90% ແລ້ວການສ້າງເຂື່ອນນໍ້າອູ 1

   ໂຄງການກໍ່ສ້າງເຂື່ອນນໍ້າອູ 1 ເປັນໜຶ່ງໃນໂຄງການເຂື່ອນໃນແມ່ນໍ້າອູ 7 ແຫ່ງ, ສໍາປະທານສ້າງ ແລະພັດທະນາໂດຍບໍຣິສັດ ຊາຍໂນຮາຍໂດຣ ຂອງຈີນເປັນເວລາ 29 ປີ ພາຍຫຼັງທີ່ມີການກໍ່ສ້າງມາແຕ່ເດືອນເມສາ 2016 ມາຮອດປະຈຸບັນໜ້າວຽກໂດຍລວມສະເລ່ຍໄດ້ 90% ໂດຍໂຄງການແມ່ນຈະໃຫ້ສຳເລັດທັງໝົດພາຍໃນທ້າຍປີນີ້.

  ທ່ານ ຫົວນານ ຊາງ ຫົວໜ້າໂຄງການກໍ່ສ້າງເຂື່ອນໄຟຟ້ານໍ້າອູ 1 ທີ່ຕັ້ງຢູ່ເມືອງປາກອູ ແຂວງຫຼວງພະບາງ ໄດ້ໃຫ້ສໍາພາດຕໍ່ສື່ຂ່າວເສດຖະກິດ-ສັງຄົມວ່າ: ເຂື່ອນນໍ້າອູ1 ມີກໍາລັງການຜະລິດໄຟຟ້າທັງໝົດ 180 ເມກາວັດ, ມີເຄື່ອງຈັກຜະລິດໄຟຟ້າຈຳນວນ 4 ໜ່ວຍ, ແຕ່ລະໜ່ວຍສາມາຜະລິດພະລັງງານໄຟຟ້າໄດ້ 45 ເມກາວັດ ໃນນີ້ໄດ້ສຳເລັດການຕິດຕັ້ງເຄື່ອງຈັກຜະລິດໄຟຟ້າຈຳນວນ 3 ໜ່ວຍ ແລະກຳລັງເລັ່ງດຳເນີນການຕິດຕັ້ງເຄື່ອງຈັກຜະລິດໄຟຟ້າໜ່ວຍທີ 4 ຄາດວ່າຈະໃຫ້ສຳເລັດພາຍ ໃນເດືອນກັນຍາທີ່ຈະມາເຖີງນີ້ການກໍ່ສ້າງທັງໝົດຂອງໂຄງການແມ່ນຈະໃຫ້ສຳເລັດໃນທ້າຍປີ 2020 ນີ້.

  ການກໍ່ສ້າງແມ່ນໄດ້ແບ່ງເປັນ 3 ໄລຍະ, ໄລຍະທີ 1 ແມ່ນໄດ້ກໍ່ສ້າງປະຕູປ່ອຍນໍ້າຈຳນວນ 6 ຊ່ອງເພື່ອລະບາຍນໍ້າໃຫ້ສະດວກໃນການກໍ່ສ້າງຂັ້ນຕອນຕໍ່ໄປ, ສ່ວນໄລ ຍະທີ 2 ໄດ້ສ້າງໂຕເຂື່ອນ, ຫຼັງຄາຂອງເຂື່ອນ (ສັນເຂື່ອນ) ແລະ ຫ້ອງຄວບຄຸມລະບົບຕ່າງໆ ແລະ ໄລຍະທີ 3 ແມ່ນຂັ້ນຕອນຂອງການຕິດຕັ້ງເຄື່ອງຈັກຜະລິດໄຟຟ້າ ຊຶ່ງພວມດຳເນີນງານໃນປະຈຸບັນ.  

