ຕາດນໍ້າແກ້ວ ມົນສະເໜ່ທີ່ໜ້າຫຼົງໄຫຼ ຂອງແຂວງຫຼວງນໍ້າທາ

 ເມື່ອເອີ່ຍເຖິງແຫຼ່ງທ່ອງ ທ່ຽວຢູ່ປະເທດເຮົາບໍ່ວ່າຈະເປັນແຫຼ່ງທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດແລ້ວມີ ຫຼາກຫຼາຍບ່ອນ ຊຶ່ງຄົນລາວເຮົາລວມທັງຄົນຕ່າງປະເທດເມື່ອໄດ້ ໄປຮອດຈອດເຖິງຕ່າງກໍໂອໂຫໂອພະເຈົ້າແລ້ວແຕ່ຈະວ່າເພາະພາບທີ່ເຫັນສິ່ງທີ່ໄດ້ສຳຜັດມັນຊ່າງມະຫັດສະຈັນມັນຊ່າງງົດງາມຢ່າງ ເຫຼືອເຊື່ອສຳລັບມື້ນີ້ຂໍພາທ່ານໄປ ເມືອງສິງ ແຂວງຫຼວງນໍ້າທາເພື່ອ ໄປສໍາຜັດກັບອາກາດບໍລິສຸດໃນ ຍາມເຊົ້າກັນ.

  ນໍ້າຕົກຕາດນໍ້າແກ້ວ ເປັນສະຖານທີ່ທ່ອງທ່ຽວທຳມະຊາດທີ່ສວຍງາມແຫ່ງໜຶ່ງທີ່ບໍ່ຄວນພາດສຳລັບຜູ້ທີ່ມັກ-ຮັກທຳມະຊາດ, ຮັກການຍ່າງຊົມປ່າ, ໄດ້ສໍາຜັດກັບອາກາດບໍລິສຸດ, ມີນໍ້າໃສໄຫຼເຢັນດີທີ່ສໍາຄັນສາມາດລົງຫຼິ້ນນໍ້າໄດ້ສະດວກສະບາຍຫ່າງຈາກເທສະບານເມືອງສິງ 10 ກິໂລແມັດ ແລະ ແຫຼ່ງທ່ອງທ່ຽວນໍ້າຕົກຕາດນໍ້າແກ້ວ      ຫ່າງຈາກບ້ານນໍ້າແກ້ວ 10 ກິໂລແມັດ, ຫົນທາງເຂົ້າຫາແມ່ນເສັ້ນທາງຍ່າງໄປໄຮ່ຂອງຊາວບ້ານ ຊຶ່ງ ຕາດດັ່ງກ່າວເອີ້ນຕາມຊື່ຂອງບ້ານ ຄື “ບ້ານນໍ້າແກ້ວ”.

  ນໍ້າຕົກຕາດນີ້ມີລັກສະນະເປັນນໍ້າຕົກຜ່ານຫີນຊັນຫຼາຍໆຊັ້ນ, ຈະເບິ່ງງາມໃນຍາມລະດູຝົນ, ຢູ່ອ້ອມຮອບບໍລິເວນນໍ້າຕົກຕາດຍັງມີທຳມະຊາດ ແລະໝູ່ບ້ານຊົນເຜົ່າ ເປັນຕົ້ນແມ່ນເຜົ່າອາຄາທີ່ຍັງມີວິຖີການດຳລົງຊີວິດແບບດັ່ງເດີ່ມ.

--------

 ໂດຍ: ວົງມະນີ

• 29/07/2020