ໂຮງຮຽນປະຖົມສົມບູນບ້ານວຽງໄຊ-ນາຫຼວງສະຫຼຸບສົກຮຽນ

   ໃນວັນທີ 28 ກໍລະກົດ 2020 ທີ່ເດີນໂຮງຮຽນປະຖົມສົມບູນບ້ານວຽງໄຊ-ນາຫຼວງເມືອງວັງວຽງແຂວງວຽງຈັນ ໄດ້ຈັດພິທີສະຫຼຸບສົກຮຽນ 2019-2020 ໂດຍການເປັນປະທານຂອງທ່ານນາງ ຈັນທີ ພະທຳ ຮອງຫົວໜ້າຫ້ອງການສຶກສາທິການ ແລະກີລາເມືອງ, ທ່ານ ສອນໄຊ ໄຊຍະສານ ຮອງນາຍບ້ານໆວຽງໄຊ, ທ່ານ ບຸນ ພັນທະວົງ ປະທານສະມະຄົມພໍ່ແມ່ນັກຮຽນ, ມີຄູ-ອາຈານ, ພໍ່ແມ່ນັກຮຽນ ແລະນ້ອງນັກຮຽນເຂົ້າຮ່ວມ.

   ໃນພີທີທ່ານ ນາງ ຈັນດາ ເພັງ ພຸດທະວົງ ຜູ້ອຳນວຍການໂຮງຮຽນໄດ້ຂຶ້ນຜ່ານບົດສະຫຼຸບໃນການປະຕິບັດວຽກງານການຮຽນການສອນໃນ 1 ສົກຮຽນຜ່ານມາວ່າໂຮງຮຽນແຫ່ງນີ້ມີ 2 ຊັ້ນຮຽນຄືຊັ້ນອະນຸບານ ແລະຊັ້ນປະຖົມ, ຊັ້ນຮຽນອະນຸບານ 1 ຫາອະນຸບານ 3 ມີ 3 ຫ້ອງຮຽນມີນັກຮຽນທັງໝົດ 55 ຄົນ, ຍິງ 32 ຄົນ,ມີຄູສອນ 3 ຄົນ, ຍິງ 3, ຊັ້ນປະຖົມມີ 5 ຫ້ອງຮຽນແຕ່ ປ1-5 ມີ 5 ຫ້ອງຮຽນ, ມີນັກຮຽນທັງໝົດ 112 ຄົນ, ຍິງ 51 ຄົນ, ມີຄູທັງໝົດ 6 ຄົນ, ຍິງ 5 ຄົນ, ຄູ ສອນທັງໝົດມີ 9 ຄົນ, ຍິງ 8 ຄົນ, ໃນໄລະ 1 ສົກຮຽນເຫັນວ່າຄູ ແລະນັກຮຽນມີຄວາມເປັນລະບຽບຮຽບຮ້ອຍດີມີແນວຄິດອຸ່ນອຽນທຸ່ນທ່ຽງຫ້າວຫັນຕໍ່ໜ້າທີ່ວຽກ ງານພ້ອມກັນຈັດຕັ້ງປະຕິບັດແຜນພັດທະນາການສຶກສາທີ່ໄດ້ວ່າງອອກລະບຸຕາມຄາດໝາຍຊຶ່ງສະແດງອອກຄືຄູ-ອາຈານທຸກຄົນແມ່ນໄດ້ສຸມຈິດສຸມໃຈໃສ່ໃນການສິດສອນ, ຂຶ້ນຫ້ອງສອນ, ແຕ່ງບົດສອນຕາມໂຄງການຫຼັກສູດ ແລະຖືກຕາມປະມວນການສອນ,ຄູ-ອາຈານຍັງໄດ້ ເອົາໃຈໃສ່ບຳລຸງນັກຮຽນຊັ້ນ ປ5 ເພື່ອສ້າງເປົ້າໝາຍນັກຮຽນເກັ່ງເພື່ອເລືອກເອົານັກຮຽນເກັ່ງໄປເສັງຂັ້ນກຸ່ມມີ 8 ນ້ອງ, ຕິດອັນດັບຂັ້ນເມືອງມີ 1 ນ້ອງວິຊາພາສາລາວ ແລະໄດ້ລົງທະບຽນໄປເສັງອີກ 1 ນ້ອງວິຊາພາສາລາວ ໃນ 1 ສົກຮຽນຜ່ານມາມີນັກຮຽນເກັ່ງປະເພດ 1 ແຕ່ ປ1-ປ5 ມີ 5 ນ້ອງ, ປະເພດ 2 ແຕ່ ປ1-ປ5 ມີ 6 ນ້ອງ, ຜ່ານການປະເມີນການສອນເສັງເລື່ອນຊັ້ນ ແລະຈົບຊັ້ນ ປ1-5 ມີທັງໝົດ 112 ນ້ອງ, ຍິງ 51 ຄົນ, ສອບເສັງໄດ້ທັງໝົດ 112 ນ້ອງ, ສະເລ່ຍໄດ້ 100%.

