ທົ່ວແຂວງຫຼວງພະບາງ ມີນັກຮຽນສອບເສັງຈົບຊັ້ນ ມ7 ຈຳນວນ 4.232 ຄົນ

 ເພື່ອເປັນເອກະພາບທົ່ວປະເທດໃນການສອບເສັງຈົບຊັ້ນມັດທະຍົມປາຍ ມ7 ວັນທີ 29 ກໍລະກົດ 2020 ທີ່ພະແນກສຶກສາທິການ ແລະກີລາແຂວງຫຼວງພະບາງໄດ້ຈັດພິທີສອບເສັງຈົບຊັ້ນມັດທະຍົມສຶກສາຕອນປາຍ ມ7 ສາຍສາມັນທົ່ວແຂວງຢ່າງເປັນທາງການໂດຍການເປັນປະທານຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ,ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກີລາແຂວງ, ໃຫ້ກຽດເຂົ້າຮ່ວມມີທ່ານ ແສງອາລຸນ ແກ້ວໃສຫົວ ໜ້າພະແນກກວດກາຕິດຕາມ ແລະປະເມີນຜົນກົມກິດຈະການນັກສຶກສາກະຊວງສຶກສາທິການ ແລະກີລາ, ທ່ານຫົວໜ້າຫ້ອງການສຶກສາທິການ ແລະກີລານະຄອນ ຫຼວງພະບາງ, ຜູ້ອຳນວຍການໂຮງຮຽນພະນັກງານຄູ-ຈານ, ຄະນະກຳມະການເຝົ້າຫ້ອງ ແລະນັກສອບເສັງເຂົ້າຢ່າງພ້ອມພຽງ.

  ທ່ານ ຊາຍສະຫວັນ ຈັນມານິດໄດ້ກ່າວລາຍງານວ່າ: ໃນສົກຮຽນ 2019-2020 ທົ່ວແຂວງຫຼວງ ພະບາງມີໂຮງຮຽນມັດທະຍົມສຶກສາທັງໝົດ 114 ແຫ່ງ, ມັດ ທະຍົມສົມບູນ 46 ແຫ່ງ, ມັດທະຍົມຕອນຕົ້ນ 67 ແຫ່ງ ແລະມັດທະຍົມປາຍ 1 ແຫ່ງ, ມີນັກສອບເສັງຈົບຊັ້ນມັດທະຍົມປາຍ ມ7 ທັງໝົດ 4.232 ຄົນ, ຍິງ 1.755 ຄົນ, ປະກອບມີສູນສອບເສັງທັງໝົດ 39 ສູນ, ມີຫ້ອງສອບເສັງ 217 ຫ້ອງ, ສົກຮຽນ 2019-2020 ນີ້ ກະຊວງສຶກສາທິການ ແລະກີລາໄດ້ກຳນົດວິຊາສອບເສັງທັງໝົດ 4 ວິຊາຄື: ພາສາລາວ-ວັນນະຄະດີ, ວິຊາຊີວະສາດ, ຄະນິດສາດ ແລະວິຊາພູມສາດ, ສອບເສັງໃນລະຫວ່າງ ວັນທີ 29-30 ກໍລະກົດ 2020.

   ໂອກາດນີ້ທ່ານ ວົງສະຫວັນ ເທບພະຈັນ ໄດ້ໃຫ້ກຽດຕັດຊອງຫົວບົດສອບເສັງໂດຍຊ່ອງໜ້າຄະນະປະທານ, ກຳມະການຄະນະຮັບຜິດຊອບ ແລະນັກສອບເສັງພ້ອມ ດຽວກັນນີ້ຍັງໄດ້ຮຽກຮ້ອງມາບັງຄະນະຮັບຜິດຊອບໃນແຕ່ລະສູນໂດຍສະເພາະບັນດາທ່ານອານຸກຳມະການດ້ານຕ່າງໆຕ້ອງພ້ອມກັນເອົາໃຈໃສ່ປະຕິບັດກົດລະບຽບຂອງການສອບເສັງໃຫ້ເຂັ້ມງວດ, ມີຄວາມໂປ່ງໃສ, ຍຸຕິທຳ, ມີຄວາມຮັບຜິດຊອບມີຈັນຍາບັນພ້ອມກັນຕ້ານສະກັດກັ້ນທຸກປາກົດການຫຍໍ້ທໍ້ທີ່ຈະເກີດຂຶ້ນໃນບັ້ນສອບເສັງຄັ້ງນີ້, ນ້ອງນັກສອບເສັງກໍຕ້ອງໄດ້ເອົາໃຈໃສ່ປະຕິບັດກົດລະບຽບ, ມີຄວາມອຸ່ນອ່ຽງທຸ່ນທ່ຽງສຸມທຸກສະຕິປັນຍາເຂົ້າໃນການແກ້ຫົວບົດສອບເສັງຂອງຕົນໃຫ້ຖືກຕ້ອງ ແລະ ສຳເລັດຕາມເວລາທີ່ໄດ້ກຳນົດໃຫ້.

_____________

ໜັງສືພິມເສດຖະກິດ-ສັງຄົມ

แชร์