ນາຍົກ ເນັ້ນຂະແໜງພາຍໃນເອົາໃຈໃສ່ຫຼາຍບັນຫາ

 ກອງປະຊຸມສະຫຼຸບການຈັດຕັ້ງປະຕິບັດວຽກງານຂະແໜງພາຍໃນ ແລະ ສະຫຼຸບການຈັດຕັ້ງປະຕິບັດວຽກງານ 3 ສ້າງ ປະຈໍາປີ 2018 ແລະທິດທາງແຜນ ການປະຈໍາປີ 2019 ໄດ້ປິດລົງໃນຕອນບ່າຍວັນທີ 13 ກຸມພາ 2019 ທີ່ຫໍປະຊຸມແຫ່ງຊາດໂດຍເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີ ທ່ານ ຄໍາໝັ້ນ ສູນວິເລີດ ລັດຖະມົນຕີກະຊວງພາຍໃນມີບັນດາຮອງລັດຖະມົນຕີ, ບັນດາຮອງເຈົ້າແຂວງ, ຮອງເຈົ້າຄອງນະຄອນຫຼວງ, ເຈົ້າເມືອງ-ຮອງເຈົ້າເມືອງເຈົ້ານະຄອນ-ຮອງເຈົ້ານະຄອນ ແລະຫົວໜ້າພະແນກພາຍໃນແຂວງ-ນະຄອນຫຼວງທົ່ວປະເທດເຂົ້າຮ່ວມ.

  ໃນໂອກາດທີ່ເຂົ້າຮ່ວມກອງປະຊຸມດັ່ງກ່າວ ທ່ານ ທອງລຸນ ສີສຸລິດ ນາຍົກ ລັດຖະມົນຕີ ໄດ້ເນັ້ນໜັກຂະແໜງພາຍໃນບາງບັນຫາເປັນຕົ້ນເອົາໃຈໃສ່ປັບປຸງ ຄືນກົງຈັກການຈັດຕັ້ງໃຫ້ມີຄວາມເຂັ້ມແຂງໂດຍປັບປຸງກົງຈັກອໍານາດລັດແຕ່ລະຂັ້ນໃຫ້ມີຄວາມເໝາະສົມຄົບຊຸດ, ເຂັ້ມແຂງ ແລະມີຄຸນນະພາບເພື່ອເຮັດ ໃຫ້ການຄຸ້ມຄອງລັດ, ຄຸ້ມຄອງສັງຄົມມີປະສິດທິພາບ, ກົງຈັກການຈັດຕັ້ງຢູ່ສູນກາງ ແລະທ້ອງຖິ່ນໂດຍສະເພາະຢູ່ຂັ້ນເມືອງ, ພ້ອມທັງສະເໜີໃຫ້ສ້າງຄຳຂວັນ “ກະທັດຮັດໜັກແໜ້ນເຂັ້ມແຂງມີປະສິດທິຜົນບວກໃສ່ຮັບໃຊ້ປະຊາຊົນຢ່າງແທ້ຈິງ”, ທີ່ສຳຄັນແມ່ນກຳນົດຕຳແໜ່ງງານໃຫ້ຈະແຈ້ງ, ຊຶ່ງຕ້ອງໄດ້ເຮັດການ ວິເຄາະງານ ຫຼື ໜ້າວຽກຢູ່ແຕ່ລະກົງຈັກຢ່າງລະອຽດ ແລະຊັບຊ້ອນເຂົ້າເປັນກຸ່ມວຽກໃຫຍ່ໂດຍນຳໃຊ້ເຕັກໂນໂລຊີເຂົ້າມາຊ່ວຍທັງຈະເຮັດໃຫ້ວຽກວ່ອງໄວ ແລະໂປ່ງໃສຫຼາຍຂຶ້ນ; ສຳລັບຂົງເຂດວຽກງານລັດຖະກອນປະຈຸບັນເຫັນວ່າຈຳນວນລັດຖະກອນມີທັງໝົດ 1,8 ແສນຄົນ, ຄົ້ນຄວ້າຫຼຸດຜ່ອນຈໍານວນພົນລັດຖະກອນໃຫ້ໄດ້ຕາມສັດສ່ວນທີ່ເໝາະສົມໂດຍເນັ້ນດ້ານຄຸນນະພາບ ແລະພັດທະນາໃຫ້ລັດຖະກອນລາວມີຄຸນນະພາບສູງຂຶ້ນ, ຕິດຕາມ ແລະຊຸກຍູ້ການບັນຈຸລັດ ຖະກອນໃໝ່ປະຈໍາປີ 2019 ຈໍານວນ 1.500 ຄົນ ທີ່ໄດ້ອະນຸມັດໄປແລ້ວ; ກວດກາຄືນຈໍານວນພົນແລະປະຫວັດຂອງລັດຖະກອນ, ສືບຕໍ່ຊຸກຍູ້ການນຳໃຊ້ ລະບົບການກວດຜ່ານບັນຊີຈຳນວນພົນເຊື່ອມຕໍ່ກັບບັນຊີເງິນເດືອນໃຫ້ເປັນບັນຊີດຽວ ແລະອອກບັດພະນັກງານ-ລັດ ຖະກອນໃຫ້ສໍາເລັດໃນທົ່ວປະເທດ; ສື ບຕໍ່ຄົ້ນຄວ້າສ້າງ ແລະພັດທະນາຫຼັດສູດຝຶກອົບຮົມ-ຍົກລະດັບໃຫ້ແກ່ລັດຖະກອນ; ກວດກາບັນດາຫົວໜ່ວຍວິຊາການທີ່ມີລາຍຮັບດ້ານວິຊາການຢູ່ບັນດາກະຊວງ-ອົງການ ແລະທ້ອງຖິ່ນເພື່ອຄົ້ນຄວ້າຊອກຫາວິທີການ ແລະ ເງື່ອນໄຂໃນການຫັນຫົວໜ່ວຍວິຊາການເຫຼົ່ານີ້ອອກຈາກລະບົບລັດຖະກອນໄປສູ່ລະບົບພະລາກອນເທື່ອລະກ້າວ.

