ໂຮງຮຽນ ມສ ສົງແຂວງເປີດພິທີການສອບເສັງຈົບຊັ້ນ ມ7

   ວັນທີ 28 ກໍລະກົດ 2020 ໂຮງຮຽນ ມສ ສົງແຂວງອຸດົມໄຊ ໄດ້ຈັດພິທີເປີດການສອບເສັງຈົບຊັ້ນສາມັນສຶກສາສົງຕອນປາຍ (ມ7) ທີ່ສູນວັດສັນຕິພາບສົກຮຽນ 2019-2020 ພາຍໃຕ້ການເປັນປະທານຂອງພະອາຈາຣຍ໌ ຄໍາແພງ ຈັນທະນາ ຫົວໜ້າກໍາມາທິການສຶກສາສົງແຂວງ, ໃຫ້ກຽດເຂົ້າຮ່ວມໂດຍທ່ານ ພວງວິໄລ ອິນທະວົງ ຫົວໜ້າພະແນກສຶກສາທິການແລະກີລາແຂວງ, ທ່ານ ອານົນ ແກ່ນວົງສາ ຕາງໜ້າຫ້ອງການສຶກສາສົງສູນກາງ, ທ່ານ ຄໍາເໝັງ ທິດທິເດດ ຫົວໜ້າຫ້ອງການກໍາມາທິການສຶກສາສົງແຂວງ, ທ່ານ ສົມອົກ ແກ້ວອໍາພອນ ຮອງຫົວໜ້າຫ້ອງການສຶກສາທິການ ແລະກີລາເມືອງ, ທ່ານ ຄໍາແດງ ແສງສຸກ ຫົວໜ້າອາຊີວະສຶກ ສາພະແນກສຶກສາທິການ ແລະກີລາແຂວງ, ທ່ານ ບຸນເພັງ ລິນທະແສງ ຮອງຜູ້ອຳນວຍການໂຮງຮຽນພ້ອມດ້ວຍຄະນະກຳມະການຍາມຫ້ອງສອບເສັງ ແລະນັກສອບ ເສັງເຂົ້າຮ່ວມ.

  ໃນພິທີໄດ້ອ່ານຂໍ້ຕົກລົງຂອງສູນກາງພຸດທະສາສະໜາສໍາພັນ ແຫ່ງ ສປປ ລາວ ວ່າດ້ວຍການແຕ່ງຕັ້ງຄະນະກໍາມະການຂັ້ນແຂວງ, ຂໍ້ຕົກລົງຂອງເຈົ້າແຂວງອຸດົມໄຊ ວ່າດ້ວຍການແຕ່ງຕັ້ງຄະນະຮັບຜິດຊອບການສອບເສັງຈົບຊັ້ນມັດທະຍົມສຶກສາສົງຕອນປາຍ ມ7, ຂໍ້ຕົກລົງຂອງປະທານສູນສອບເສັງວັດສັນຕິພາບວ່າດ້ວຍການແຕ່ງ ຕັ້ງຄະນະຮັບຜິດສອບຍາມຫ້ອງສອບເສັງຈົບຊັ້ນ ມ7 ທີ່ສູນວັດສັນຕິພາບ ແລະໄດ້ຜ່ານກົດລະບຽບຂອງການສອບເສັງຂອງພະແນກສຶກສາທິການ ແລະກີລາແຂວງວ່າດ້ວຍຫຼັກການ ແລະເງື່ອນໄຂການສອບເສັງຈົບຊັ້ນ ມ7.

  ການສອບເສັງມີ 2 ສາຍຄື: 1. ສາຍທັມແມ່ນສອບເສັງວັນທີ 28 ກໍລະກົດ 2020. ມີ 3 ວິຊາ: ພາສາບາລີ, ອະພິທັມມັດຖະສັງຄະຫະ ແລະ ວິຊາທັມມະ, 2. ສາຍ ໂລກແມ່ນໄດ້ສອບເສັງວັນທີ 29-30 ກໍລະກົດ 2020 ມີ 4 ວິຊາ: ພາສາລາວ-ວັນນະຄະດີ, ຊີວະສາດ, ຄະນິດສາດ ແລະວິຊາພູມສາດມີນັກສອບທັງໝົດ 25 ອົງ.

--------------------------------------------------------------------

 

 

แชร์