2 ພາກສ່ວນ ມອບເຄື່ອງກີລາໃຫ້ສະຫະພັນບານສົ່ງແຫ່ງຊາດ

  ສະໂມສອນບານສົ່ງອິນທະສອນ ແລະຮ້ານຈຳໜ່າຍເຄື່ອງກີລາຄົບວົງຈອນສະເຕດ້ຽມສະປອດຕົວແທນຈຳໜ່າຍເຄື່ອງກີລາຍີ່ຫໍ້ເອັບບີທີພຽງຜູ້ດຽວໃນ ສປປ ລາວ ໄດ້ໃຫ້ການຊຸກຍູ້ເຄື່ອງກີລາຈຳນວນ 60 ຜືນໃຫ້ແກ່ສະຫະພັນກີລາບານສົ່ງແຫ່ງຊາດເພື່ອກຽມນຳໃຊ້ເຂົ້າໃນການຈັດກອງປະຊຸມຝຶກອົບຮົມຍົກລະດັບກຳມະການຕັດສິນກີລາບານສົ່ງຫາດຊາຍ ແລະໃນຮົ່ມຂັ້ນພື້ນຖານທີ່ແຂວງອຸດົມໄຊລະຫວ່າງວັນທີ 26-31 ກໍລະກົດນີ້.

   ພິທີມອບ-ຮັບເຄື່ອງກີລາບານສົ່ງໃນຄັ້ງນີ້ວັນທີ 21 ກໍລະກົດ ຜ່ານມາທີ່ຫ້ອງການສະຫະພັນບານສົ່ງແຫ່ງຊາດ (ຂ້າງສະໜາມກີລາເຈົ້າອານຸວົງ) ນະຄອນຫຼວງ ວຽງຈັນ, ເປັນການກ່າວມອບຂອງທ່ານ ອິນທະສອນ ລັດສະໝີ ປະທານສະໂມສອນບານສົ່ງອິນທະສອນ ແລະທ່ານນາງ ຈັນດາວອນ ແສງຈັນ ເຈົ້າຂອງຮ້ານຈຳໜ່າຍເຄື່ອງກີລາຄົບວົງຈອນສະເຕດ້ຽມສະປອດຕົວແທນຈຳໜ່າຍເຄື່ອງກີລາຍີ່ຫໍ້ເອັບບີທີພຽງຜູ້ດຽວໃນ ສປປ ລາວ ແລະ ກ່າວຮັບແມ່ນ ທ່ານ ຈັນສະໝອນ ຜ່ອງຈັນທາ ປະ ທານສະຫະພັນກີລາບານສົ່ງແຫ່ງຊາດ, ມີ ທ່ານ ພັນຕີ ທິບພົງ ພັດມະນິວົງ ຮອງເລຂາທິການສະຫະພັນບານສົ່ງແຫ່ງຊາດທັງເປັນກຳມະການຕັດສິນລະດັບສາກົນ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

    ທ່ານ ຈັນສະໝອນ ຜ່ອງຈັນທາ ກໍໄດ້ກ່າວສະແດງຄວາມຂອບໃຈ ແລະຮູ້ບຸນຄຸນເປັນຢ່າງສູງມາຍັທັງ 2 ພາກສ່ວນດັ່ງກ່າວທີ່ມີນໍ້າໃຈປະກອບສ່ວນມອບເຄື່ອງກີລາ ງາມໆ ຊຸກຍູ້ສົ່ງເສີມການພັດທະນາວົງການກີລາບານສົ່ງລາວກໍຄື ພັດນະນາບຸກຄະລາກອນດ້ານກຳມະການຕັດສີນບານສົ່ງໃນຮົ່ມ ແລະຫາດຊາຍຂອງແຂວງອຸດົມໄຊ ໃນກອງປະຊຸມຝຶກອົບຮົມກຳມະການຕັດສິນກີລາບານສົ່ງລະດັບຂັ້ນພື້ນຖານຈະຈັດຂຶ້ນລະຫວ່າງວັນທີ 26-31 ກໍລະກົດ 2020 ທີ່ແຂວງອຸດົມໄຊ,ແນວໃດກໍດີ, ເຊື່ອ ໝັ້ນວ່າການອຸປະຖຳຄັ້ງນີ້ຈະສາມາດສ້າງຜົນປະໂຫຍດສູງສຸດໃຫ້ແກ່ການສ້າງບຸກຄະລາກອນຂອງແຂວງດັ່ງກ່າວ ແລະ ກໍຍັງເປັນບາດກ້າວສຳຄັນໃນການຮ່ວມມືກັນເປັນຄັ້ງທຳອິດເພື່ອຈະສືບຕໍ່ຮັດແໜ້ນສາຍພົວພັນການຊ່ວຍເຫຼືອສົ່ງເສີມກີລາບານສົ່ງຂອງສະໂມສອນ ແລະ ສະຫະພັນບານສົ່ງແຫ່ງຊາດລາວໃຫ້ນັບມື້ເຕີບໃຫຍ່ຂະຫຍາຍຕົວຢ່າງກວ້າງຂວາງ.

  ທ່ານ ທິບພົງພັດ ມະນິວົງ ໃຫ້ສຳພາດວ່າ: ນອກຈາກການຈັດກອງປະຊຸມຝຶກອົບຮົມກຳມະການຕັດສິນກີລາບານສົ່ງໃນຮົ່ມ ແລະບານສົ່ງຫາດຊາຍທີ່ແຂວງອຸດົມໄຊ ລະຫວ່າງວັນທີ 26-31 ກໍລະກົດ 2020 ໃນເດືອນສິງຫານີ້ທາງສະຫະພັນບານສົ່ງແຫ່ງຊາດກໍຍັງມີແຜນຮ່ວມມືກັບຄະນະກຳມະການໂອແລມປີກແຫ່ງຊາດລາວ ຫຼືຄອລຈະຈັດກອງປະຊຸມຝຶກອົບຮົມຍົກລະດັບກຳມະການຕັດສິນກີລາບານສົ່ງຫາດຊາຍຂັ້ນພື້ນຖານທີ່ນະຄອນຫຼວງວຽງຈັນ,ແຂວງສະຫວັນນະເຂດ ແລະແຂວງຫຼວງພະບາງ ໂດຍໄດ້ຮັບການສະໜັບສະໜູນຈາກກອງທຶນຂອງຄະນະກຳມະການໂອແລມປີກສາກົນ.     

________

ຂຽນໂດຍ: ບຸນນິກ, ໜັງສືພິມເສດຖະກິດ-ສັງຄົມ

แชร์