ໄຊບູລີ ເປີດບັ້ນສອບເສັງຈົບຊັ້ນມັດທະຍົມຕອນປາຍ

 ໃນວັນທີ 29 ກໍລະກົດ 2020 ທີ່ສູນສອບເສັງໂຮງຮຽນ ມສ ສາລະພູມ ເມືອງໄຊບູລີ ແຂວງ ສະຫວັນນະເຂດ ໄດ້ເປີດບັ້ນສອບເສັງຈົບຊັ້ນມັດທະຍົມຕອນປາຍ (ມ7) ປະຈໍາສົກປີ 2019 -2020 ຂຶ້ນຢ່າງເປັນທາງການ ໂດຍພາຍ ໃຕ້ການໃຫ້ກຽດເຂົ້າຮ່ວມເປັນປະທານຂອງທ່ານ ສຸລິວົງ ສີວໍລະວົງ ຮອງເຈົ້າເມືອງໄຊບູລີ, ທ່ານ ອານຸສອນ ສຸດທິວົງ ຫົວໜ້າຂະແໜງສະຖິຕິພະແນກສຶກສາທິການ ແລະກີລາແຂວງສະຫວັນນະເຂດ, ທ່ານ ພູມສະຫວັນ ຈັນທະວົງ ຫົວໜ້າຫ້ອງການສຶກສາທິການ ແລະກີລາເມືອງ, ມີບັນດາຄະນະກໍາມະການຮັບຜິດຊອບສູນສອບເສັງ, ຄູ-ອາຈານ, ອໍານາດການປົກຄອງ ບ້ານ, ແຂກຖືກເຊີນຕະຫຼອດຮອດນັກສອບເສັງພາຍໃນສູນສອບເສັງ ເຂົ້າຮ່ວມ.

 ທ່ານ ຄໍາຮຸ່ງ ໄຊຍະລຸນ ຫົວໜ້າໜ່ວຍງານກ່ອນໄວຮຽນຫ້ອງ ການສຶກສາທິການ ແລະກີລາເມືອງ ໃຫ້ຮູ້ວ່າ: ໃນການສອບເສັງຈົບຊັ້ນມັດທະຍົມຕອນປາຍ (ມ7) ສົກປີ 2019-2020 ນີ້, ແມ່ນໄດ້ກໍາ ນົດເອົາໂຮງຮຽນ ມສ ສາລະພູມເປັນສູນສອບເສັງ, ຊຶ່ງມີນັກສອບ ເສັງທັງໝົດ 531 ຄົນ, ຍິງ 299 ຄົນ, ແບ່ງອອກເປັນ 27 ຫ້ອງສອບ ໃນນີ້ມາຈາກ 9 ໂຮງຮຽນຄື: ໂຮງຮຽນ ມສ ສາລະພູມ, ມສ ມະນີ ລາດ, ມສ ສີໄຄ, ມສ ຕົ້ນແຫນ, ມສ ນາວເໜືອ, ມສ ສົມສະອາດ, ມສ ແກ້ງກະເບົາ, ມສ ໜອງສະພັງ ແລະມສ ນາສັງ.

 ການສອບເສັງໃນຄັ້ງນີ້ປະກອບມີ 4 ວິຊາຫຼັກຄື: ວິຊາພາສາລາວ-ວັນນະຄະດີ, ວິຊາຊີວະສາດ, ວິຊາຄະນິດສາດ ແລະວິຊາພູມສາດ, ໄດ້ແບ່ງຫົວຂໍ້ສອບເສັງອອກເປັນ 2 ຫົວຂໍ້ຄື (A) ແລະ(B), ເພື່ອໃຫ້ການສອບເສັງໃນຄັ້ງນີ້ໄດ້ຮັບຄຸນນະພາບ, ຖືກຕ້ອງຕາມລະບຽບຫຼັກການທີ່ທາງກະຊວງສຶກສາທິການ ແລະກີລາວາງອອກໃນນັ້ນໄດ້ຫ້າມໃຫ້ນັກສອບເສັງນໍາເອົາເຄື່ອງອຸປະກອນເຂົ້າຊ່ວຍໃນເວລາສອບເສັງເປັນຕົ້ນໂທລະສັບມືຖື, ຈັກຄິດໄລ່ເລກ, ຕາຕະລາງທາດມູນເຄມີ ຕ່າງໆເຂົ້າໃນຫ້ອງສອບເສັງຢ່າງ ເດັດຂາດ.

--------

ໜັງສືພິມເສດຸະກິດ-ສັງຄົມ

แชร์