ສະຫາຍ ຄຳໄຫຼ ສີປະເສີດ ຂື້ນເປັນເລຂາຄະນະບໍລິຫານງານພັກແຂວງຫຼວງນໍ້າທາ

 ກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງຫຼວງນໍ້າທາໄດ້ສຳເລັດລົງດ້ວຍໝາກຜົນທີ່ໜັກແໜ້ນໃນວັນທີ 29- 30 ກໍລະກົດ 2020 ທີ່ຫໍວັດທະນະທໍາແຂວງ ໂດຍການເປັນປະທານຂອງສະຫາຍ ເພັດຖາວອນ ພິລະວັນ ກຳມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງໆຫຼວງນໍ້າທາ ແລະໃຫ້ກຽດເຂົ້າຮ່ວມໂດຍສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກລັດຖະມົນຕີກະຊວງປ້ອງກັນປະເທດ, ມີບັນດາສະຫາຍຜູ້ແທນຈາກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ບັນດາສະຫາຍອະດີດການນຳແຂວງ, ນັກປະຕິວັດຜູ້ຊົງຄຸນວຸດທິ, ບັນດາສະຫາຍຜູ້ແທນສົມບູນຕາງໜ້າໃຫ້ສະມາຊິກພັກໃນທົ່ວແຂວງເຂົ້າຮ່ວມ.

  ໃນກອງປະຊຸມສະຫາຍ ເພັດຖາວອນ ພິລະວັນ ກໍ່ໄດ້ຜ່ານບົດລາຍງານການເມືອງໄລຍະ 5 ປີຜ່ານມາສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍເສດຖະກິດ-ສັງຄົມໄດ້ຮັບການພັດທະນາຢ່າງຕໍ່ເນື່ອງພື້ນຖານໂຄງລ່າງໄດ້ຮັບການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການພັດທະນາດີຂຶ້ນ.

  ໄລຍະ 5 ປີຜ່ານມາເສດຖະກິດຂອງແຂວງມີທ່າຂະຫຍາຍຕົວຢ່າງຕໍ່ເນື່ອງ ແລະຖືກທິດໃນລະດັບສະເລ່ຍ 8,56% ຕໍ່ປີ, ມູນຄ່າລວມຍອດຜະລິດຕະພັນພາຍໃນບັນ ລຸໄດ້ 3.114,42 ຕື້ກີບ, ທຽບໃສ່ 5 ປີກ່ອນເພີ່ມຂຶ້ນ 958,2 ຕື້ກີບ, ສະເລ່ຍລາຍຮັບຕໍ່ຫົວຄົນໄດ້ 1897,51 ໂດລາ, ທຽບໃສ່ປີ 2015 ເພີ່ມຂຶ້ນ 403,51 ໂດ ລາ, ໃນນີ້ຂົງເຂດກະສິກຳ-ປ່າໄມ້ຂະຫຍາຍຕົວໃນລະດັບ 8,84%, ກວມເອົາ 49,95%, ຂົງເຂດອຸດສາຫະກຳ 7,87%, ກວມເອົາ 20,38%, ຂົງເຂດບໍລິ ການ 3,10% ກວມເອົາ28,15% ຂອງ GDP, ພາສີ-ອາກອນຜະລິດຕະພັນເພີ່ມຂຶ້ນ 1,53% ກວມ 1,52 ຂອງ GDP.

  ກອງປະຊຸມໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນພິຈາລະນາຢ່າງເລີກເຊີງ ແລະເປັນເອກະສັນກັນຮັບຮອງເອົາບົດລາຍງານການເມືອງ ແລະເປັນເອກະພາບຕໍ່ການຕີລາຄາດ້ານອ່ອນ-ຂໍ້ຄົງຄ້າງ, ສາເຫດ ແລະບົດຮຽນທີ່ຖອດຖອນໄດ້ທີ່ຍົກໃຫ້ເຫັນໃນບົດລາຍງານການເມືອງ ແລະແຜນພັດທະນາເສດຖະກິດ-ສັງຄົມໄດ້ເປັນເອກະພາບຮັບຮອງເອົາບັນດາຄາດໝາຍລວມ, ທິດທາງ, ໜ້າທີ່ລວມ, ຄາດໝາຍສູ້ຊົນໃນ 5 ປີ ແຕ່ນີ້ຮອດປີ 2025.

  ໃນກອງປະຊຸມບັນດາຜູ້ແທນສົມບູນກໍ່ໄດ້ໃຊ້ສິດປະຊາທິປະໄຕເພື່ອປ່ອນບັດເລືອກຕັ້ງເອົາຄະນະບໍລິຫານງານພັກແຂວງຊຸດໃໝ່ຊຶ່ງມີຜູ້ສະໝັກທັງໝົດ 36 ສະຫາຍ, ຍິງ 5 ສະຫາຍ ເລືອກເອົາ 31 ສະຫາຍ, ຍິງ 4 ສະຫາຍ ແລະກອງປະຊຸມຄັ້ງປະຖົມມະລືກຂອງຄະນະບໍລິຫານງານພັກແຂວງຫຼວງນໍ້າທາຄັ້ງທີ VIII ໄດ້ເລືອກຕັ້ງເອົາຄະນະປະຈໍາພັກແຂວງ 9 ສະຫາຍ.

  ກອງປະຊຸມໄດ້ເຫັນດີເປັນເອກະພາບເລືອກເອົາສະຫາຍ ຄຳໄຫຼ ສີປະເສີດ ເປັນເລຂາຄະນະບໍລິຫານງານພັກແຂວງ, ສະຫາຍ ຄຳຟອງ ອິນມະນີ ເປັນຮອງເລຂາພັກແຂວງ, ສະຫາຍ ຈັນທອງ ແກ້ວປະເສີດ ເປັນຮອງເລຂາພັກແຂວງ ແລະສະຫາຍ ສີວິໄລ ປັນແກ້ວ ເປັນປະທານກວດກາພັກແຂວງພ້ອມດ້ວຍຄະນະ 3 ສະຫາຍ ເພື່ອເປັນຫຼັກແຫຼ່ງແກ່ນສານສຶບຕໍ່ນຳພາຈັດຕັ້ງປະຕິບັດໜ້າທີ່ການເມືອງກໍ່ຄືພາລະກິດປົກປັກຮັກສາສ້າງສາພັດທະນາໃນຕໍ່ໜ້າ.

  ໂອກາດດັ່ງກ່າວສະຫາຍ ພົນເອກ ຈັນສະໝອນ ຈັນຍາລາດ ກໍໄດ້ສະແດງຄວາມຊົມເຊີຍຕໍ່ກອງປະຊຸມຄັ້ງນີ້ພ້ອມທັງເນັ້ນໜັກໃຫ້ຄະນະບໍລິຫານງານພັກແຂວງຊຸດໃໝ່ຫັນເອົາມະຕິກອງປະຊຸມ ໃຫຍ່ຄັ້ງນີ້ໃຫ້ເປັນແຜນງານໂຄງການແລະສ້າງເປັນນິຕິກຳລະອຽດເພື່ອຈັດຕັ້ງເຜີຍແຜ່ເຊື່ອມຊຶມ, ຕັ້ງໜ້າປຸກລະດົມທຸກກຳລັງແຮງຂອງປວງຊົນໃຫ້ເຂົ້າຮ່ວມໃນການປົກປັກຮັກສາ ແລະສ້າງສາພັດທະນາແຂວງຫຼວງນໍ້າທາໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້.

__________

ຂ່າວ: ກິ່ນນາລົມ  

ຮູບພາບ: ໜັງສືພິມເສດຖະກິດ-ສັງຄົມ

แชร์