ຮອງນາຍົກ ລົງເຄື່ອນໄຫວຢ້ຽມຢາມເມືອງສະໜາມໄຊ

  ໃນວັນທີ 26 ກໍລະກົດ 2020 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວ ໜ້າອົງການຕ້ານການສໍ້ລາດບັງຫຼວງຂັ້ນສູນກາງພ້ອມຄະນະໄດ້ໄປຢ້ຽມຢາມ ແລະ ຕິດຕາມເບິ່ງຄວາມຄືບໜ້າໃນການຟື້ນຟູພື້ນຖານໂຄງລ່າງ, ການກໍ່ສ້າງທີ່ຢູ່ອາໄສ ແລະການຈັດສັນອາຊີບໃຫ້ພໍ່ແມ່ປະຊາຊົນເມືອງສະໜາມໄຊ ແຂວງອັດຕະປື ທີ່ໄດ້ຜົນກະທົບຈາກເຫດການຄູກັນນໍ້າ D ຂອງໂຄງການກໍ່ສ້າງເຂື່ອນໄຟຟ້າເຊປຽນ-ເຊນໍ້ານ້ອຍເມື່ອປີ 2018 ທີ່ຜ່ານມາໂດຍມີທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ພ້ອມດ້ວຍຄະນະພັກ, ພະນັກງານຫຼັກແຫຼ່ງ, ເຈົ້າເມືອງສະໜາມໄຊ, ພະ ນັກງານທີ່ກ່ຽວຂ້ອງໃຫ້ການຕ້ອນຮັບ ແລະຮ່ວມເຮັດວຽກ.
  ໂອກາດນີ້ທ່ານຮອງນາຍົກລັດຖະມົນຕີພ້ອມຄະນະໄດ້ເດີນທາງຢ້ຽມຢາມ,ຕິດຕາມເບິ່ງການຟື້ນຟູພື້ນຖານໂຄງລ່າງເປັນຕົ້ນການສ້ອມແປງທາງ, ຂົວ,ຊົນລະປະທານຢູ່ໃນເທສະບານ ແລະບ້ານທີ່ໄດ້ຮັບຜົນກະທົບ; ເບິ່ງການບຸກເບີກເນື້ອທີ່ທໍາການຜະລິດໃຫ້ປະຊາຊົນຢູ່ຈຸດບ້ານຕາມໍຢອດ ແລະການຈັດສັນ-ກໍ່ສ້າງທີ່ຢູ່ອາໄສໃໝ່ໃຫ້ພໍ່ແມ່ປະຊາຊົນຢູ່ຈຸດບ້ານທ່າແສງຈັນ ແລະຈຸດບ້ານດົງບາກ.


  ສໍາລັບການຟື້ນຟູພື້ນຖານໂຄງລ່າງຢູ່ເມືອງສະໜາມໄຊແມ່ນພວມກໍາລັງດໍາເນີນຢ່າງເຄັ່ງຮ້ອນ ແລະສໍາເລັດໂດຍພື້ນຖານແລ້ວໂດຍສະເພາະແມ່ນການສ້ອມແປງທາງ ແລະຂົວ ແມ່ນສໍາເລັດສາມາດທຽວໄປມາສະດວກ, ສ່ວນການສ້ອມແປງຄອງຊົນລະປະທານແມ່ນກໍາລັງເລັ່ງສ້ອມແປງຄືນຄາດວ່າຈະເລັດໃນໄວໆນີ້; ສ່ວນການບຸກເບີກເນື້ອທີ່ການຜະລິດໃຫ້ປະຊາຊົນມາຮອດປະຈຸບັນສາມາດບຸກເບີກເນື້ອທີ່ເພື່ອໃຫ້ປະຊາຊົນປູກມັນຕົ້ນໄດ້ທັງໝົດ 2.140 ເຮັກຕາ ໃນນີ້ໄດ້ບຸກເບີກຢູ່ 4 ຈຸດຄື: ຈຸດບ້ານຕາມໍຢອດ, ຈຸດບ້ານດົງບາກ, ຈຸດບ້ານດອນບົກ ແລະຈຸດບ້ານປິນດົງ.
 ການຈັດສັນ ແລະກໍ່ສ້າງທີ່ຢູ່ອາໄສໃຫ້ພໍ່ແມ່ນປະຊາຊົນແມ່ນກໍາລັງດໍາເນີນການກໍ່ສ້າງເຮືອນ 811 ຫຼັງໃຫ້ປະຊາຊົນ 5 ບ້ານ ແລະ 1 ຄຸ້ມ ໂດຍແບ່ງອອກເປັນ 4 ຈຸດ ຫຼື 4 ບ້ານຈັດສັນໃໝ່ຄື: ບ້ານດົງບາກໃໝ່ຫີນຄໍາ, ບ້ານດອນບົກ, ບ້ານຕາມໍຢອດ ແລະບ້ານທ່າແສງຈັນ ໂດຍທຶນທີ່ນໍາໃຊ້ເຂົ້າໃນການກໍ່ສ້າງແມ່ນໄດ້ຮັບຈາກກຸ່ມບໍລິສັດຜູ້ພັດທະນາໂຄງການໄຟຟ້າເຊປຽນ-ເຊນໍ້ານ້ອຍໃຫ້ທຶນປຸກສ້າງເຮືອນຈໍານວນ 700 ຫຼັງ, ທຶນຊ່ວຍເຫຼືອລ້າຈາກອົງການສະຫະປະຊາຊາດເພື່ອປຸກສ້າງທີ່ຢູ່ອາໄສ ແລະທຶນຊ່ວຍເຫຼືອຈາກປະຊາຊົນໄທຈໍານວນ 111 ຫຼັງ ເຫັນວ່າມາຮອດປັດຈຸບັນປະຊາຊົນເຂດດັ່ງກ່າວໄດ້ມີຊີວິດກນເປັນຢູ່ດີຂຶ້ນເທື່ອລະກ້າວ.

----------------

ຂຽນໂດຍ: ແສງເພັດ ແຊ່ຈ່າວ                     

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์