ຮ່າງຍຸດທະສາດປະຕິຮູບການສຶກສາສາທາລະນະສຸກ

  ກອງປະຊຸມດັ່ງກ່າວໄດ້ຈັດຂຶ້ນທີ່ຫ້ອງປະຊຸມຫ້ອງວ່າການ ແຂວງວຽງຈັນ ໃນວັນທີ 30-31 ກໍລະກົດ 2020 ໂດຍການເປັນປະທານຂອງທ່ານ ຄໍາພອນ ພຸດທະວົງ ຮອງລັດຖະມົນຕີກະຊວງສາທາລະນະສຸກ, ມີບັນດາທ່ານຫົວໜ້າຫ້ອງການ, ຫົວໜ້າກົມ, ຮອງກົມ ແລະພາກສ່ວນກ່ຽວຂ້ອງເຂົ້າຮ່ວມ.

 ທ່ານ ຄໍາພອນ ພຸດທະວົງ ຮອງລັດຖະມົນຕີກະຊວງສາທາລະນະສຸກໄດ້ກ່າວເປີດກອງປະຊຸມວ່າ:ກອງປະຊຸມຄັ້ງນີ້ແມ່ນມີຄວາມໝາຍຄວາມສໍາຄັນທີ່ສຸດ ຊຶ່ງຈະໄດ້ຮັບຟັງການເຜີຍແຜ່ພຸດທະສາດພັດທະນາຊັບພະຍາກອມະນຸດແຫ່ງຊາດຮອດປີ 2025 ໂດຍ ກະຊວງສຶກສາທິການ ແລະກີລາ ແລະພ້ອມກັນນີ້ກໍ່ຈະໄດ້ຮັບຟັງການສະເໜີຮ່າງຍຸດທະສາດປະຕິຮູບການສຶກສາສາທາລະນະສຸກແຕ່ປີ 2021-2025 ຊຶ່ງກົມການສຶກສາສາທາລະນະສຸກໄດ້ຮ່າງ ຂຶ້ນ,ໃນແຜນພັດທະນາຊັບພະຍາກອນມະນຸດແຫ່ງຊາດຮອດປີ 2025 ແມ່ນໄດ້ເນັ້ນໃສ່ການພັດທະນາຊັບພະຍາກອນມະນຸດໃຫ້ເປັນກໍາລັງຜະລິດຕົ້ນຕໍທີ່ສາມາດຕອບສະໜອງຕໍ່ການພັດທະນາເສດຖະກິດ-ສັງຄົມຢ່າງຍືນຍົງຕາມທິດຫັນເປັນອັນອຸດສາຫະກໍາ ແລະບັນສະໄໝ, ສາມາດເຊື່ອມໂຍງ ແລະແຂ່ງຂັນກັບພາກພື້ນ ແລະ ສາກົນໄດ້ທັງປະລິມານ ແລະຄຸນນະພາບ, ເຮັດໃຫ້ປະຊາຊົນສາມາດເຂົ້າເຖິງການບໍລິການທາງສັງຄົມຢ່າງທົ່ວເຖິງ ແລະຍົກລະດັບຊີ ວິດການເປັນຢູ່ໃຫ້ດີຂຶ້ນ.

 ເພື່ອຕອບສະໜອງຄວາມຮຽກຮ້ອງຕ້ອງການໃນການບໍລິການສາທາລະນະສຸກໃຫ້ມີຄຸນນະພາບ, ສົ່ງເສີມສຸຂະພາບ ແລະພາລະນາໄມສົມບູນໃຫ້ທົ່ວປວງຊົນ, ຊຸກຍູ້ສົ່ງເສີມໃຫ້ປວງຊົນຮັບຮູ້ ແລະເຂົ້າໃຈກ່ຽວກັບການຮັກສາສຸຂະພາບ, ການປ້ອງກັນພະຍາດ, ການອອກກໍາລັງກາຍ, ໂພຊະນາການເພື່ອໃຫ້ມີສຸຂະພາບແຂງແຮງທາງດ້ານ ຮ່າງກາຍ, ຈິດໃຈ, ອາລົມ ໃຫ້ທຸກຄົນສາມາດເຂົ້າເຖິງການບໍລິການ ແລະການປະກັນສຸຂະພາບທີ່ມີຄຸນນະພາບເທົ່າທຽມກັນໃນຂອບເຂດທົ່ວປະເທດ, ເພື່ອໃຫ້ບັນລຸໄດ້ບັນດາເປົ້າໝາຍດ້ານສຸຂະພາບທີ່ຕິດພັນກັບການຫຼຸດພົ້ນຈາກປະເທດດ້ອຍພັດທະນາ ແລະມີຄວາມຄືບໜ້າໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDGs) ທາງດ້ານສຸຂະພາບ ແລະພາລະນາໄມໃຫ້ປະຊາຊົນຮັບຮູ້ ແລະເຂົ້າໃຈກ່ຽວກັບການປ້ອງກັນພະຍາດຕ່າງໆ.

