ຈຳປາສັກ ສຸມໃສ່ 8 ມາດຕະການເພື່ອໃຫ້ລາຍຮັບໄດ້ 1,13 ພັນຕື້ກີບ

    ປີນີ້ພະແນກການເງິນ ແຂວງຈໍາປາສັກ ແມ່ນຈະສຸມໃສ່ 8 ມາດຕະການເພື່ອເຮັດໃຫ້ການເກັບລາຍຮັບງົບປະມານໝົດປີນີ້ໃຫ້ໄດ້ 1.132 ພັນຕື້ກີບ ຫຼື ເທົ່າກັບ 72,68% ຂອງແຜນການປີໃນນີ້ ລາຍຮັບພູດສູນກາງໃຫ້ໄດ້ 737,70 ຕື້ກີບ ແລະອີກ 394,44 ຕື້ກີບ ແມ່ນລາຍຮັບພູດແຂວງ.

 ອີງຕາມຂໍ້ມູນຈາກພະແນກການເງິນແຂວງຈໍາປາສັກໃຫ້ ຮູ້ວ່າ:ປີ 2020 ພະແນກການເງິນແຂວງຈໍາປາສັກໄດ້ຮັບຕົວເລກແຜນການຈັດເກັບລາຍຮັບງົບປະມານຈາກກະຊວງການເງິນຈໍານວນ 1.557 ຕື້ກີບ (ສູນກາງ 742,20 ຕື້ກີບ ແລະພູດທ້ອງຖິ່ນ 815,51 ຕື້ກີບ), ຜ່ານການຈັດຕັ້ງປະຕິບັດໃນ 6 ເດືອນຕົ້ນປີສາມາດຈັດເກັບໄດ້ 607,91 ຕື້ກີບ ທຽບໃສ່ໄລຍະດຽວຂອງປີຜ່ານມາຫຼຸດລົງ13,27%, ທຽບໃສ່ແຜນປີໄດ້ 39,20% ໃນນີ້ລາຍຮັບພູດສູນກາງປະຕິບັດໄດ້ 370,47 ຕື້ກີບ ເທົ່າກັບ 49,86% ແລະລາຍຮັບພູດຂອງແຂວງປະຕິບັດໄດ້ 237,44 ຕື້ກີບ ເທົ່າກັບ 29,11%; ສ່ວນລາຍຈ່າຍງົບປະມານ (ລວມສຶກສາ ແລະສາທາ) ປະຕິບັດໄດ້ 230,24 ຕື້ກີບ, ທຽບໃສ່ໄລຍະດຽວຫຼຸດລົງ 31,32%, ທຽບໃສ່ແຜນປີປະຕິບັດໄດ້ 30,49%.

  ສໍາລັບທິດທາງແຜນການໝົດປີພະແນກການເງິນແຂວງຈໍາປາສັກຈະສູ້ຊົນເກັບລາຍຮັບໃຫ້ໄດ້ 1.132 ຕື້ກີບ ເທົ່າກັບ72,68% ຂອງແຜນການປີໃນນີ້ລາຍຮັບພູດສູນກາງ737,70 ຕື້ກີບ ເທົ່າກັບ 99,39% ແລະລາຍຮັບພູດຂອງແຂວງ 394,44 ຕື້ກີບ ເທົ່າກັບ 48,37%; ສ່ວນລາຍຈ່າຍແມ່ນ 752,60 ຕື້ກີບ ເທົ່າກັບ 98,29% ຂອງແຜນການປີ.

