ສະຫຼອງວັນໂອແລມປິກສາກົນ ຄົບຮອບ 126 ປີ

   ເນື່ອງໃນໂອກາດສະເຫຼີມສະຫຼອງວັນໂອແລມປິກສາກົນຄົບຮອບ 126 ປີ, ແຂວງສະຫວັນນະເຂດໄດ້ຮັບກຽດເປັນເຈົ້າພາບຈາກຄະນະກໍາມະການໂອແລມປິກແຫ່ງ ຊາດຈັດພິທີສະເຫຼີມສະຫຼອງຂຶ້ນໃນແລງວັນທີ 24 ກໍລະກົດ 2020 ທີ່ສວນສຸຂະພາບໜູຮັກ ພູມສະຫວັນ ນະຄອນໄກສອນພົມວິຫານ, ໂດຍການເຂົ້າຮ່ວມຂອງທ່ານ ພົນໂທ ແສງນວນ ໄຊຍະລາດ ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ, ທ່ານ ນາງ ແສງເດືອນ ຫຼັາຈັນທະບູນ ລັດຖະມົນຕີກະຊວງສຶກສາທິ ການ ແລະກີລາ, ປະທານຄະນະກໍາມະການໂອແລມປິກແຫ່ງຊາດ, ທ່ານ ສັນຕິພາບ ພົມວິຫານ ເລຂາພັກແຂວງເຈົ້າແຂວງສະຫວັນນະເຂດ, ທ່ານ ຄໍາເຜີຍ ຜັນທະ ຈອນ ປະທານສະພາປະຊາຊົນແຂວງ, ພ້ອມມີບັນດາການນໍາຂັ້ນສູນກາງ, ການນໍາຂອງແຂວງ, ກົງສູນໃຫຍ່ແຫ່ງລາຊະອານາຈັກໄທ, ຕະຫຼອດຮອດພະນັກງານ-ລັດ ຖະກອນ, ທະຫານ-ຕໍາຫຼວດ, ອົງການຈັດຕັ້ງແຂວງ, ນັກທຸລະກິດ-ຄ້າຂາຍ ແລະພໍ່ແມ່ປະຊາຊົນພາຍໃນແຂວງເຂົ້າຮ່ວມຢ່າງພ້ອມພຽງ.

