ເມືອງຫົງສາ ແຂ່ງຂັນກີລາຂໍ່ານັບຮັບຕ້ອນ 4 ວັນປະຫວັດສາດ

  ເປີດການນໍາໃຊ້ເດີ່ນກີລາຮົ່ມເມືອງ ແລະສ້າງຂະບວນການແຂ່ງຂັນກີລາຂໍ່ານັບຮັບຕ້ອນ 4 ວັນປະຫວັດສາດຂອງຊາດໄດ້ຈັດຂຶ້ນເມື່ອອາທິດຜ່ານມາທີ່ເດີ່ນກີລາຮົ່ມດັ່ງກ່າວເຂົ້າຮວ່ມເປັນປະທານຂອງ ທ່ານ ຄໍາຫຼ້າ ຜິວວັນນາ ເຈົ້າເມືອງໆຫົງສາ, ມີການນໍາຂອງເມືອງ, ພະນັກງານຫຼັກແຫຼ່ງ, ນັກກີລາເພດຍິງເພດຊາຍແຕ່ລະປະເພດເຂົ້າຮ່ວມເຂົ້າຢ່າງພ້ອມພຽງ.

 ການແຂ່ງຂັນກີລາໃນຄັ້ງນີ້ມີກີລາ 2 ປະເພດຄືປະເພດຍານເຕະຍິງ-ຊາຍ, ບານສົ່ງຍິງຊາຍ, ປະກອບມີ 4 ລາຍການແຂ່ງຂັນໄດ້ແຍກອອກເປັນ 2 ລຸ້ນຄືລຸ້ນຊາວໜຸ່ມຍິງຊາຍ-ຊາຍ ແລະລຸ້ນອາວຸໂສກົມກອງ, ຫ້ອງການ, ບ້ານ, ໂຮງຮຽນ ແລະພ້ອມດ້ວຍການນໍາເຂົ້າຮວ່ມ.

 ຈຸດປະສົງເພື່ອເປັນການເປີດນໍາໃຊ້ເດີ່ນກີລາການເມືອງໃຫ້ມີສະດວກຫຼາຍຂຶ້ນເປັນຕົ້ນແມ່ນວຽກງານກີລາ-ກາຍະກໍາໃຫ້ມີການຂະຫຍາຍຕົວທາງດ້ານປະລິມານ ແລະຄຸນນະພາບ,ຊຶ່ງເດີ່ນກີລາຮົ່ມຫຼັງນີ້ໄດ້ຮັບການພັດທະນານໍາໃຊ້ຈັດການແຂ່ງຂັນເປັນປົກກະຕິຕະຫຼອດໄລຍະຜ່ານມາ,ເພື່ອເຮັດໃຫ້ໄດ້ມາດຕະຖານຕາມລະບຽບຫຼັກການ ແລະກະຕິກາຂອງສະຫະພັນບານສົ່ງແຫ່ງຊາດລາວກໍານົດໄວ້ມາຮອດປີ 2020 ທາງເມືອງຫົງສາກໍ່ໄດ້ມີການປັບປຸງຕື່ມເປັນຕົ້ນແມ່ນເທພື້ນ,ຕິດຕັ້ງໄຟຟ້າ, ທາສີພື້ນ, ໃສ່ຕາໜ່າງກັນບານ,ໂດຍໄດ້ຮັບການສະໜັບສະໜູນເງິນກອງທຶນສົ່ງເສີມກີລາ-ກາຍະກໍາຂັ້ນເມືອງ, ລັດວິສາຫະກິດໄຟຟ້າລາວ, ຫົວໜ່ວຍທຸກິດ, ນັກທຸລະກິດຕ່າງໆ ພາຍໃນເມືອງໃນມູນຄ່າທັງໝົດ 26, 32 ລ້ານກີບ, ການຈັດກິດຈະກໍາ ຄັ້ງນີ້ຍັງເປັນການສະເຫຼີມສະຫຼອງ 4 ວັນປະຫັວດສາດຂອງຊາດຄືວັນຄ້າຍວັນເກີດປະທານສຸພານຸວົງຄົບຮອບ 111 ປີ, ວັນສົນທິສັນຍາມິດຕະພາບການຮ່ວມມື ແລະວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 58 ປີ,ວັນສ້າງຕັ້ງສະຫະພັນແມ່ຍິງລາວຄົບຮອບ 65 ປີ, ວັນກໍາເນີດກີລາແຫ່ງຊາດລາວຄົບຮອບ 54 ປີ, ໃຫ້ມີບັນຍາກາດຄຶກຄື້ນມ່ວນຊື່ນພາຍໃນເມືອງຫົງສາ.

  ຜົນການແຂ່ງຂັນບານເຕະເພດຊາຍອັນທີທີ 1 ແມ່ນທີມກຸ່ມທຸລະກິດໄດ້ຮັບເງິນສົດ 7 ແສນກີບ ພ້ອມດ້ວຍຂັນໂລ 1 ໜ່ວຍ, ທີ 2 ແມ່ນກຸ່ມການເມືອງ-ວັດທະນະທໍາສັງຄົມ, ໄດ້ຮັບເງິນສົດ 5 ແສນກີບ, ບານເຕະຊາວໜຸ່ມຍິງອັນດັບທີ 1 ແມ່ນທີມບ້ານໆ FC ໄດ້ຮັບເງິນ 7 ແສນກີບ ພ້ອມຂັນໂລ 1 ໜ່ວຍ, ທີ 2 ແມ່ນທີມ ໂຮງ ຮຽນ ມສ ຫົງສາໄດ້ຮັບເງິນສົດ 5 ແສນກີບ, ຜົນການແຂ່ງຂັນກີລາປະເພດບານສົ່ ອາວຸໂສຊາຍທີ່ 1 ແມ່ນທີມ ປກສ-ປກຊ ໄດ້ຮັບເງິນສົດ 3 ແສນກີບ, ທີ 2 ແມ່ນທີມເສດຖະກິດໄດ້ຮັບເງິນສົດ 2 ແສນກີບ, ບານສົ່ງຊາວໜຸ່ມຍິງອັນດັບທີ 1 ແມ່ນທີມໂຮງຮຽນ ມສ ຫົງສາ+ມສ ບ້ານເມືອງຫານ, ໄດ້ຮັບເງິນສົດ 3 ແສນກີບ ແລະທີ 2 ແມ່ນທີມສໍານັກງານຫ້ອງການ+ ບ້ານໆ FC  ພ້ອມເງິນສົດ 2 ແສນກີບ, ໃນຕອນທ້າຍພິທີຄະນະນໍາຂອງເມືອງຫົງສາຍັງໄດ້ມອບເງິນສົດ ແລະຂັນໂລໃຫ້ນັກກີລາແຕ່ລະທີມຕື່ມອີກ.

__________

ຂຽນໂດຍ: ບຸນປອນ, >> ໜັງສືພິມເສດຖະກິດ-ສັງຄົມ

แชร์