ປູກເຂົ້າຫັນເປັນທັນສະໄໝເພື່ອຫຼຸດຜ່ອນແຮງງານຊາວນາ

  ໃນວັນທີ 25 ກໍລະກົດ 2020 ສູນສົ່ງເສີມກະສິກໍາທົ່ງຮາບ-ທ່າງ່ອນ ພະແນກກະສິກໍາຮ່ວມກັບບໍລິສັດເມືອງລາວຟູດຈໍາກັດ ເປີດຂະບວນການປູກເຂົ້າຕາມທິດຫັນເປັນທັນສະໄໝ ແລະຫຼຸດຜ່ອນແຮງງານຊາວນາທີ່ບ້ານທ່າສົ້ມມໍ ເມືອງໄຊທານີ ນະຄອນຫຼວງວຽງຈັນ ເຂົ້າຮ່ວມໂດຍທ່ານ ຫຼ້າສາຍ ນວນທາສິງ ຫົວໜ້າພະແນກກະສິກໍາ ແລະປ່າໄມ້ນະຄອນຫຼວງວຽງຈັນ, ທ່ານ ໜູກີ ສີຫາລາດ ຮອງເຈົ້າເມືອງໄຊທານີມີບັນດາທ່ານທີ່ຕາງໜ້າຈາກພາກສ່ວນກ່ຽວຂ້ອງພ້ອມດ້ວຍພະນັກງານວິຊາການ ແລະຊາວກະສິກອນ.

  ທ່ານ ຈັນໂທ ຈັນງາຄໍາ ຮອງຫົວໜ້າສູນໄດ້ລາຍງານກ່ຽວກັບການຈັດຕັ້ງປະຕິບັດວຽກງານການຊຸກຍູ້ສົ່ງເສີມການປູກເຂົ້າຕາມທິດກັນເປັນອຸດສາຫະກໍາ ແລະທັນສະ ໄໝເພື່ອທົດແທນແຮງງານຊາວກະສິກອນເຂົ້າໃນການຜະລິດເຂົ້າໃນໄລຍະຜ່ານມາສູນສົ່ງເສີມກະສິກໍາທົ່ງຮາບ-ທ່າງ່ອນໂດຍໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນເລີ່ມກໍ່ສ້າງມາແຕ່ປີ 1972 ໄດ້ຮັບການຊ່ວຍເຫຼືອມາແລ້ວ 2ຄັ້ງ ແລະຄັ້ງຫຼ້າສຸດແມ່ນຕົ້ນປີ 2019 ສໍາເລັດໃນເດືອນ 3 ປີ 2020 ຊຶ່ງໄດ້ປະກອບມີຈັກສູບນໍ້າ 3 ຊຸດຢູ່ສະຖານີແກ້ງໄຄ້, ສະຖານີລາດຄວາຍ 4 ຊຸດ, ປະຕູນໍ້າທັງໝົດ 79 ຊຸດ, ເຮືອນເຝົ້າຍາມ 2 ຫຼັງ ແລະລົດເກດ 1 ຄັນ ໃນກາງເດືອນເມສາ 2020 ໄດ້ເປີດນໍາໃຊ້ຊົນລະປະທານເພື່ອຮັບໃຊ້ເຂົ້າໃນການຜະລິດລະດູນາປີ 2020.

  ຂອບເຂດສູນສົ່ງເສີມກະສິກໍາທົ່ງຮາບ-ທ່າງ່ອນກວມເອົາ 5 ບ້ານຄື: ບ້ານພູຄໍາ, ແກ້ງໄຄ້, ທ່າສົ້ມມໍ, ລາດຄວາຍ ແລະບ້ານອຸດົມຜົນມີເນື້ອນາທີ່ທັງໝົດ 658 ເຮັກ ຕາ, ມີຄູກັນນໍ້າຖ້ວມຍາວ 9 ກິໂລແມັດ ອ້ອມຂອບເຂດທົ່ງຮາບ, ມີລະບົບຄອງເໝືອງແລະຄອງລະບາຍຄົບຊຸດເຂດທົ່ງຮາບເປັນນາໄຮ່ໃຫຍ່ເໝາະສົມແກ່ການນໍາໃຊ້ກົນ ຈັກເຂົ້າໃນການຜະລິດຕາມທິດຫັນເປັນອຸດສະຫະກໍາ ແລະທັນສະໄໝເພື່ອທົດແທນແຮງງານຂອງຊາວກະສິກກອນໃນໄລຍະ 3 ປີຜ່ານມາທາງສູນພວກເຮົາໄດ້ປະສົບກັບບັນຫາໄພແຫ້ງແລ້ງຍ້ອນສະພາບຈັກສູບນໍ້າສະຖານີແກ້ງໄຄ້ເປ່ເພ່ບໍ່ສາມາດທໍາການຜະລິດໄດ້ຕົກມາຮອດລະດູນາປີ 2020 ຈຶ່ງໄດ້ປຸກລະດົມຊາວນາໃນເຂດທົ່ງຮາບເຮັດການຜະລິດໃນເນື້ອທີ່ແຜນການ 500 ເຮັກຕາ ປະຈຸບັນການປັກດໍາແມ່ນສໍາເລັດແລ້ວ 95% ສ່ວນຫຼາຍແມ່ນນາຫວ່ານແນວພັນເຂົ້າແມ່ນນໍາໃຊ້ເຂົ້າທ່າດອກຄໍາ 8+11 ເຂົ້າຈ້າວຫອມມະລິ, ເຂົ້າ 450 ປີ, ເຂົ້າຈ້າວ cr203 ຫອມຫາງດໍາ ແລະ ກຂ6.

  ສະພາບເນື້ອທີ່ນາຂອງສູນ 33 ເຮັກຕາ ໃນນີ້ຜະລິດເປັນແນວພັນເຂົ້າລຸ້ນ 3 ເນື້ອທີ່ 14 ເຮັກຕາ ທ່າດອກຄໍາ 8 ນອກຈາກນັ້ນແມ່ນການຜະລິດເປັນສິນຄ້າຄາດ ຄະເນຜົນຜະລິດແມ່ນ 3 ໂຕນຕໍ່ເຮັກຕາ ສະເພາະເຂດທົ່ງຮາບການນໍາໃຊ້ກົນຈັກເຂົ້າໃນການຜະລິດລະດູນາປີ 2020 ມີ: ກຽມດິນໄຖ-ຄາດນໍາໃຊ້ກົນຈັກ 100% ເທົ່າກັບ 500 ເຮັກຕາ, ປັກດໍາດ້ວຍກົນຈັກ 4% ເທົ່າກັບ20 ເຮັກຕາ, ນາຫວ່ານ 91% ເທົ່າກັບ 455 ເຮັກຕາ, ປັກດໍາດ້ວຍແຮງງານຄົນ 5% ເທົ່າກັບ 25 ເຮັກຕາກ່ຽວດ້ວຍກົນຈັກ 85% ເທົ່າກັບ 425 ເຮັກຕາ ເພື່ອເຮັດໃຫ້ວຽກງານການຜະລິດກະສິກໍາຫັນເປັນທັນສະໄໝອົງການປົກຄອງເມືອງ ແລະບ້ານໄດ້ປຸກລະດົມຊາວກະສິກອນເຂົ້າຮ່ວມການຈັດຕັ້ງປະຕິບັດໃນເນື້ອທີ່ການຜະລິດຂອງຕົນໃຫ້ເປັນຂະບວນການຟົດຟື້ນ.

-----------------

ຂຽນໂດຍ: ແພງຕາ, ໜັງສືພິມເສດຖະກິດ-ສັງຄົມ

 

แชร์