ເຈດີບີໃຈດີ ສ້າງໃຫ້ລ້າໂຮງຮຽນ ບ້ານສະກິພີນ ມູນຄ່າ 250 ລ້ານກີບ

 ຕອນເຊົ້າວັນທີ 28 ກໍລະກົດ 2020 ຢູ່ເດີ່ນໂຮງຮຽນປະຖົມບ້ານສະກິພີນ (ຄຸ້ມສາງ) ເມືອງເຊໂປນ ແຂວງສະຫວັນນະເຂດ ໄດ້ມີພິທີມອບ-ຮັບອາຄານໂຮງຮຽນປະ ຖົມບ້ານສະກິພີນໂດຍການເຂົ້າຮ່ວມທ່ານນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະກີລາແຂວງ,ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ, ທ່ານ ຄຳສິງ ສອນສິງນະວົງ ຮອງຜູ້ອຳນວຍການໃຫຍ່ທະນາຄານຮ່ວມພັດທະນາ (JDB),ມີບັນດາຫົວໜ້າຫ້ອງການສຶກສາທິການ ກີລາເມືອງ, ທ່ານ ຖາວອນອ້ວນມາລາ ຕາງໜ້າຄະນະຜູ້ບໍລິຫານ JDB ແລະກອງທຶນຮ່ວມໃຈ JDB,ຫົວໜ້າຫ້ອງການຮອງຫ້ອງການອ້ອມຂ້າງເມືອງ, ພະນັກງານຈາກໜ່ວຍບໍລິການ JDB ປະ ຈຳ ເມືອງເຊໂປນ, ນາຍບ້ານພ້ອມດ້ວຍພໍ່ແມ່ປະຊາຊົນ, ຫົວໜ້າກຸ່ມໂຮງຮຽນຕະຫຼອດຮອດນ້ອງນັກຮຽນເຂົ້າຮ່ວມຢ່າງພ້ອມພຽງ.

   ໃນພິທີທ່ານ ຄຳເພັດ ໄຊຍະເທບ ຫົວໜ້າຫ້ອງການສຶກສາທິການ ແລະ ກີລາເມືອງເຊໂປນກໍ່ໄດ້ຂຶ້ນຜ່ານບົດລາຍງານການກໍ່ສ້າງໂດຍຫຍໍ້, ຈາກນັ້ນຕາງໜ້າຈາກ JDB ທ່ານ ຖາວອນ ອ້ວນມາລາ ກໍໄດ້ຂຶ້ນມີຄຳເຫັນວ່າ: ໃນການໃຫ້ທຶນຈາກກອງທຶນຮ່ວມໃຈຂອງທະນາຄານຮ່ວມພັດທະນາໃນເທື່ອນີ້ກໍເພື່ອເຮັດໃຫ້ນັກຮຽນໃນຂົງ ເຂດຈຸດສຸມດົງສະຫວັນ, ບ້ານສະກີພີນ (ຄຸ້ມສາງ) ໄດ້ມີຄວາມສະດວກສະບາຍທາງດ້ານການສຶກສາ, ມີອາຄານຮຽນທີ່ເໝາະສົມ, ມີຫ້ອງຮຽນພຽງພໍ ແລະ ເປັນອາຄານທີ່ຖາວອນນັກຮຽນໃນຄຸ້ມດັ່ງກ່າວກໍ່ຈະຮຽນຈົບປະຖົມສົມບູນພາຍໃນບ້ານຂອງຕົນເອງໃຫ້ຫຼາຍຂຶ້ນເພື່ອເຮັດໃຫ້ນັກຮຽນຄຸ້ມສາງມີໂອກາດໄດ້ໄປຮຽນຕໍ່ຢູ່ມັດ ທະຍົມສົມບູນ ດົງສະຫວັນໄດ້ຫຼາຍຂຶ້ນເພື່ອຕອບສະໜອງໄດ້ເປົ້າໝາຍສະຫັດສະວັດອັດຕາເຂົ້າຮຽນລວມຊັ້ນມັດທະຍົມຕົ້ນ, ມັດທະຍົມປາຍໃຫ້ສູງຂຶ້ນຢ່າງຕໍ່ເນື່ອງ.

