ປະດິດສະຖານຮູບຫຼໍ່ພະເຈົ້າໄຊຍະເຊດຖາທິຣາດ ທີ່ອະນຸສາວະລີ ແຂວງອັດຕະປື

  ຂປລ. ພາຍຫຼັງໄດ້ເຄື່ອນຂະບວນແຫ່ຮູບຫຼໍ່ພະເຈົ້າໄຊຍະເຊດຖາທິຣາດ ມະຫາຣາດ ພ້ອມດ້ວຍຊ້າງ ແລະພະພຸດທະຮູບຈາກວັດພະທາດຫຼວງນະຄອນຫຼວງວຽງຈັນ ໃນວັນທີ 27 ກໍລະກົດ 2020 ໂດຍໄດ້ແວ່ພັກຄ້າງຄືນຢູ່ 4 ແຂວງຄື:ແຂວງບໍລິຄຳໄຊ, ແຂວງຄຳມ່ວນ, ແຂວງສະຫວັນນະເຂດ ແລະແຂວງຈຳປາສັກຈົນເຖິງແຂວງອັດຕະປືໃນວັນທີ 31 ກໍ ລະກົດ 2020 ແລະໃນວັນທີ 1 ສິງຫາ 2020 ກໍໄດ້ມີພິທີອັງເຊີນ ແລະປະດິດສະຖານຮູບຫຼໍ່ທອງເຫຼືອງພະເຈົ້າໄຊຍະເຊດຖາທິຣາດຊົງຊ້າງ ທີ່ອະນຸສາວະລີ ບ້ານຫາດຊາຍຂາວ ເມືອງໄຊເສດຖາ ແຂວງອັດຕະປື ເປັນທີ່ຮຽບຮ້ອຍ.


  ໂດຍຕອນເຊົ້າຂອງວັນທີ 1 ສິງຫາ 2020 ໄດ້ມີພິທີໃສ່ບາດຖວາຍສັງຄະຖານພຣະສົງ 39 ອົງ ເພື່ອອຸທິດແດ່ພະເຈົ້າໄຊຍະເຊດຖາທິຣາດມະຫາຣາດ ຜູ້ຊົງຄຸນງາມຄວາມດີຕໍ່ປະເທດຊາດ, ສາສະໜາ ແລະວັດທະນະທຳລາວໃນສະໄໝກ່ອນໂດຍເປັນກຽດເຂົ້າຮ່ວມຂອງທ່ານ ຈູມມາລີ ໄຊຍະສອນ ອະດີດປະທານປະເທດ, ທ່ານ ເລັດ ໄຊຍະພອນ ເຈົ້າແຂວງອັດຕະປືພ້ອມດ້ວຍການນຳແຂວງ ແລະມວນຊົນຊາວແຂວງອັດຕະປືເຂົ້າຮ່ວມຢ່າງຫຼວງຫຼາຍ.


ທ່ານ ເລັດ ໄຊຍະພອນ ໄດ້ສະແດງຄວາມພູມໃຈເປັນຢ່າງຍິ່ງທີ່ສຳເລັດການປະດິດສະຖານຮູບຫຼໍ່ທອງເຫຼືອງພະເຈົ້າໄຊຍະເຊດຖາທິຣາດມະຫາຣາດຢູ່ອະນຸສາວະລີແຫ່ງນີ້ຊຶ່ງຈະເປັນສະຖານທີ່ຊັກກະລະບູຊາ ແລະ ຮຽນຮູ້ເຖິງປະຫວັດສາດຂອງບັນພະບຸລຸດລາວໂດຍສະເພາະຄົນຮຸ່ນຫຼັງທັງເປັນສະຖານທີ່ທ່ອງທ່ຽວປະຫວັດສາດທີ່ສຳຄັນຂອງ ແຂວງອັດຕະປື ອີກດ້ວຍ.


 ທ່ານ ເລັດ ໄຊຍະພອນ ຍັງໄດ້ສະແດງຄວາມຊາບຊຶ້ງຕໍ່ນໍ້າໃຈເຫຼື້ອມໃສສັດທາຂອງຊາວພຸດທະສາສະນິກະຊົນ ແຂວງອັດຕະປື ກໍຄືບັນດາແຂວງຕ່າງໆ ທີ່ໄດ້ເຂົ້າຮ່ວມສະ ເຫຼີມສະຫຼອງ ແລະ ຮ່ວມໂມທະນາທານຢ່າງຫຼວງຫຼາຍເຮັດໃຫ້ງານນີ້ສຳເລັດລົງດ້ວຍດີແນວໃດກໍຕາມພາຍຫຼັງອອກພັນສາ ຫຼື ປະມານເດືອນ 11 ລາວຈະມີພິທີສະ  ເຫຼີມສະຫຼອງໃຫຍ່ອີກຄັ້ງໜຶ່ງຊຶ່ງຈະມີພິທີສົມໂພດຈຶ່ງເຊີນຊວນຊາວພຸດທະສາສະນິກະຊົນທົ່ວປະເທດເຂົ້າຮ່ວມສັດທານຳພວກຂ້າພະເຈົ້າດ້ວຍ.

แชร์