  ສະເພາະເຂື່ອນນໍ້າອູທີ່ສ້າງສໍາເລັດໄປໃນເຟສ 1 ນັ້ນມີນໍ້າອູ 2, 5, 6 ສໍາລັບ ເຂື່ອນໃນເຟສທີ່ສອງທີ່ກໍາລັງສ້າງຢູ່ນີ້ມີນໍ້າອູ 1, 3, 4, ແລະ 7 ແລະເຂື່ອນນໍ້າອູ1 ນີ້ຫ່າງຈາກນະຄອນຫຼວງພະບາງປະມານ 45 ກິໂລແມັດ, ຫ່າງຈາກແມ່ນໍ້າ ຂອງ 15 ກິໂລແມັດ, ຕັ້ງຢູ່ແຄມທາງເລກ 13 ເໜືອ, ນັບແຕ່ລົງມືກໍ່ສ້າງໃນເດືອນເມສາ 2016 ມາຮອດປະຈຸບັນການກໍ່ສ້າງໜ້າວຽກໂດຍລວມແມ່ນສໍາເລັດ 90% ແລ້ວ, ວຽກເທເບຕົງສໍາເລັດ 100%. ເຂື່ອນນໍ້າ ອູ 1  ໄດ້ຈັດພິທີອ່ວຍນໍ້າໜ້າເຂື່ອນໃນເດືອນຕຸລາ 2017 ແລະ ໃນເດືອນມິຖຸນາ 2020 ສາມາດຜະລິດກະແສໄຟຟ້າຈາກເຄື່ອງປັ່ນໄຟໜ່ວຍທີ່ 1-2-3 ຊຶ່ງປະຈຸບັນກໍາລັງຕິດຕັ້ງເຄື່ອງປັ່ນໄຟໜ່ວຍທີ 4 ສ່ວນກະແສໄຟຟ້າແມ່ນຈະໄດ້ສົ່ງເຂົ້າສະຖານີໄຟຟ້າປາກມອງ ເມືອງນໍ້າບາກ ແລະສະຖານີໄຟຟ້າເມືອງຊຽງເງິນ.

   ທ່ານຫົວໜ້າໂຄງການຍັງກ່າວໃຫ້ຮູ້ຕື່ມວ່າ: ການສ້າງເຂື່ອນໄຟຟ້ານໍ້າອູ 1 ນີ້ ໄດ້ມີການກໍ່ສ້າງ ແລະຍົກລະດັບເສັ້ນທາງເລກທີ 13 ເໜືອທີ່ໄດ້ຜົນກະທົບຈາກໂຄງ ການກໍ່ສ້າງເຂື່ອນໄຟຟ້ານໍ້າອູ1 ຄວາມຍາວ 5 ກວ່າກິໂລແມັດ,ຍົກລະດັບເປັນທາງປູຢາງສອງຊັ້ນພ້ອມທັງສ້າງຂົວຂ້າມໃນເຂດທ່ມີຫ້ວຍ-ຮ່ອງນໍ້າໄຫຼຜ່ານ, ໃຫ້ມີຄວາມດວກສະບາຍໃນການສັນຈອນ ແລະເສັ້ນທາງດັ່ງກ່າວແມ່ນໄດ້ຜ່ານການກວດກາຈາກກະຊວງໂຍທາທິການ ແລະຂົນສົ່ງພ້ອມມອບ-ຮັບ ເປີດໃຫ້ໃຊ້ເປັນທາງການແລ້ວ.

   ອີງຕາມສັນຍາທີ່ບໍລິສັດກໍ່ສ້າງກັບລັດຖະບານລາວໄດ້ຕົກລົງຮ່ວມກັນນັ້ນ, ໂຄງການໄດ້ນຳໃຊ້ແຮງງານຄົນລາວບັນຈຸໃນໂຄງການແມ່ນຫຼາຍກວ່າ 60% ຂອງແຮງ ງານທັງໝົດ, ພະນັກງານທຸກຄົນແມ່ນໄດ້ຮັບການຝຶກອົບຮົມຜ່ານລະບົບຂອງໂຄງການ, ນອກຈາກນີ້ທາງໂຄງການຍັງໄດ້ຖືສຳຄັນໃນການຮັກສາສິ່ງແວດລ້ອມ ແລະລະບົບນິເວດຕ່າງໆທີ່ຢູ່ຂອບເຂດບໍລິເວນໂຄງການ,ພາຍຫຼັງໂຄງການກໍ່ສ້າງສຳເລັດແມ່ນຈະໄດ້ມອບໃຫ້ອົງການປົກຄອງເມືອງປາກອູ ແລະບ້ານທີ່ຢູ່ບໍລິເວນເຂດອ່າງໂຕ່ງເພື່ອສົ່ງເສີມ ການພັດທະນາໃຫ້ເປັນແຫຼ່ງທ່ອງທ່ຽວເພື່ອສ້າງລາຍໄດ້ໃຫ້ກັບພໍ່ແມ່ປະຊາຊົນທີ່ຢູ່ໃນບໍລິເວນນັ້ນ.

-------------

ຂຽນໂດຍ: ສີສຸວັນ                     

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์