ແລະອື່ນໆອີກຫຼາຍຢ່າງທີ່ໜ້າສົນໃຈ.

  ແນວຄວາມຄິດການພັດທະນາໜອງສະເດັດເຈົ້າສຸພານຸວົງຊຶ່ງຕັ້ງຢູ່ບ້ານໂພນສະຫວັນ ເມືອງແປກ ແຂວງຊຽງຂວາງ ໄດ້ມີຄວາມເຫັນດີເປັນເອກະພາບກັນຂອງການນຳແຂວງຊຽນຂວາງໃຫ້ບໍລິສັດເຂົ້າໄປລົງທຶນ ແລະມີການອະນຸຍາດຢ່າງເປັນທາງການໃນວັນທີ 24 ມັງກອນ 2020 ເປັນຕົ້ນມາໃນຮູບແແບບເຊົ່າ-ສຳປະທານເປັນເວ ລາ 30 ປີ ໂດຍການພັດທະນາໂຄງການໄດ້ແບ່ງອອກເປັນ 5 ໄລຍະຊຶ່ງໄລຍະທຳອິດແມ່ນສຳຫຼວດກວດກາປັກຫຼັກໝາຍຂອບເຂດເນື້ອທີ່ເຊົ່າສຳປະທານຈຳນວນ 123 ເຮັກຕາ, ກໍ່ສ້າງເສັ້ນທາງພາຍໃນຂອບເຂດເນື້ອທີ່ເຊົ່າ-ສຳປະທານ, ບຸກເບີກປັບໜ້າດິນສະຖານທີ່ຈັດງານແຂ່ງຂັນຊ່ວງເຮືອ ແລະ ບຸນປະເພນີຕ່າງໆ, ບຸກເບີກປັບໜ້າ ດິນບ່ອນຈອດລົດ ແລະປັບປຸງໜອງ.

  ສ່ວນໄລຍະທີ 2 ປັບປຸງ ແລະຂະຫຍາຍປູກຕົ້ນໄມ້ໃຫ່ຍໃນຂອບເຂດສະຫງວນປ່າໄມ້, ປັບປຸງໜອງສໍາລັບລ້ຽງປາທໍາມະຊາດ, ບຸກເບີກປັບໜ້າດິນກໍ່ສ້າງສວນດອກໄມ້, ບຸກເບີກປັບໜ້າດິນກໍ່ສ້າງສວນສະໜຸກສໍາລັບເດັກນ້ອຍ, ບຸກເບີກປັບໜ້າດິນກໍ່ສ້າງບ່ອນຫຼິ້ນກີລາບ່ອນຍ່າງກຳລັງກາຍກາງແຈ້ງ, ດື່ມກາເຟ, ຈຸດຊົມວິວໜອງນໍ້າທີ່ມີອາກາດບໍລິສຸດ, ບຸກເບີກປັບປຸງໜ້າດິນປູກຕົ້ນໄມ້ ແລະຕົ້ນດອກໄມ້ທ້ອງຖີ່ນຕື່ມຂອບເຂດນັ່ງກິນເຂົ້າແບບທໍາມະຊາດ ແລະກາງເຕັ້ນນອນກາງຄືນ; ໄລຍະທີ 3 ບຸກເບີກປັບໜ້າດິນກໍ່ສ້າງຮ້ານອາຫານຫ້ອງຈັດງານລ້ຽງສ້າງສັນ ແລະ ຫ້ອງຈັດງານດອງ, ບຸກເບີກປັບໜ້າດິນກໍ່ສ້າງຮ້ານອາຫານ ແລະ ຈຸດຊົມວີວ; ໄລຍະທີ 4 ບຸກເບີກປັບໜ້າດິນກໍ່ສ້າງຂອບເຂດເຮືອນຈໍາລອງຂອງບັນດາຊົນເຜົ່າຕ່າງໆໃນ ແຂວງຊຽງຂວາງ ແລະໄລຍະທີ 5 ບຸກ ເບີກປັບໜ້າດິນກໍ່ສ້າງຂອບເຂດເຮືອນພັກ ແລະຣີສອດ.

