ຫຼວງນໍ້າທາ ທຳລາຍຊີ້ນໝູນຳເຂົ້າຜິດກົດໝາຍ 5 ໂຕນກວ່າ

  ເຈົ້າໜ້າທີ່ສັດຕະວະແພດ, ເຈົ້າໜ້າທີ່ພາສີ, ອາຫານ ແລະຢາປະຈຳດ່ານສາກົນບໍ່ເຕ່ນ ແຂວງຫຼວງນໍ້າທາ ໄດ້ກວດສິນຄ້າຮ່ວມກັບນາງ ອານຸສອນ ຫຼ້າສຸກັນ ບໍລິສັດ ອາລິສາ ການຄ້າຂາອອກ-ຂາເຂົ້າຈຳກັດຢູ່ລົດໝາຍເລກທະບຽນ AJ 7811 (ລົດຈີນ) ຢູ່ສາງຄຽນຖ່າຍບໍລິສັດແອວເອັສ, ໂດຍປະຕິບັດຕາມແຈ້ງການຂອງກະຊວງກະສິກໍາ ແລະ ປ່າໄມ້ກ່ຽວກັບການສະກັດກັ້ນຫ້າມນໍາເຂົ້າໝູ ແລະ ຜະລິດຕະພັນໝູທຸກຊະນິດລວມທັງຜະລິດຕະພັນປຸງແຕ່ງເບື້ອງຕົ້ນຈາກ ສປ ຈີນ ແລະ ສສ ຫວຽດ ນາມເຂົ້າສູ່ ສປປ ລາວ ເລກທີ 0259 / ກປ, ລົງວັນທີ 21 ເດືອນມີນາ 2019,
  ຜ່ານການກວດກາຕົວຈິງແມ່ນພົບສິນຄ້າທີ່ຫ້າມນຳເຂົ້າຄື: ຊີ້ນໝູແຊ່ແຂງຈຳນວນ 195 ແກັດ ເທົ່າກັບ 4.875 ກິໂລ ແລະ ໄສ້ໝູ 23 ແກັດ, ເທົ່າກັບ 230 ກິ ໂລ ລວມທັງໝົດ 5.105 ກິໂລ ຊີ້ນໝູດັ່ງກ່າວແມ່ນນຳເຂົ້າມາແຕ່ ສປ ຈີນ ເພື່ອນຳໄປບໍລິໂພກໃນ ສປປ ລາວ, ສ່ວນຊີ້ນໝູດັ່ງກ່າວທາງເຈົ້າໜ້າທີ່ສັດຕະວະແພດ,
ເຈົ້າໜ້າທີ່ພາສີ, ອາຫານ ແລະຢາປະຈຳດ່ານສາກົນບໍ່ເຕ່ນໄດ້ຢຶດພ້ອມທັງເຮັດບົດບັນທຶກ ແລະໄດ້ສຶກສາອົບຮົມໃນຕໍ່ໜ້າບໍ່ໃຫ້ນຳເຂົ້າມາອີກຕື່ມ.
   ຈາກນັ້ນວັນທີ 29 ກໍລະກົດ 2020 ທີ່ສະໜາມຂີ້ເຫື້ຍອຂອງແຂວງຫຼວງນໍ້າທາໄດ້ຈັດພິທີທຳລາຍຊີ້ນໝູທີ່ຢຶດໄດ້ນຳແມ່ຄ້າທີ່ນຳເຂົ້າຈາກ ສປ ຈີນ, ເຂົ້າຮ່ວມຂອງທ່ານ ຄຳແພງ ພະນາວັນ ຫົວໜ້າຂະແໜງລ້ຽງສັດ ແລະການປະມົງ, ມີຄະນະຄຸ້ມຄອງດ່ານສາກົນບໍ່ເຕ່ນ ແລະເຈົ້າໜ້າທີ່ໆກ່ຽວຂ້ອງເຂົ້າຮ່ວມ.

__________

ຂ່າວ: ກິ່ນນາລົມ. ຮູບພາບ: ໜັງສືພິມເສດຖະກິດ-ສັງຄົມ

แชร์