2 ພາກສ່ວນຮ່ວມມືດ້ານເຕັກໂນໂລຊີຂໍ້ມູນຂ່າວສານ

  ສະມາຄົມການຄ້າໄອຊີທີລາວ (LICA) ແລະບໍລິສັດ ສະຕາ ໂທລະຄົມ (ຢູນີເທວ) ຮ່ວມລົງນາມບົດບັນທຶກຄວາມເຂົ້າໃຈທາງດ້ານເຕັກໂນໂລຊີຂໍ້ມູນຂ່າວສານ ແລະເສີມຂະຫຍາຍການຮ່ວມມືດໍາເນີນທຸລະກິດສະໜອງຜະລິດຕະພັນທາງດ້ານເຕັກໂນໂລຊີຂໍ້ມູນຂ່າວສານໃນການຫັນເປັນດີຈີຕ໋ອນເພື່ອຮັບໃຊ້ສັງຄົມ.

  ພິທີລົງນາມບົດບັນທຶກຄວາມເຂົ້າໃຈດັ່ງກ່າວໄດ້ຈັດຂຶ້ນໃນວັນທີ 31 ກໍລະກົດ 2020 ຢູ່ ບໍລິສັດ ສະຕາ ໂທລະຄົມ ຈຳກັດ ລະຫວ່າງທ່ານ ທະນົງສິນ ກັນລະຍາ ປະ ທານສະມາຄົມການຄ້າໄອຊີທີລາວ ແລະທ່ານ ບຸນມີ ມາລາວົງ ຮອງຜູ້ອຳນວຍການໃຫຍ່ສູນລູກຄ້າລະດັບບໍລິສັດຂອງບໍລິສັດ ສະຕາ ໂທລະຄົມ ຈຳກັດ,ໂດຍເຂົ້າຮ່ວມເປັນສັກຂີພິຍານມີ ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວພ້ອມດ້ວຍຄະນະຂອງພາກສ່ວນກ່ຽວຂ້ອງທັງສອງຝ່າຍ.

   ທ່ານ ທະນົງສິນ ກັນລະຍາ ປະທານສະມາຄົມການຄ້າໄອຊີທີລາວໃຫ້ຮູ້ວ່າ: ອີງໃສ່ຄວາມຕ້ອງການຕົວຈິງ ແລະທ່າແຮງໃນການຂະຫຍາຍບັນດາການສະໜອງບໍລິ ການທາງດ້ານເຕັກໂນໂລຊີຂໍ້ມູນຂ່າວສານຢູ່ລາວ ແລະອີງໃສ່ຄວາມຕ້ອງການ ແລະຄວາມສາມາດໃນການຈັດຕັ້ງຜັນຂະຫຍາຍໂຄງການ, ຜະລິດຕະພັນທາງດ້ານເຕັກໂນໂລຊີຂໍ້ມູນຂ່າວສານຂອງສະມາຄົມການຄ້າໄອຊີທີລາວ ແລະບໍລິສັດ ສະຕາ ໂທລະຄົມ, ໂດຍໄດ້ ແນ່ໃສ່ຈຸດປະສົງຂອງການຮ່ວມມືເພື່ອສະແດງເຖິງເຈດຈຳນົງ ແລະເງື່ອນໄຂ ລວມຂອງການຮ່ວນມື, ການຈັດຕັ້ງປະຕິບັດໂຄງການລະຫວ່າງສອງຝ່າຍໃຫ້ຖືກຕ້ອງຕາມລະບຽບກົດໝາຍ, ກຳນົດເວລາ ແລະ ມີປະສິດຕິຜົນ, ສ້າງຕັ້ງຂຶ້ນເພື່ອຜົນປະໂຫຍດສ່ວນລວມຂອງສອງຝ່າຍບົນພື້ນຖານຂອງການແບ່ງປັນຜົນກຳໄລ, ເພີ່ມທະວີການຮ່ວມມືລະຫວ່າງສອງຝ່າຍ, ສົ່ງເສີມທ່າແຮງຂອງກັນ ແລະ ກັນ ເພື່ອເປົ້າໝາຍລວມກໍ່ຄືການສະໜອງຜະລິດຕະພັນທາງດ້ານເຕັກໂນໂລຊີຂໍ້ມູນຂ່າວສານໃນການຫັນເປັນດີຈີຕ໋ອນເພື່ອຮັບໃຊ້ສັງຄົມ ແລະຕະຫຼາດລາວ.

____________

ຂ່າວ:  ແປ. ຮູບພາບ: ໜັງສືພິມເສດຖະກິດ-ສັງຄົມ

• 05/08/2020