ອັດຕະປື ເປີດບັ້ນສອບເສັງຈົບຊັ້ນ ມ7 ລະບົບບຳລຸງ

 ວັນທີ 3 ສິງຫາ 2020 ສູນ ສນຂ (ການສຶກສານອກໂຮງຮຽນ) ແຂວງອັດຕະປື ໄດ້ມີພິທີເປີດບັ້ນການສອບເສັງຈົບຊັ້ນ ມ7 ລະບົບ ບຳລຸງສົກຮຽນ 2019-2020 ພາຍຫຼັງທີ່ໄດ້ສຳເລັດການຈັດຕັ້ງ ປະຕິບັດດຳເນີນການຮຽນ-ການ ສອນຈົບຕາມໂຄງການຫຼັກສູດທີ່ກະຊວງສຶກສາທິການ ແລະກີລາໄດ້ວາງອອກໂດຍພາຍໃຕ້ການເປັນປະທານຂອງທ່ານ ສົມໄຕ ຫີນເພັດສະດາວົງ ຮອງຫົວໜ້າພະແນກສຶກສາທິການ ແລະກີລາແຂວງ, ທ່ານ ອິນຖາ ຈັນທະວິໄຊ ຜູ້ອຳນວຍການສູນການສຶກສານອກໂຮງ ຮຽນຂອງແຂວງ, ທ່ານ ແກ້ວ ສົມສູນ ການສຶກສານອກໂຮງຮຽນພາກໃຕ້, ມີບັນດາຄູ-ອາຈານ ແລະນັກຮຽນເຂົ້າຮ່ວມ.

  ທ່ານ ໄພມະນີ ບຸນທະວີວົງ ຮອງຫົວໜ້າຂະແໜງການສຶກສານອກໂຮງຮຽນພະແນກສຶກສາ ແຂວງໃຫ້ຮູ້ວ່າ: ການສອບເສັງຈົບ ຊັ້ນມັດຖະຍົມສຶກສາບຳລຸງ ມ7 ສົກນີ້ແມ່ນໄດ້ປະຕິບັດຕາມແຜນການສຶກສາຂອງໂຮງຮຽນ, ຕາມມະຕິຕົກລົງເຫັນດີຂອງຂັ້ນເທິງພາຍຫຼັງທີ່ໄດ້ສຳເລັດການຈັດຕັ້ງປະຕິບັດຫຼັກສູດການຮຽນ-ການສອນໄລ ຍະ 8 ເດືອນ ໄດ້ສຳເລັດຕາມທີ່ຂັ້ນເທິງກຳນົດໃຫ້ ແລະສຳລັບການສອບເສັງຈົບຊັ້ນບຳລຸງມີນັກສອບເສັງເຂົ້າຮ່ວມສອບເສັງທັງໝົດ 24 ຄົນ, ຍິງ 4 ຄົນ, ສອບເສັງໃນ 4 ວິຊາຫຼັກຄື: ວິຊາພາສາລາວ-ວັນນະຄະດີ, ຄະນິດສາດ, ເຄມີສາດ ແລະວິຊາພູມສາດ.

  ທ່ານ ສົມໄຕ ຫິນເພັດສະດາວົງ  ຍັງໄດ້ຮຽກຮ້ອງບັນດາຄະນະກຳມະການ ແລະອະນຸກໍາມະການຄວບຄຸມຫ້ອງສອບ ແລະນ້ອງໆນັກສອບເສັງທຸກຄົນໃຫ້ມີຄວາມຮັບ ຜິດຊອບສູງຕໍ່ການປະຕິບັດສິດ ແລະ ໜ້າທີ່ຂອງໃຜລາວໃນການສອບເສັງຄັ້ງນີ້ຢ່າງເຂັ້ມງວດ, ເພື່ອໃຫ້ໄດ້ຜົນການສອບເສັງທີ່ໄດ້ຮັບມີຄວາມຖືກຕ້ອງ ແລະ ຊັດເຈນຕາມຄວາມເປັນຈິງ, ທັງນີ້ແນໃສ່ເພື່ອປັບປຸງແບບແຜນວິທີການຄຸ້ມຄອງ-ການບໍລິຫານການສຶກສາ, ພ້ອມທັງການຮຽນ-ການສອນຂອງຄູ-ອາຈານ ແລະນັກຮຽນຂອງສູນການສຶກສານອກໂຮງຮຽນແຫ່ງນີ້ໃຫ້ມີປະສິດທິພາບ ແລະໄດ້ຮັບຜົນສຳເລັດສູງຂຶ້ນກວ່າເກົ່າໃນສົກຮຽນຕໍ່ໄປ.

 

แชร์