ເຊກອງ ກວດພົບສິນຄ້າໝົດອາຍຸ 80 ກວ່າລາຍການ

 ໃນລະຫວ່າງວັນທີ 22-24 ກໍລະກົດ 2020 ນີ້ ພະແນກສາທາລະນະສຸກ ແຂວງເຊກອງ ນໍາໂດຍທ່ານ ສີກອນ ພົມມະໄລລຸນ, ທ່ານ ເພັດສະໝອນ ແພງສຸລິພັນ ຮອງຫົວໜ້າຂະແໜງອາຫານ ແລະຢາແຂວງເຊກອງ, ພ້ອມດ້ວຍຄະນະກໍາມະການຄຸ້ມຄອງອາຫານ ແລະຢາຂັ້ນແຂວງໄດ້ພ້ອມກັນລົງເຄື່ອນໄຫວກວດກາສິນຄ້າອາ ຫານສົດ ແລະອາຫານສໍາເລັດຢູ່ຕະຫຼາດເທສະບານແຂວງ ແລະຕະຫຼາດຊຸມຊົນບ້ານເຊນໍ້ານ້ອຍ.


  ທ່ານ ສີກອນ ພົມມະໄລລຸນ ຮອງຫົວໜ້າຂະແໜງອາຫານ ແລະຢາແຂວງເຊກອງ ໄດ້ລາຍງານໃຫ້ຮູ້ວ່າ: ຜ່ານການລົງກວດກາຮ້ານອາຫານສົດ ແລະຮ້ານອາຫານສໍາເລັດຮູບຂາຍຍົກ-ຍ່ອຍຢູ່ຕະຫຼາດເທສະບານແຂວງ ແລະຕະຫຼາດຊຸມຊົນບ້ານເຊນໍ້ານ້ອຍເມືອງລະມາມໃນໜຶ່ງອາທິດຜ່ານມາສາມດກວດກາໄດ້ທັງໝົດ 37 ຮ້ານ, ໃນນີ້ຮ້ານອາຫານສົດ 4 ຮ້ານ (ບໍ່ພົບສານປົນເປື້ອນ) ແລະຮ້ານອາຫານສໍາເລັດຮູບ 33 ຮ້ານ, ພົບເຫັນສິນຄ້າໝົດອາຍຸການນໍາໃຊ້ 25 ຮ້ານລວມມີ 88 ລາຍການ ຄິດເປັນມູນຄ່າ 6 ລ້ານກວ່າກີບ, ຊຶ່ງສິນຄ້າດັ່ງກ່າວແມ່ນໄດ້ຢຶດ ແລະທໍາລາຍຖິ້ມກັບທີ່.
  ທັງນີ້ແມ່ນເພື່ອແນໃສ່ເຮັດໃຫ້ວຽກງານປົກປ້ອງຜູ້ຊົມໃຊ້ເປັນໄປຕາມແຜນການທີ່ວາງໄວ້ ແລະໃຫ້ຖືກຕ້ອງສອດຄ່ອງກັບລະບຽບຫຼັກການ ແລະເພື່ອບໍ່ໃຫ້ຜູ້ຊົມໃຊ້ໄດ້ບໍ ລິໂພກສິນຄ້າໝົດອາຍຸການນໍາໃຊ້ດັ່ງກ່າວເພື່ອຫຼີກລຽງບໍ່ໃຫ້ເກີດອັນຕະລາຍຕໍ່ຊີວິດ ແລະຊັບສິນ.

____________

ຂຽນໂດຍ: ບູ້ສຸວັນ                         

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์