ເຈົ້າແຂວງສະຫວັນນະເຂດ ລົງຊຸກຍູ້ການຜະລິດປະຊາຊົນ

  ທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດພ້ອມພະແນກການຂອງແຂວງມີ: ພະແນກກະສິກໍາ ແລະ ປ່າໄມ້ແຂວງ, ກອງບັນຊາການ ປກສ ແຂວງ, ພະແນກອຸດສາຫະກໍາ ແລະການຄ້າແຂວງ ແລະຫ້ອງວ່າການປົກຄອງແຂວງໄດ້ລົງເຄື່ອນໄຫວຊຸກຍູ້ການພັດທະນາເສດຖະກິດ-ສັງຄົມພາຍໃນເມືອງໄຊພູທອງໃນວັນທີ 31 ກໍລະກົດ 2020.
  ໂອກາດນີ້, ທ່ານເຈົ້າແຂວງໄດ້ໃຫ້ກຽດພົບປະໂອ້ລົມກັບການນໍາຂະແໜງການຕ່າງໆພາຍໃນເມືອງຢູ່ຫ້ອງວ່າການປົກຄອງເມືອງຊຶ່ງມີ ທ່ານ ຄໍາວິໄສ ຜຸຍຍະວົງ ເຈົ້າເມືອງໄຊພູທອງ ໄດ້ລາຍງານສະພາບການຕ່າງໆ ພາຍໃນເມືອງຊຶ່ງພາຍຫຼັງທີ່ມີການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງເຫັນໄດ້ວ່າໃນທົ່ວເມືອງໄຊພູທອງຍັງມີສະຖຽນລະພາບທາງດ້ານການເມືອງມີຄວາມສະຫງົບ ແລະຄວາມເປັນລະບຽບຮຽບຮ້ອຍ, ບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນສາມາດແກ້ໄຂໄດ້ເປັນສ່ວນໃຫຍ່, ດ້ານເສດຖະກິດມີການຂະຫຍາຍຕົວໃນລະດັບ 5,69% , ລວມຍອດຜະລິດຕະພັນພາຍໃນບັນລຸໄດ້ 814,05 ຕື້ກີບ, ສະເລ່ຍໃສ່ຫົວຄົນບັນລຸໄດ້ 15,4 ລ້ານກີບ, ເທົ່າກັບ 1.855 ໂດລາສະຫະລັດ/ຄົນ/ປີ ໃນນີ້ ກະສິກໍາ ແລະປ່າໄມ້ເພິ່ມຂຶ້ນ 5,35%, ກວມ 78,88% ຂອງ (ຈີດີພີ), ອຸດສາຫະກໍາ-ຫັດຖະກໍາເພີ່ມຂຶ້ນ 9,51%, ກວມ 13,62% ແລະ ບໍລິການເພີ່ມຂຶ້ນ 7,26%, ກວມເອົາ 7,50%.
 ໂອກາດດັ່ງກ່າວນີ້, ທ່ານ ສັນຕິພາບ ພົມວິຫານ ໃຫ້ທິດຊີ້ແນະຫຼາຍບັນຫາຕໍ່ການພັດທະນາພາຍໃນເມືອງໄຊພູທອງຕໍ່ກັບການຜະລິດກະສິກໍາເຫັນວ່າເມືອງໄຊພູທອງປັກດໍານາປີໄດ້ 62,3% ຂອງຈໍານວນເນື້ອທີ່ນາ 14.100 ກວ່າເຮັກຕາ ໃນນີ້ມີນາຢອດ 25%, ນາຫວ່ານ 15% ແລະນາດໍາກວ່າ 20% ເຫັນວ່າຫຼ້າຊ້າອາດ ຈະເປັນຍ້ອນຝົນຕົກບໍ່ຕໍ່ເນື່ອງເກີດສະພາບແຫ້ງແລ້ງບວກກັບດ້ວງງວງ, ພະຍາດເຫງົ້າເນົ່າ ແລະເປັນເພ້ຍໄພທໍາລາຍແຕ່ກໍ່ຕ້ອງໃຫ້ອໍານາດການປົກຄອງເມືອງສົມທົບກັບພາກສ່ວນກ່ຽວຂ້ອງ ແລະ ປະຊາຊົນແຕ່ລະທ້ອງຖິ່ນໄດ້ຫັນວິທີການຜະລິດແບບໃໝ່ເປັນຕົ້ນແມ່ນຕ້ອງຫາພືດທີ່ໃຊ້ນໍ້າໜ້ອຍໂດຍຊີ້ແນະໃຫ້ການນາໄດ້ລົງຊຸກຍູ້ປະ ຊາຊົນມາທໍາກາປູກພືດທາດແປ້ງຕ່າງໆ ຫຼາຍຂຶ້ນຊຶ່ງອາດຈະເປັນການແກ້ໄຂຕໍ່ກັບໄພແຫ້ງແລ້ງກໍ່ຄືໄພນໍ້າຖ້ວມ,ໃນເມື່ອຫາກການສະໜອງນໍ້າໃຫ້ການຜະລິດບໍພຽງພໍກໍ່ໃຫ້ຂະແໜງການກ່ຽວຂ້ອງສຸມໃສ່ພັດທະນາ ແລະສ້າງແຫຼ່ງນໍ້າເພື່ອເຮັດແນວໃດໃຫ້ເປັນການພິກໂອກາດສະໜອງພືດຜະລິດກະສິກໍາໃຫ້ໄດ້ຂາຍເປັນສິນຄ້າເຮັດໃຫ້ກາປູກ-ການລ້ຽງພາຍໃນເມືອງໄຊພູທອງໂດດເດັ່ນໃນຍາມເກີດວິກິດຄືໃນປີນີ້,ສ່ວນຂໍ້ສະເໜີຕ່າງໆທີ່ທາງເມືອງສະເໜີກໍ່ແມ່ນໃຫ້ຂະແໜງການກ່ຽວຂ້ອງໄດ້ໄປຄົ້ນຄວ້າຈັດຕັ້ງປະຕິບັດເປັນຕົ້ນແມ່ນການຂຶ້ນສໍາມະໂນຄົວ ແລະ ອອກບັດແມ່ນໃຫ້ ປກສ ແຂວງລົງສົມທົບກັບເມືອງໄດ້ຈັດຕັ້ງປະຕິບັດຢູ່ກັບທ້ອງຖິ່ນໂລດ, ແລະ ໃຫ້ມີການຄຸ້ມ ຄອງຂຶ້ນທະບຽນເລື່ອງເຮືອຈັກ, ການປັບປຸງອ່າງເກັບນໍ້າ, ການກໍ່ສ້າງຫົວງານ ແລະການກໍ່ສ້າງຕະຫຼາດຖາວອນທີ່ບໍລິເວນເດີ່ນພະທາດໂຜ່ນແຕ່ປາກົດວ່າມີມູນຄ່າລາ ຄາສູງທາງເມືອງກໍ່ບໍ່ສາມາດຮັບໄດ້ ແລະບັນຫາອື່ນໆ.

___________________________________________

แชร์