ຊົມເຊີຍເຄິ່ງປີພາສີດ່ານສາກົນວັງເຕົ່າເກັບລາຍຮັບເຂົ້າງົບໄດ້ຕາມແຜນ

   ໃນ 6 ເດືອນຕົ້ນມານີ້ເຖິງແມ່ນວ່າບັນດາປະເທດໃນໂລກກໍຄື ສປປ ລາວ ຈະຮັບຜົນກະທົບຢ່າງໜັກຈາກການແຜ່ລະບາດຂອງພະຍາດໂຄວິດ-19 ເຮັດໃຫ້ການພັດ ທະນາເສດຖະກິດ-ສັງຄົມມີລັກສະນະຖົດຖອຍທຸລະກິດໃນຫຼາຍຂະແໜງການຢຸດສະຫງັກແຕ່ເຖິງຢ່າງໃດກໍ່ຕາມການຈັດເກັບລາຍຮັບເຂົ້າງົບປະມານລັດຂອງພາສີດ່ານສາກົນວັງເຕົ່າກໍ່ເດີນໜ້າຈັດຕັ້ງປະຕິບັດໄດ້ຢ່າງມີປະສິດທິພາບສາມາດເກັບໄດ້ຕາມແຜນການທີ່ວາງໄວ້.

   ທ່ານ ວິເລືອງ ວໍລະບຸດ ຮອງຫົວໜ້າດ່ານສາກົນວັງເຕົ່າທັງເປັນຫົວໜ້າພາສີດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ໄດ້ເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມ ໃຫ້ຮູ້ວ່າ: ສະພາບໂດຍລວມດ່ານພາສີສາກົນວັງເຕົ່າແມ່ນມີຄວາມເປັນລະບຽບຮຽບຮ້ອຍດີ ແລະ ມີຄວາມສະຫງົບໂດຍພື້ນຖານ, ໂດຍຖືເອົາວຽກ ງານເຜີຍແຜ່-ເຊື່ອມຊຶມເປັນວຽກງານສໍາຄັນໃນການຈັດຕັ້ງປະຕິບັດຜັນຂະຫຍາຍເນື້ອໃນຈິດໃຈຂອງຂັ້ນເທິງ, ຊຶ່ງດ່ານພາສີສາກົນວັງເຕົ່າໄດ້ຮັບໂຕເລກແຜນການຕາມການມອບໝາຍໃນສົກປີ 2020 ແມ່ນຈໍານວນ 721 ຕື້ກວ່າກີບ ເພີ່ມຂຶ້ນຈາກປີກ່ອນ 8,66%.

  ແນວໃດກໍດີຜ່ານການຈັດຕັ້ງປະຕິບັດຕົວຈິງໃນ 6 ເດືອນຕົ້ນປີ 2020 ສາມາດຈັດເກັບລາຍຮັບໄດ້ທັງໝົດຈໍານວນ 361 ຕື້ກວ່າກີບ,  ເທົ່າກັບກວ່າ 100% ຂອງແຜນການ 6 ເດືອນ ແລະກວ່າ 50% ຂອງແຜນການປີເມື່ອທຽບໃສໄລຍະດຽວກັນຂອງປີກ່ອນແມ່ນເພີ່ມຂຶ້ນກວ່າ 6%.

  ສໍາລັບທິດທາງແຜນການ ແລະມາດຕະການໃນການຈັດເກັບລາຍຮັບ 6 ເດືອນ ທ້າຍປີ 2020 ທ່ານ ວິເລື່ອງ ວໍລະບຸດ ຢໍ້າຕື່ມວ່າທາງດ່ານຈະໄດ້ສືບຕໍ່ນໍາໃຊ້ມາດຕະການໃນຫຼາຍຮູບແບບ, ໂດຍນໍາໃຊ້ຮູບການຊຸກຍູ້ປຸກລະດົມຜູ້ປະກອບການເປັນຫຼັກ, ໃຫ້ເຂົາເຈົ້າຕື່ນຕົວຫັນມາປະກອບກິດຈະການນໍາເຂົ້າ-ສົ່ງອອກ ແລະ ໃຊ້ບໍລິການຢູ່ດ່ານພວກເຮົາໃຫ້ນັບມື້ນັບຫຼາຍຂຶ້ນ.

____________

ຂຽນໂດຍ: ໂພທິຣາຊ                       

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์