    ດັ່ງນັ້ນ, ກະຊວງສາທາລະນະສຸກຈຶ່ງໄດ້ສຸມໃສ່ວຽກງານການກໍ່ສ້າງ, ຍົກລະດັບ ແລະຝຶກອົບຮົມບຸກຄະລາກອນສາທາລະນະສຸກໃຫ້ມີຄຸນນະພາບ ໂດຍສະເພາະຕ້ອງໄດ້ສຸມໃສ່ການກໍ່ສ້າງ ແລະຍົກລະດັບພະນັກງານ, ຄູ-ອາຈານ, ແພດຊ່ຽວຊານ, ພະຍາບານໃຫ້ມີຄຸນສົມບັດສິນທໍາປະຕິວັດ, ມີຄວາມຮູ້, ຄວາມສາມາດ, ມີຈັນຍາບັນ, ຈັນຍາທໍາວິ ຊາຊີບເພື່ອຮັບປະກັນການບໍລິການສຸຂະພາບທີ່ມີຄຸນນະພາບໃຫ້ເທົ່າທຽມກັບພາກພື້ນ ແລະສາກົນ, ເອົາໃຈໃສ່ປັບປຸງ ແລະພັດທະນາພື້ນຖານໂຄງລ່າງ, ວັດຖຸອຸປະກອນ, ສື່ການຮຽນ-ການສອນ,ພັດທະນາ ແລະປັບປຸງຫຼັກສຸດໃຫ້ທັນສະໄໝ ແລະສອດຄ່ອງກັບຂີດຄວາມສາມາດຂອງແຕ່ລະວິຊາຊີບ, ປັບປຸງກົນໄກປະສານງານການຮ່ວມມືໃນການພັດທະນາການສຶກສາສາທາລະນະສຸກລະຫວ່າງສະຖານການສຶກສາກັບສະຖານທີ່ຝຶກປະຕິບັດ, ບັນດາກົມກອງ, ກະຊວງທີ່ກ່ຽວຂ້ອງ ແລະຄູ່ຮ່ວມພັດທະນາ, ປັບປຸງຄຸນນະພາບຂອງສະຖານ ການສຶກສາສາທາລະນະສຸກໃຫ້ໄດ້ຕາມມາດຕະຖານປະກັນຄຸນນະພາບການສຶກສາແຫ່ງຊາດ,ປັບປຸງ ແລະພັດທະນາລະບົບຖານຂໍ້ມູນໃນການກໍ່ສ້າງ, ຍົກລະດັບ ແລະອົບຮົມໃຫ້ທັນສະໄໝ, ລວມສູນ, ເປັນເອກະພາບ ແລະເຊື່ອຖືໄດ້, ຊຸກຍູ້ ສົ່ງເສີມການຄົ້ນຄວ້າວິທະຍາສາດດ້ານສາທາລະນະສຸກ ແລະນໍາເອົາຜົນຂອງການຄົ້ນຄວ້າໄປໝູນໃຊ້ເຂົ້າໃນການປະຕິບັດວຽກງານຕົວຈິງໃຫ້ມີປະສິດທິພາບ ແລະປະສິດທິຜົນພ້ອມທັງສາມາດເຊື່ອມໂຍງກັບຂົງເຂດພາກພື້ນ ແລະສາກົນ.

--------

ໜັງສືພິມເສດຖະກິດ-ສັງຄົມ

แชร์