  ທ່ານ ບຸນຕົ້ນ ຈັນທະພອນ ເຈົ້າແຂວງຊຽງຂວາງກ່າວເມື່ອບໍ່ດົນມານີ້ວ່າ: ໜອງສະເດັດເຈົ້າສຸພານຸວົງເປັນໜອງໜຶ່ງທີ່ມີຄວາມສວຍງານຕາມທຳມະຊາດມາແຕ່ດຶກ ດຳບັນແຕ່ຍັງບໍ່ທັນໄດ້ມີການພັດທະນາປັບປຸງໃຫ້ເປັນແຫຼ່ງທ່ອງທ່ຽວທີ່ໜ້າສົນໃຈຂອງສັງຄົມຜ່ານມາແມ່ນມີແລ້ວ 5 ບໍລິສັດທັງໃນ ແລະຕ່າງປະເທດທີ່ຢາກພັດທະນາແຕ່ກໍບໍ່ເກີດສະນັ້ນບໍລິສັດກຸ່ມຄຳໄພຊະນະຈຳກັດຜູ້ດຽວແມ່ນເປັນບໍລິສັດທີ 6 ແລະເປັນບໍລິສັດຄົນລາວສາຍເລືອດຊາວຊຽງຂວາງ 100% ຊຶ່ງເຂົ້າມາເພື່ອພັດທະນາປັບປຸງບໍລິເວນໜອງນໍ້າສະເດັດເຈົ້າສຸພານຸວົງໃຫ້ກາຍເປັນສວນອຸດທິຍານສະເດັດສຸພານຸວົງ ແລະ ສະຖານທີ່ທ່ອງທ່ຽວຄົບວົງຈອນແບບທຳມະຊາດຕິດພັນກັບປະຫວັດ ສາດທີ່ໜ້າປະທັບໃຈໂດຍສະເພາະແມ່ນຄົນພາຍໃນ ແລະຕ່າງປະເທດຈະໄດ້ມາສຳຜັດທ່ຽວຊົມເພື່ອໃຫ້ເປັນບ່ອນໜຶ່ງທີ່ສ້າງໃຫ້ບຸກຄະລາກອນກໍ່ຄືຄົນພາຍໃນແຂວງຊຽງຂວາງໄດ້ປະກອບອາຊີບ, ມີວຽກເຮັດງານທຳເພື່ອແກ້ໄຂຊີວິດການເປັນຢູ່ພົ້ນອອກຈາກຄວາມທຸກຍາກເທື່ອລະກ້າວ.

  ດ້ານທ່ານ ຄຳໄພ ສົມຊະນະ ກ່າວວ່າ: ຄືດັ່ງທີ່ພວກເຮົາຮັບຮູ້ນຳກັນແລ້ວວ່າຊຽງຂວາງກໍເປັນອີກໜຶ່ງແຂວງວິລະຊົນໃນຂະບວນການຕໍ່ສູ້ກູ້ຊາດ ແລະມີຮ່ອງຮອຍສຳ ຄັນທາງປະຫວັດສາດຂອງຊາດນັບຈາກປະເທດຊາດໄດ້ຮັບການປົດປ່ອຍຊຽງຂວາງກໍໄດ້ທ່າແຮງຫຼາຍດ້ານໃນການພັດທະນາໂດຍສະເພາະແມ່ນດ້ານການທ່ອງທ່ຽວດັ່ງ ນັ້ນບໍລິສັດຂອງຂ້າພະເຈົ້າຈຶ່ງມີແນວຄວາມຄິດພັດທະນາໜອງນໍ້າ (ໜອງສະເດັດສຸພານຸວົງ) ຊຶ່ງເປັນໜອງທີ່ມີຮ່ອງຮອຍທາງປະຫວັດສາດໃຫ້ກາຍເປັນສະຖານທີ່ທ່ອງທ່ຽວທີ່ໜ້າສົນໃຈອີກແຫ່ງຂອງແຂວງຊຽງຂວງກໍຄືຂອງ ສປປ ລາວ ທີ່ຢູ່ກາງເທດສະບານແຂວງໃຫ້ກາຍເປັນສູນກາງຮອງຮັບການທ່ອງທ່ຽວພາຍໃນແຂວງ ແລະບັນດາແຂວງໃກ້ຄຽງ.

