ຄະນະກຳມະການຊີ້ນຳສິ່ງແວດລ້ອມແຂວງຫຼວງພະບາງຫາລືວຽກຮ່ວມກັນ

ຄະນະກຳມະການຊີ້ນຳສິ່ງແວດລ້ອມຂັ້ນແຂວງຫຼວງພະບາງໄດ້ຈັດກອງປະຊຸມເພື່ອປຶກສາຫາລືຮ່ວມກັນຂຶ້ນໃນວັນທີ 29 ກໍລະກົດຜ່ານມາຢູ່ຫ້ອງປະຊຸມໃຫຍ່ຂອງກອງບັນຊາການທະຫານແຂວງໂດຍການເປັນປະທານຂອງທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງ, ທ່ານ ຈັນທະວົງ ຜົນນະຈິດ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງ, ມີຄະນະກຳມະການຊີ້ນຳຂັ້ນແຂວງ, ນະຄອນ-ຫຼວງພະບາງ ແລະ 11 ເມືອງ 1 ນະຄອນເຂົ້າຮ່ວມ.

  ທ່ານ ສຸກັນ ບຸນຍົງ ຮອງເຈົ້າແຂວງໆຫຼວງພະບາງກ່າວວ່າ: ກອງປະຊຸມຂອງຄະນະກໍາມະການຄັ້ງນີ້ແມ່ນສຸດທີ່ມີຄວາມໝາຍຄວາມສໍາຄັນເພາະຈະໄດ້ພ້ອມກັນສືບຕໍ່ຈັດຕັ້ງປະຕິບັດແຜນຍຸດທະສາດການປົກປັກຮັກສາຊັບພະຍາກອນທຳມະຊາດ ແລະສິ່ງແວດລ້ອມຕິດພັນກັບການປະເມີນຜົນກະທົບຈາກໂຄງການລົງທຶນຕ່າງໆ ແລະການຄຸ້ມຄອງຄວາມສະອາດໃນຕົວເມືອງໃຫຍ່, ການສ້າງທີວທັດທີ່ມີຄວາມສວຍງາມ, ການສ້າງໃຫ້ຕົວເມືອງສີຂຽວ ແລະມີຄວາມຍືນຍົງໂດຍສະເພາະແມ່ນການຈັດຕັ້ງປະຕິບັດຄາດໝາຍສູ້ຊົນຂອງລັດຖະບານເພື່ອເຮັດໃຫ້ເນື້ອທີ່ປົກຫຸ້ມຂອງປ່າໄມ້ກວມເອົາ 70% ຂອງເນື້ອທີ່ທັງໝົດໃນຂອບເຂດທົ່ວປະເທດ,ແນໃສ່ເຮັດໃຫ້ການປົກປັກຮັກສາ, ຄຸ້ມຄອງ ແລະນຳໃຊ້ຊັບພະຍາກອນທຳມະຊາດໃຫ້ມີຄວາມຍືນຍົງໃນອະນາຄົດ.

  ອີກດ້ານໜຶ່ງກໍແມ່ນເປັນການຜັນຂະຫຍາຍກົດໝາຍວ່າດ້ວຍການປົກປັກຮັກສາສິ່ງແວດລ້ອມ ແລະຈະໄດ້ພ້ອມກັນເຊື່ອມຊຶມເອກະສານ, ຄູ່ມື ແລະວິທີການຕ່າງໆທີ່ກ່ຽວຂ້ອງກັບການປົກປັກຮັກສາຊັບພະຍາກອນທຳມະຊາດ ແລະສິ່ງແວດລ້ອມເປັນຕົ້ນແມ່ນຍຸດທະສາດສິ່ງແວດລ້ອມທີ່ຍືນຍົງ, ຄູ່ມືໃນການຈັດຕັ້ງປະຕິບັດວຽກງານຮັກສາຄວາມສະອາດ, ຮັກສາຄວາມສີຂຽວ ແລະ ເຮັດໃຫ້ມີຄວາມສວຍງາມ ແລະ ບາງຫຼັກການໃນການຫຼຸດຜ່ອນປະລິມານຂີ້ເຫຍື້ອໃນຕົວເມືອງ, ພ້ອມນີ້ກໍ່ຈະໄດ້ຄົ້ນຄວ້າ, ປຶກສາຫາລື, ຊອກຫາວິທີທາງ ແລະ ວາງມາດຕະການແກ້ໄຂໃນຕໍ່ໜ້າໃຫ້ຖືກຕ້ອງ, ສອດຄອງແນ່ໃສ່ເຮັດໃຫ້ການຄຸ້ມຄອງ ແລະ ການປົກປັກຮັກສາຊັບພະຍາ ກອນທຳມະຊາດ ແລະສິ່ງແວດລ້ອມພາຍໃນແຂວງຫຼວງພະບາງດີຂຶ້ນໄປເປັນກ້າວໆ.

___________

ຂ່າວ: ສີສຸວັນ 

ຮູບພາບ: ໜັງສືພິມເສດຖະກິດ-ສັງຄົມ

แชร์