ຝົນຕົກໜັກຫຼາຍຊົ່ວໂມງ ເຮັດໃຫ້ນໍ້າຖ້ວມບ້ານເຮືອນປະຊາຊົນ

  ມື້ຜ່ານມາໄດ້ເກີດມີຝົນຕົກໜັກຫຼາຍຊົ່ວໂມງຕິດຕໍ່ກັນທັງເວັນ ແລະຄືນມາຈົນຮອດເວລາ 5:30 ໂມງ ຂອງວັນທີ 3 ສິງຫາ 2020 ໄດ້ເຮັດໃຫ້ແມ່ນໍ້າຍາງຊຶ່ງເປັນແມ່ນໍ້າສາຍຫຼັກຂອງເມືອງເງິນແຂວງໄຊຍະບູລີບວກກັບນໍ້າປ່າໄຫຼເຂົ້າຖ້ວມທົ່ງນາ ແລະຮົ້ວ-ສວນຂອງປະຊາຊົນເປັນຈໍານວນຫຼວງຫຼາຍ ແລະ ຖ້ວມບ້ານເຮືອນຂອງປະ ຊາຊົນເຂດບ້ານແກ້ວດອນຄູນ.

   ປະຈຸບັນເຈົ້າໜ້າທີ່ ແລະພາກສ່ວນທີ່ກ່ຽວຂ້ອງໂດຍສະເພາະແມ່ນຄະນະກໍາມະການຕ້ານ ແລະສະກັດກັ້ນໄພພິບັດຂອງເມືອງກໍາລັງເລ່ງໃຫ້ຄວາມຊ່ວຍເຫຼືອຂົນຍ້າຍເຄື່ອງຂອງ ແລະສັດລ້ຽງອອກຈາກເຂດດັ່ງກ່າວໄປໄວ້ໃນເຂດທີ່ປອດໄພສ່ວນມູນຄ່າການເສຍຫາຍຈະແຈ້ງໃຫ້ຊາບຕາມພາຍຫຼັງ.

  ກ່ອນໜ້ານີ້ກົມອຸຕຸນິຍົມ ແລະອຸທົກກະສາດກວງຊັບພະຍາກອນທໍາມະຊາດ ແລະສິ່ງແວດລ້ອມແຈ້ງໃຫ້ຮູ້ວ່າ: ໃນລະຫວ່າງວັນທີ 31 ກໍລະກົດ-1 ສິງຫາ 2020 ຈະມີຝົນຕົກລະດັບຄ່ອຍຫາປານກາງບໍລິເວນກວ້າງ ແລະຕົກໜັກຢູ່ບາງທ້ອງຖິ່ນແຂວງພາກເໜືອດ້ານຕາເວັ້ນອອກລົງຫາພາກກາງ ແລະພາກໃຕ້ເຊັ່ນ: ແຂວງຫົວພັນ, ຊຽງຂວາງ, ວຽງຈັນ, ໄຊສົມບູນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະອັດຕະປືໃນລະຫວ່າງວັນທີ 1-4 ສິງຫາຈະມີ ຝົນຕົກເປັນບາງບໍລິເວນກວ້າງພ້ອມມີຝົນລົມພັດແຮງໃນຂອງເຂດທົ່ວປະເທດ, ດັ່ງນັ້ນຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ ແລະອຳນາດການປົກຄອງທີ່ອາໄສຢູ່ຕາມລຽບແມ່ນໍ້າຍາງຊຶ່ງເປັນແມ່ນໍ້າສາຍຫຼັກຂອງເມືອງໃຫ້ມີສະຕິ ລະມັດລະວັງສະພາບລະດັບນໍ້າ ແລະໃຫ້ເກັບວັດຖຸສິ່ງຂອງພ້ອມສັດລ້ຽງໄປໄວ້ບ່ອນທີ່ປອດໄພ.

แชร์