ຫົວພັນເຊັນສັນຍາສ້ອມແປງທາງຫຼວງທ້ອງຖິ່ນ

  ພິທີເຊັນສັນຍາໄດ້ຈັດຂຶ້ນໃນວັນທີ 24 ກໍລະກົດ ທີ່ພະແນກໂຍທາທິການ ແລະຂົນສົ່ງແຂວງຫົວພັນໂດຍການເຂົ້າຮ່ວມຂອງທ່ານ ພັນທອງ ເພັດໄຊສົມພັນ ຮອງເຈົ້າແຂວງໆຫົວພັນ, ທ່ານ ຮຸ່ງອາລຸນ ບຸນທະເມືອງ ຫົວໜ້າພະແນກໂຍທາທິການແລະຂົ່ນສົ່ງແຂວງ, ມີຫົວໜ້າຮອງຫົວໜ້າພະແນກການທີ່ກ່ຽວຂ້ອງ, ບໍລິສັດຮັບເໝົາກໍ່ສ້າງຕະຫຼອດຮອດພະນັກງານວິຊາການພະແນກໂຍທາທິການ ແລະຂົນສົ່ງເຂົ້າຮ່ວມ.​

  ພິທີເຊັນສັນຍາໂຄງການກໍ່ສ້າງສ້ອມແປງບັນດາເສັ້ນທາງຫຼວງທ້ອງຖິ່ນໃນຄັ້ງນີ້ລວມມູນຄ່າທັງໝົດ 31,4 ຕື້ກີບ ໂດຍແມ່ນທຶນກູ້ຢຶມຈາກທະນາຄານໂລກປະກອບມີ 3 ເສັ້ນທາງຄື: ເສັ້ນທາງແຕ່ບ້ານປຸງໄຮ, ເມືອງຮ້ຽມ-ຊາຍແດນຊຽງຂວາງມີຄວາມຍາວ 36 ກິໂລແມັດ ໂດຍມອບໃຫ້ບໍລິສັດກິ່ງແກ້ວອຸດົມກໍ່ສ້າງຂົວທາງຈໍາກັດຜູ້ດຽວເປັນຜູ້ຮັບເໝົາກໍ່ສ້າງສ້ອມແປງຊຶ່ງມີມູນຄ່າ 12,4 ຕື້ກີບ, ເສັ້ນທາງແຕ່ເມືອງກວັນ-ລ້ອງກວ້າງ ແລະເສັ້ນທາງຫີນເງີບ-ຫ້ວຍບໍ ເມືອງກວັນ, ມີຄວາມຍາວທັງໝົດ 9 ກິໂລແມັດກວ່າ, ໂດຍແມ່ນບໍລິສັດຈະເລີນຊໍາກໍ່ສ້າງສົ່ງເສີມກະສິກໍາຂາອອກ-ຂາເຂົ້າຈໍາກັດເປັນຜູ້ຮັບເໝົາກໍ່ສ້າງ,ມີມູນຄ່າການກໍ່ສ້າງ 7,2 ຕື້ກີບ, ເສັ້ນທາງແຕ່ບ້ານພຽງຖີ່ນ-ບ້ານຄາ ເມືອງຊໍາໃຕ້, ມີຄວາມຍາວທັງໝົດ 20 ກິໂລແມັດ, ດຍມອບໃຫ້ບໍລິສັດຈິດຈະເລີນກໍ່ສ້າງເປັນຜູ້ຮັບເໝົາກໍ່ສ້າງ ແລະ ສ້ອມແປງ, ມູນຄ່າ 11,8 ຕື້ກີບ.

   ເມື່ອການກໍ່ສ້າງສ້ອມແປງບັນດາເສັ້ນທາງນີ້ສໍາເລັດຈະທຽວໄດ້ສອງລະດູເຮັດໃຫ້ການໄປມາຫາສູ່ລະຫວ່າງເມືອງຕໍ່ເມືອງ, ບ້ານຕໍ່ບ້ານ ແລະການຄ້າຂາຍແລກປ່ຽນສິນຄ້າມີຄວາມສະດວກດີຂຶ້ນກວ່າເກົ່າ.

___________

ຂຽນໂດຍ: ວັນແສງ >>: ໜັງສືພິມເສດຖະກິດ-ສັງຄົມ

แชร์