   ໂອກາດດັ່ງກ່າວທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດກ່າວສະແດງຄວາມຕ້ອນຮັບຢ່າງອົບອຸ່ນຕໍ່ການນໍາພັກ-ລັດຂັ້ນສູນກາງພ້ອມບັນດາແຂກທີ່ເຂົ້າຮ່ວມໂດຍໄດ້ສະແດງຄວາມຂອບໃຈໄປຍັງຄະນະກໍາມະການໂອແລມປິກແຫ່ງຊາດທີ່ເລືອກເອົາແຂວງສະຫວັນນະເຂດເປັນບ່ອນຈັດງານສະເຫຼີມສະຫຼອງໃນປີນີ້ຊຶ່ງເປັນການສະທ້ອນໃຫ້ເຫັນເຖິງການເຊື່ອໝັ້ນ ແລະການໃຫ້ຄວາມສໍາຄັນຕໍ່ແຂວງສະຫວັນນະເຂດທີ່ເປັນຖິ່ນກໍາເນີດຂອງປະທານ ໄກສອນ ພົມວິຫານ ວິລະບຸລຸດແຫ່ງ ຊາດລາວ ແລະບັນດາຜູ້ນໍາຮຸ່ນທໍາອິດເຊັ່ນ: ທ່ານ ໜູຮັກ ພູມສະຫວັນ ແລະທ່ານ ພູນ ສີປະເສີດ, ການສະເຫຼີມສະຫຼອງວັນໂອແລມປິກສາກົນຄົບຮອບ 126 ປີຄັ້ງນີ້ຈັດຂຶ້ນໃນທ່າມກາງບັນຍາກາດທີ່ຄະນະພັກທຸກຂັ້ນຕັ້ງໜ້າອອກແຮງແຂ່ງຂັນຈັດຕັ້ງປະຕິບັດຄາດໝາຍສູ້ຊົນຂອງມະຕິກອງປະຊຸມໃຫຍ່ຂັ້ນຕ່າງໆ ຕິດພັນກັບການຈັດ ຕັ້ງປະຕິບັດເປົ້າໝາຍພັດທະນາແບບຍືນຍົງ, ໂດຍສະເພາະຄາດໝາຍສົ່ງເສີມໃຫ້ມວນຊົນທຸກເພດ, ທຸກໄວເຂົ້າຮ່ວມຫັດກາຍຍະບໍລິຫານ, ການອອກກໍາລັງກາຍ ແລະການຫຼິ້ນກີລາກາຍະກໍາຖືເອົາວຽກງານກີລາເປັນໜຶ່ງໃນກິດຈະກໍາຫຼັກເພື່ອເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ຫັນເອົາວຽກງານກີລາລົງສູ່ປະຊາ ຊົນ ແລະສົ່ງເສີມໃຫ້ຊາວໜຸ່ມ-ເຍົາວະຊົນກໍຄືທົ່ວສັງຄົມຫັນມາຫຼິ້ນກີລາເພື່ອສຸຂະພາບໃຫ້ຮ່າງກາຍແຂງແຮງ,ມີຈິດໃຈເບີກບານມ່ວນຊື່ນບໍ່ມົ້ວສຸມກັບສິ່ງເສບຕິດ, ພ້ອມນີ້ທ່ານຍັງໄດ້ກ່າວເຊີນຊວນບັນດາແຂກທີ່ເດີນທາງຈາກຕ່າງ ແຂວງພາຍຫຼັງທີ່ສໍາເລັດການສະເຫຼີມສະຫຼອງງານຄັ້ງນີ້ແລ້ວເຊີນຢ້ຽມຊົມສະຖານທ່ອງທ່ຽວຕ່າງໆ ຂອງແຂວງເປັນຕົ້ນ: ເຂດອະນຸລັກປ່າໂຄກໂອງ-ມັ່ງ ທີ່ໄດ້ຖືກຍົກລະດັບເປັນເຂດອະນຸລັກລະດັບຊາດ, ປູສະນີຍະສະຖານທີ່ສໍາຄັນຕ່າງໆຂອງແຂວງເຊັ່ນ: ພະທາດອີ່ງຮັງ, ພະທາດໂຜ່ນ, ເຂດອະນຸລັກຕົວເມືອງເກົ່າ ແລະແຫຼ່ງທ່ອງທ່ຽວທາງທໍາມະຊາດອື່ນໆ.

   ໂອກາດນີ້ທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະກີລາ, ຮອງປະທານເລຂາທິການຄະນະກໍາມະການໂອແລມປິກແຫ່ງຊາດຍົກໃຫ້ເຫັນ ຄວາມໝາຍຄວາມສໍາຄັນຂອງກີ ລາໂອແລມປິກ ແລະການກະກຽມງານວ່າ: ເມື່ອເຖິງວັນທີ 23 ມິຖຸນາຂອງທຸກປີບັນດາຄະນະກໍາມະການໂອແລມປິກຂອງຊາດສະມາ ຊິກຈະໄດ້ຈັດຕັ້ງສະເຫຼີມສະຫຼອງວັນດັ່ງກ່າວ ຊຶ່ງເອີ້ນວ່າວັນໂອແລມປິກດ້ວຍກິດຈະກໍາຕ່າງໆ ຕາມຮູບ ແບບ ແລະຕາມຄວາມເໝາະສົມຂອງໃຜລາວ, ສໍາລັບປະເທດລາວເຮົາໄດ້ຈັດສະເຫຼີມສະຫຼອງທຸກໆປີໂດຍຜັດປ່ຽນຈັດໄປແຕ່ລະແຂວງໝູນວຽນກັນ,ຊຶ່ງໃນປີຜ່ານມາຮູບແບບການຈັດແມ່ນໄດ້ເຊີນຄະນະໂອແລມປິກຈາກປະເທດໃກ້ ຄຽງເຂົ້າຮ່ວມງານນໍາ,ແຕ່ຍ້ອນມີສະພາບການແຜ່ລະບາດຂອງໂຄວິດ-19 ຈຶ່ງສະເໜີຈັດສະເພາະພາຍໃນແຕ່ຕ້ອງຮັກສາໄວ້ການອອກກໍາລັງກາຍ, ຮັກສາສຸຂະພາບເພື່ອສ້າງຄວາມສາມັກຄີ, ຄວາມເຂົ້າໃຈ, ຄວາມມ່ວນຊື່ນ, ມີການແລກປ່ຽນຄວາມຄິດເຫັນ, ແລກປ່ຽນວັດທະນະທໍາເຊິ່ງກັນ ແລະກັນແນໃສ່ການພັດທະນາວຽກ ງານດ້ານຕ່າງໆ.