  ທັງນີ້ທ່ານຍັງກ່າວສະແດງຄວາມພາກພູມໃຈ ແລະຊາບຊຶ້ງເປັນຢ່າງຍິ່ງທີ່ຕົ້ນເອງເກີດຈາກຄອບຄົວທຸກຍາກຊາວໄຮ່ຊາວສວນຢູ່ເຂດຫ່າງໄກສອກຫຼີກຫຼັງເຕີບໃຫຍ່ມີຊີວິດ ແລະດຳເນີນທຸລະກິດໄດ້ຮັບໝາກຜົນຄວາມສຳເລັດກໍໄດ້ກັບຄືນມາພັດທະນາແຂວງຊຽງຂວາງຊຶ່ງເປັນຖິ່ນຖານບ້ານເກີດຂອງຂ້າພະເຈົ້າເອງ ແລະມີຄວາມເຕັມ ປ່ຽມເພື່ອໃຫ້ໂຄງການໄດ້ຮັບການພັດທະນາແຕ່ຕ້ອງໄດ້ໃຊ້ເວລາ.

  ແນວໃດກໍດີໂຄງການນີ້ສ້າງຫາກສຳເລັດແມ່ນຈະສ້າງຜົນປະໂຫຍດຢ່າງມະຫາສານໃຫ້ກັບຊາວແຂວງຊຽງຂວາງຈະໄດ້ມີສະຖານທີ່ທ່ອງທ່ຽວທີ່ໄດ້ມາດຕະຖານເປັນການສ້າງວຽກເຮັດງານທຳຈຳນວນຫຼາຍໃຫ້ແກ່ປະຊາຊົນຊຶ່ງໂຄງການຈະເກີດຂຶ້ນຊ້າ ຫຼືໄວຖ້າອາໄສພຽງແຕ່ບໍລິສັດຝ່າຍດຽວກໍຄົງເປັນໄປໄດ້ຍາກເບື້ອງລັດ ແລະປະຊາ ຊົນກໍຕ້ອງໃຫ້ຄວາມສຳຄັນພ້ອມໃຫ້ການຮ່ວມໄມ້ຮ່ວມມືຮ່ວມກັນໂດຍສະເພາະດ້ານການປະສານງານກັບທຸກພາກສ່ວນຂອງເບື້ອງລັດ ແລະປະຊາຊົນໃກ້ຄຽງກໍຕ້ອງເອື້ອອຳນວຍຄວາມສະດວກໃນດ້ານຕ່າງໆ.

  ຂະນະທີ່ຄວາມຄືບໜ້າຂອງໂຄງການດັ່ງກ່າວຮອດເວລານີ້ແມ່ນໄດ້ມີການບຸກເບີກພື້ນທີ່ໄປແລ້ວໂດຍສະເພາະເສັ້ນທາງອ້ອມໜອງຈະພັດທະນາເປັນທາງປູຢາງ, ປູກຕົ້ນ ໄມ້ມີຄ່າ ແລະມຸງຄຸນອ້ອມໜອງຈຳນວນ 111.111 ຕົ້ນ ແລະປ່ອຍປາອີກແລ້ວຈຳນວນ 1.111 ໂຕ, ຊຶ່ງແຜນໃນຕໍ່ໜ້າບໍລິສັດຈະທະຍອຍພັດທະນາເປັນໄປແຕ່ໄລຍະທີ່ທາງໂຄງການໄດ້ວາງເອົາໄວ້ໃນເບື້ອງຕົ້ນ.

แชร์