ມອບ-ຮັບຕຳແໜ່ງສາດສະດາຈານພິເສດ

  ວັນທີ 27 ກໍລະກົດ 2020 ທີ່ນະຄອນຫຼວງວຽງຈັນ ມະຫາວິທະຍາໄລ ວິທະຍາສາດສຸຂະພາບໄດ້ຈັດພິທີມອບ-ຮັບຕໍາແໜ່ງວິທະຍາຖານະທາງວິຊາການ (ສາດສະ ດາຈານພິເສດ ຫຼື Visiting Professor) ຈາກມະຫາວິທະຍາໄລອ໋ອກຟອດ, ປະເທດອັງກິດໃຫ້ແກ່ ຮສ ດຣ ມາຍຟອງ ມາຍຊາຍ ຮອງອະທິບໍດີມະຫາວິທະຍາໄລວິທະຍາສາດສຸຂະພາບໂດຍເປັນກຽດການເຂົ້າຮ່ວມຂອງທ່ານ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ Jonh Pearson ເອກອັກຄະລັດສະທູດປະເທດອັງກິດປະຈໍາລາວ, ມີອະທິບໍດີມະຫາວິທະຍາໄລວິທະຍາສາດສຸຂະພາບ, ຮອງລັດຖະມົນຕີ, ຮອງອະທິບໍດີ, ຫົວໜ້າ, ຄະນະກົມ, ຄະນະບໍດີ, ຄະນະສະຖາບັນ-ສູນ, ຄະນະອໍານວຍການໂຮງໝໍ, ສະພາຄຸ້ມຄອງວິຊາປິ່ນປົວພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ການມອບຕໍາແໜ່ງທາງວິຊາການດັ່ງກ່າວຖືວ່າເປັນເຫດການທີ່ມີຄວາມໝາຍຄວາມສໍາຄັນຄັ້ງປະຫວັດສາດສໍາລັບວົງການນັກວິຊາການລາວໂດຍສະເພາະຂະແໜງການສາທາລະນະສຸກເພາະເປັນຄັ້ງທໍາອິດທີ່ນັກວິຊາການທາງການແພດລາວໄດ້ຮັບນາມມະຍົດອັນຊົງກຽດດັ່ງກ່າວຈາກມະຫາວິທະຍາໄລອ໋ອກຟອດ, ປະເທດອັງກິດ ຊຶ່ງເປັນໜຶ່ງໃນບັນດາມະຫາວິທະຍາໄລທີ່ມີຊື່ສ່ຽງໂດ່ງດັງ 5 ອັນດັບຕົ້ນໆຂອງໂລກ,ພ້ອມທັງເປັນປະຫວັດສາດໜ້າໃໝ່ຂອງວົງການວິຊາການ ຫຼືນັກຄົ້ນຄວ້າຂອງລາວໂດຍສະເພາະໃນຂະແໜງການສາທາລະນະສຸກທີ່ປະສົບຜົນສໍາເລັດອັນໃຫຍ່ຫຼວງຂອງເວທີສາກົນ ແລະທ່ານ ມາຍຟອງ ມາຍຊາຍ ກໍ່ເປັນນັກຄົ້ນຄວ້າຜູ້ທໍາອິດຂອງລາວທີ່ໄດ້ຮັບນາມມະຍົກທາງວິຊາການອັນຊົງກຽດຈາກມະຫາວິທະຍາໄລອ໋ອກຟອດ,ພາຍຫຼັງການມອບໝາຍ ແລະແຕ່ງຕັ້ງດັ່ງກ່າວຜູ້ກ່ຽວຍັງຈະຕ້ອງໄດ້ປະກອບສ່ວນເຂົ້າໃນວຽກງານການສິດສອນ ແລະເຮັດການສຶກສາຄົ້ນຄວ້າຮ່ວມກັບມະຫາວິທະຍາໄລອ໋ອກຟອດອີກຕໍ່ໄປໃນອະນາຄົດ.