  ທ່ານນາຍົກລັດຖະມົນຕີກ່າວຕື່ມອີກວ່າ: ສຳລັບວຽກງານ 3 ສ້າງໃຫ້ຄົ້ນຄວ້າຕີລາຄາມາດຖານເງື່ອນໄຂວຽກງານສາມສ້າງຂອງແຕ່ລະຂະແໜງການທີ່ໄດ້ ຮັບຮອງແລ້ວດ້ວຍການປະເມີນຄຶືນການປະຕິບັດຕາມມາດຖານເງື່ອນໄຂດັ່ງກ່າວຢູ່ທ້ອງຖິ່ນໄດ້ຮັບການຈັດຕັ້ງປະຕິບັດຕາມມາດຖານເງື່ອນໄຂນັ້ນແນວໃດ ແລະ ມີຜົນສໍາເລັດດ້ານໃດແດ່, ຕິດຕາມກວດກາການຈັດຕັ້ງປະຕິບັດຢ່າງເປັນປົກກະຕິເພື່ອໃຫ້ທ້ອງຖິ່ນ (ບັນດາແຂວງ ແລະ ເມືອງ) ຕ້ອງປະຕິບັດຕາມຂອບເຂດສິດຄວາມຮັບຜິດຊອບທີ່ໄດ້ຮັບ ແລະຢູ່ພາຍໃຕ້ລະບຽບ-ກົດໝາຍ; ພ້ອມກັນນັ້ນວຽກປົກຄອງທ້ອງຖິ່ນໃຫ້ເອົາໃຈໃສ່ກໍາໃຫ້ໄດ້ຈໍານວນປະຊາກອນ, ພົນລະເມືອງຂອງ ສປປ ລາວ, ຂຶ້ນບັນຊີ ຫຼື ລົງທະບຽນພົນລະເມືອງຢ່າງມີວິທະຍາສາດ; ເອົາໃຈໃສ່ວຽກງານຈົດທະບຽນ ແລະ ອອກໃບຢັ້ງຢືນການເກີດ, ກາ ນໃຫ້ສັນຊາດ ແລະຂໍປະສັນຊາດ, ຄົ້ນຄວ້າແກ້ໄຂບັນຫາການສ້າງຄອບຄົວທີ່ບໍ່ຖືກຕ້ອງຂອງພົນລະເມືອງລາວຢູ່ຕາມບໍລິເວນຊາຍແດນຮ່ວມກັບຂະແໜງກາ ນກ່ຽວຂ້ອງ ແລະທ້ອງຖິ່ນ, ສືບຕໍ່ພັດທະນາຖານຂໍ້ມູນພົນລະເມືອງເພື່ອເປັນເງື່ອນໄຂສະດວກໃນການຄຸ້ມຄອງປະຊາກອນພົນລະເມືອງ, ຊົນເຜົ່າ, ສາສະໜາ ແລະອົງການຈັດຕັ້ງທາງສັງຄົມ, ພ້ອມທັງເພື່ອບັນລຸເປົ້າໝາຍການຈົດທະບຽນການເກີດຂອງເດັກ ໃຫ້ໄດ້ 70% ໃນປີ 2024 ຕາມທີ່ໄດ້ຮັບຮອງກັບອົງ ການຈັດຕັ້ງສາກົນ; ສ່ວນວຽກງານຊົນເຜົ່າເພີ່ມທະວີເອົາໃຈໃສ່ວຽກງານຄຸ້ມຄອງເຜົ່າເຮັດໃຫ້ບັນດາເຜົ່າໄດ້ຮັບການພັດທະນາທີ່ເທົ່າທຽມກັນ, ເພີ່ມທະວີເອົາໃຈໃສ່ຄຸ້ມຄອງການເຜີຍແຜ່ສາສະໜາ, ໃນການສ້າງແຜນທີ່ແມ່ນເນັ້ນໃຫ້ມີຄວາມຖືກຕ້ອງຊັດເຈນສອດຄ່ອງກັບສະພາບຄວາມເປັນຈິງ.

ນສພ-ເສດຖະກິດ-ສັງຄົມ

แชร์