ເພື່ອບັນລຸແຜນການດັ່ງກ່າວພະແນກການເງິນແຂວງຈໍາປາສັກຈະສຸມໃສ່ 8 ມາດຕະການໃນການຈັດຕັ້ງປະຕິບັດຄື: 1) ເພີ່ມທະວີ ແລະເອົາໃຈໃສ່ຕໍ່ການສຶກສາອົບຮົມການເມືອງແນວຄິດໃຫ້ແກ່ພະນັກງານລັດຖະກອນໃຫ້ມີຄວາມເຂັ້ມແຂງ, ຮັບຮູ້ແລະເຂົ້າໃຈຕໍ່ແນວທາງການເມືອງຂອງພັກ, ມີຄວາມຊື່ສັດຕໍ່ໜ້າທີ່ໆໄດ້ຮັບການມອບ ໝາຍ; 2) ຈັດຕັ້ງປະຕິບັດຄໍາແນະນໍາວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2020 ເລກທີ 02/ຈຂ.ຈສ ລົງວັນທີ20 ກຸມພາ 2020; 3) ຄຸ້ມຄອງການຈັດເກັບລາຍຮັບເຂົ້າສູ່ລະບົບທັນສະໄໝເຂົ້າໃສ່ການກວດກາ ແລະ ຈັດເກັບຕົວຈິງເປັນຕົ້ນດໍາເນີນການເກັບຄ່າທໍານຽມທາງໂດຍຜ່ານລະບົບທະນາຄານ ແລະຜ່ານມືຖືໃຫ້ທົ່ວເຖິງຄົບຖ້ວນກວ່າເກົ່າພ້ອມນັ້ນກໍໃຫ້ຂະຫຍາຍໄປສູ່ອາກອນປະເພດອື່ນໆເປັນຕົ້ນອາກອນພາສີທີ່ດິນ, ອາກອນລາຍໄດ້, ອາກອນຄ່າເຊົ່າ ແລະອາ ກອນມອບເໝົາໃຫ້ສາມາດຈັດຕັ້ງປະຕິບັດໄດ້.

 ສ່ວນມາດຕະການທີ 4) ແມ່ນກວດກາການແຈ້ງພັນທະອາກອນຂອງແຕ່ລະຫົວໜ່ວຍທຸລະກິດໂດຍສະເພາະອາກອນກໍາໄລຂອງງວດ IV ປີຜ່ານມາ, ການແຈ້ງມອບອາກອນ (ອາກອນມູນຄ່າເພີ່ມ, ອາກອນລາຍໄດ້) ເພື່ອເລັ່ງທວງໃຫ້ຫົວໜ່ວຍທີ່ຄ້າຕາມລະບົບ Taxris ມອບເຂົ້າງົບປະມານໃຫ້ຄົບຖ້ວນ; 5) ຈັດຕັ້ງຄະນະກໍາມະການຂັ້ນແຂວງເລັ່ງທວງໜີ້ຕ້ອງຮັບຈາກຜົນການກວດສອບ ແລະໜີ້ທີ່ໄດ້ມີການໄລ່ລຽງ ແລະເຮັດບົດບັນທຶກຮ່ວມກັນແລ້ວ; 6) ເລັ່ງທວງ ໜີ້ສິນຄ່າຫັນກໍາມະສິດນໍາໃຊ້ດິນ, ເຮືອນ, ພາຫະນະ ແລະຄ່າເຊົ່າຊັບສິນຂອງລັດ; 7) ສືບຕໍ່ເລັ່ງທວງໜີ້ສິນໃນລະບົບຄັງເງິນໂດຍສົມທົບກັບກະຊວງການເງິນ ແລະພາກສ່ວນທີ່ກ່ຽວຂ້ອງພ້ອມກັນນ້ນ ກໍຕ້ອງໄດ້ຈໍາກັດການປ່ອຍໜີ້ໃນລະບົບຄັງເງິນທີ່ບໍ່ມີແຜນຊໍາລະໃນປີ; 8) ສືບຕໍ່ຕິດຕາມກວດກາການຈັດຕັ້ງປະຕິບັດໃນການຈັດເກັບລາຍຮັບງົບປະມານ ແລະການຄຸ້ມຄອງລາຍຈ່າຍງົບປະມານໃນຂະແໜງການເງິນ ແລະການມອບພັນທະຂອງບັນດາຫົວໜ່ວຍທຸລະກິດ.

___________

ຂ່າວ: ແປ, ຮູບພາບ: ໜັງສືພິມເສດຖະກິດ-ສັງຄົມ

แชร์