  ທ່ານ ມາຍຟອງ ມາຍຊາຍ ຮອງອະທິບໍດີມະຫາວິທະຍາໄລວິທະຍາສາດສຸຂະພາບຈົບການສຶກສາລະດັບປະລິນຍາຕີການແພດມະຫາວິທະຍາໄລວິທະຍາສາດສຸຂະພາບ (ມວສ) ສປປ ລາວ ໃນປີ 1993 ແລະຖືກບັນຈຸຊັບຊ້ອນເປັນອາຈານສອນໃນມະຫາວະທະຍາໄລດັ່ງກ່າວໃນປີ 1994 ແລະ ເປັນແພດປິ້ນປົວປະຈໍາພະແນກເດັກໂຮງໝໍມະໂຫສົດໃນເວລາດຽວກັນ, ຮອດປີ 1997 ທ່ານໄດ້ໄປສຶກສາຮໍ່າຮຽນຕໍ່ໃນລະດັບປະລິນຍາໂທ ແລະເອກທີ່ມະຫາວິທະຍາໄລມະຫິດົນ, ປະເທດໄທໃນສາຂາແພດເຂດຮ້ອນ ແລະໄດ້ສໍາເລັດການສຶກສາຢ່າງສົມບູນປີ 2001, ໃນປີ 2013 ທ່ານໄດ້ສືບຕໍ່ສຶກສາຄົ້ນຄວ້າໃນລະດັບເໜືອປະລິນຍາເອກທາງດ້ານການແພດເຂດຮ້ອນທີ່ມະຫາວິທະຍາໄລມະຫິດົນ ແລະມະຫາວິທະຍາໄລອ໋ອກຟອດສໍາເລັດໃນປີ2008, ໃນຂະນະທີ່ກໍາລັງຄົ້ນຄວ້າທີ່ມະຫາວິທະຍາໄລມະຫິດົນ ແລະມະຫາວິທະຍາໄລອ໋ອກຟອດທ່ານມີໂອກາດເຮັດການຄົ້ນຄວ້າຮ່ວມກັບບັນດາອາຈານ, ສາດສະດາຈານ ແລະນັກຄົ້ນຄວ້າທີ່ມີຊື່ສ່ຽງລະດັບໂລກຫຼາຍໆ ທ່ານຈາກທັງສອງມະຫາວິທະຍາໄລດັ່ງ ກ່າວ ແລະກໍ່ໄດ້ຮັບຄວາມໄວ້ວາງໃຈ ແລະເປັນທີ່ຍອມຮັບຂອງບັນດາຊ່ຽນຊານລະດັບໂລກໃນປີ 2000 ທ່ານໄດ້ຂົນຂວາຍເອົາການຊ່ວຍເຫຼືອ ແລະ ໄດ້ຮ່ວມມືກັບຊ່ຽວ ຊານຈາກມະຫາວິທະຍາໄລອ໋ອກຟອດກໍ່ຕັ້ງໜ່ວຍງານຄົ້ນຄວ້າພະຍາດເຂດຮ້ອນທີ່ໂຮງໝໍມະໂຫສົດທີ່ມີຊື່ວ່າ: (Lao-Oxford-Maho sot Hospital-Well come Trust Research Unit ຫຼືLOMWRU) ຊຶ່ງຕະຫຼອດໄລຍະ 20 ປີຜ່ານມາໂຄງການດັ່ງກ່າວໄດ້ມີຜົນງານຢ່າງໃຫຍ່ຫຼວງໃນການຄົ້ນຄວ້າພະຍາດຊຶມເຊື້ອ-ພະຍາດເຂດຮ້ອນລວມທັງການໃຫ້ບໍລິການບົ່ງມະຕິພະຍາດທາງຫ້ອງວິເຄາະ ແລະການກໍ່ສ້ງບຸກຄະລະກອນ-ນັກຄົ້ນຄວ້າພາຍໃນປະເທດລາວ, ນອກນັ້ນຍັງໄດ້ຮັບລາງວັນຊະນະເລີດຈາກສາມະຄົມແພດເດັກນາໆຊາດໃນສະຖາທີ່ມີຜົນງານການຄົ້ນຄວ້າດີເດັ່ນລະດັບໂລກ ແລະອື່ນໆ.

____________

ຂຽນໂດຍ: ວົງມະນີ                

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์