  ການກໍ່ສ້າງໂຮງຮຽນປະຖົມບ້ານສະກີພີນ ແມ່ນເລີ່ມລົງມືໃນວັນທີ 24 ກຸມພາ 2020 ຫາ 13 ເມສາ 2020 ແມ່ນໄດ້ສຳເລັດ 100% ເປັນອາຄານຊັ້ນດຽວຂະ ໜາດກວ້າງ 8X14 ແມັດ, ມຸງດ້ວຍສັງກະສີ, ກໍ່ດ້ວຍດິນຈີ່, ມີສອງຫ້ອງຮຽນ ແຕ່ຊັ້ນປ 1 ຮອດ ປ 4, ຄູ 1 ຄົນ (ຊາຍ), ຫ້ອງນໍ້າ 1 ຫຼັງ ມີ 2 ຫ້ອງພ້ອມດ້ວຍ ໂຕະຕັ່ງຈຳນວນ 30 ຊຸດ, ກະດານດຳ 2 ແຜ່ນ, ເສົາທຸງ1 ເສົາລວມມູນຄ່າໃນການກໍ່ສ້າງທັງໝົດ 250 ລ້ານກີບ.

  ໃນພິທີຍັງໄດ້ມີການມອບໃບຍ້ອງຍໍຂອງພະແນກສຶກສາທິການ ແລະກີລາແຂວງ ແລະມອບປ້າຍ, ໂດຍການພັດປ່ຽນກັນຂຶ້ນມອບຕາງໜ້າທະນາຄານຮ່ວມພັດທະນາຂຶ້ນຮັບ.

  ຫຼັງຈາກນັ້ນທ່ານ ວົງສະຫວັນ ວຽງມະນີ ເຈົ້າເມືອງເຊໂປນກໍ່ໄດ້ມີຄຳເຫັນໃນພິທີດັ່ງກ່າວຊຶ່ງກ່ອນອື່ນທ່ານກໍ່ໄດ້ກ່າວສະແດງຄວາມດີໃຈ ແລະຂອບໃຈທີ່ທາງ ທະນາ ຄານຮ່ວມພັດທະນາລາວໄດ້ໃຫ້ທຶນກໍ່ສ້າງໂຮງຮຽນແຫ່ງນີ້ສະນັ້ນກໍ່ຢາກໃຫ້ພໍ່ແມ່ປະຊາຊົນພາຍໃນບ້ານ, ນາຍບ້ານພ້ອມດ້ວຍນັກຮຽນຈົ່ງຊ່ວຍກັນປົກປັກຮັກສາໂຮງ ຮຽນດັ່ງກ່າວໃຫ້ສະອາດງາມຕາຮັກສາບໍ່ໃຫ້ໂຮງຮຽນເປື້ອນເປີະ, ຮັກສາຄວາມເປັນລະບຽບຮຽບຮ້ອຍ, ຈາກນັ້ນກໍ່ໄດ້ພ້ອມກັນຕັດລິບປິ່ງມອບໂຮງຮຽນດັ່ງກ່າວ.

  ກອງທຶນຮ່ວມໃຈຂອງທະນາຄານຮ່ວມພັດທະນາໄດ້ສ້າງຕັ້ງຂຶ້ນໂດຍ ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາເພື່ອຊ່ວຍເຫຼືອສັງ ຄົມກໍ່ຄືນໍາໄປຊ່ວຍເຫຼືອການປຸກສ້າງໂຮງຮຽນໃນເຂດຊົນນະບົດຫ່າງໄກສອກຫຼີກທີ່ມີຄວາມທຸກຍາກຂາດເຂີນອາຄານຮຽນ, ອຸປະກອນການສຶກສາ, ໄພພິບັດ , ໂລກລະ ບາດ ແລະເຫດການອື່ນໆ.

____________

ຂຽນໂດຍ: ຄຳຕົ້ນ ວໍລະຈັກ                        

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์