  ໃນພິທີຍັງໄດ້ມອບໃບຍ້ອງຍໍໃຫ້ຄູ-ອາຈານທີ່ປະຕິບັດວຽກງານໃນໄລຍະຜ່ານມາໃບຍ້ອງຍໍຂັ້ນເຈົ້າແຂວງມີ 4 ສະຫາຍ, ຍິງ 4 ສະຫາຍ, ຂັ້ນຫົວໜ້າພະແນກສຶກສາ ທິການ ແລະກີລາແຂວງ 5 ສະຫາຍ, ຍິງ 4 ສະຫາຍ ໃຫ້ກຽດຂຶ້ນມອບໂດຍທ່ານ ນາງ ຈັນທີພະທຳ ຮອງຫົວໜ້າຫ້ອງການສຶກສາທິການ ແລະກີລາເມືອງໃນໂອກາດດຽວກັນນີ້ຍັງໄດ້ມອບໃບຍ້ອງຍໍ ແລະຂອງຂວັນໃຫ້ນ້ອງນ້ອຍນັກຮຽນທີໄດ້ຄະແນນດິ,ຮຽນເກັ່ງແຕ່ ປ1-5 ແລະໄດ້ມອບໃບສົມມະນາຄຸນໃຫ້ແກ່ອະດິດນັກສຶກສາ ແລະພໍ່ແມ່ນັກຮຽນທີ່ໄດ້ຊ່ວຍອຸປະກອນການຮຽນ ແລະ ເຄື່ອງໃຊ້ຫ້ອງການຕ່າງໆ ໂດຍ ທ່ານປະທານຜັດປ່ຽນກັນຂຶ້ນມອບ.

  ຕອນທ້າຍພິທີທ່ານ ນາງ ຈັນທີ ພະທຳ ຮອງຫົວໜ້າຫ້ອງການສຶກສາທິການ ແລະກີລາເມືອງໄດ້ກ່າວສະແດງຄວາມຍ້ອງຍໍຊົມເຊີຍຜົນງານທີ່ພົ້ນເດັ່ນຂອງບັນດາຄູ-ອາຈານ ແລະນ້ອງນ້ອຍນັກຮຽນທີ່ສາມາດຍາດມາໄດຜພ້ອມນັ້ນທ່ານຍັງຮຽກຮ້ອງໃຫ້ທຸກຄົນຈົ່ງຮັກສາມູນເຊື້ອໃນການເປັນນັກຮຽນເກັ່ງເປັນຄູທີ່ດີສືບຕໍ່ສຶກສາອົບຮົມການເມືອງ-ແນວຄິດຄຸນສົມບັດສິນທຳປະຕິວັດ, ປະຕິບັດການຮຽນການສອນຕາມ 3 ລັກສະນະ 5 ລັກມູນຂອງການສຶກສາເພື່ອຖ່າຍທອດໃຫ້ນ້ອງນ້ອຍນັກຮຽນຕໍ່ໆໄປ.

__________

ໜັງສືພິມເສດຖະກິດ-ສັງຄົມ

แชร์