  ຈາກນັ້ນທ່ານ ນາງ ແສງເດືອນຫຼັາຈັນທະບູນ ປະທານຄະນະກໍາມະການໂອແລມປິກແຫ່ງຊາດກ່າວເປີດງານພ້ອມສະແດງຄວາມຂອບໃຈຕໍ່ແຂວງສະຫວັນນະເຂດ ເຈົ້າພາບ, ຄະນະຮັບຜິດຊອບຈັດງານທຸກຂັ້ນ, ຜູ້ສະໜັບສະໜູນງານທີ່ໄດ້ພ້ອມກັນຫ້າງຫາກະກຽມເຮັດໃຫ້ງານເກີດຂຶ້ນຕາມວັນເວລາທີ່ຄາດໝາຍໄວ້ຢ່າງສະຫງ່າ ງາມ, ຮຽກຮ້ອງໃຫ້ທຸກພາກສ່ວນພ້ອມກັນຮ່ວມສະເຫຼີມສະຫຼອງວັນໂອ ແລມປິກສາກົນຄົບຮອບ 126 ປີດ້ວຍກິດຈະກໍາຕ່າງໆ ຢ່າງເບີກບານມ່ວນຊື່ນ ແລະສ້າງໄດ້ຄວາມສາມັກຄີມີວິໄນຕາມຈິດໃຈໂອແລມປິກສາກົນ ແລະມູນເຊື້ອອັນດີງາມຂອງຊາວນະຄອນໄກສອນພົມວິຫານກໍຄືຊາວແຂວງສະຫວັນນະເຂດທຸກຖ້ວນໜ້າ.

   ສໍາລັບກິດຈະກໍາຕ່າງໆທີ່ໃຊ້ເຂົ້າເພື່ອສະເຫຼີມສະຫຼອງໃນງານຄັ້ງນີ້ປະກອບດ້ວຍ: ຂະບວນແລ່ນ-ຍ່າງ, ຂະບວຂີ່ລົດຖີບ, ກີລາດຶງເຊືອກ, ຂີ່ໄມ້ໂຖກເຖກ, ແລ່ນກະ ເປົ໋າ, ນອກນັ້ນຍັງມີຂະບວນສິລະປະຈາກບັນດານ້ອງນັກຮຽນພ້ອມດ້ວຍການເຕັ້ນແອວໂລບິກນຳອີກ, ທັງນີ້ກໍ່ເພື່ອໃຫ້ຜູ້ເຂົ້າຮ່ວມໄດ້ຊື່ນຊົມຄວາມງົດງາມຂອງເທສະບານນະຄອນໄກສອນ ພົມວິຫານ ພ້ອມທັງຊົມການພັດທະນາເສດຖະກິດ-ສັງຄົມຕ່າງໆຂອງແຂວງສະຫວັນນະເຂດ.

____________

ໜັງສືພິມເສດຖະກິດ-ສັງຄົຄມ

แชร์