ນັກປະພັນລາວຮັບລາງວັນຊີໄຣ

  ສະມາຄົມນັກປະພັນລາວຈັດພິທີຖະແຫຼງຂ່າວຜົນການຕັດສິນລາງວັນວັນນະກໍາສ້າງສັນສຸດຍອດແຫ່ງອາຊຽນຂອງ ລາວ ຫຼືຊີໄຣ (SEA Write) ປະຈໍາປີ 2019 ຊຶ່ງໃນນັ້ນໄດ້ຮັບຮອງເອົາບົດກະວີທີ່ມີຊື່ວ່າ ຫອມແຜນດິນລາວ ຂຽນໂດຍ ພະໄພວັນ ມາລາວົງ (ນາມປະກາລູກດອນກະເດັນ) ເປັນບົດຊະນະເລີດຂອງລາວດ້ວຍຄະ ແນນລວມ 311 ຄະແນນ ເພື່ອຮ່ວມຮັບລາງວັນຊີໄຣ ປະຈໍາປີ 2019 ໃນວັນທີ 24 ກໍລະກົດ 2020 ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວນະ ຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ມີນັກຂຽນ, ນັກກະວີ,ນັກປະພັນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.


  ນັກປະພັນລາວທີ່ໄດ້ຮັບລາງວັນນະກໍາສ້າງສັນສຸດຍອດແຫ່ງອາຊຽນຂອງລາວ ຫຼືຊີໄຣ (SEA Write) ປະຈໍາປີ 2019 ທີ1 ໄດ້ແກ່: ພະໄພວັນ ມາລາວົງ ໄດ້ຮັບລາງວັນປະເພດບົດກະວີຊື່ “ຫອມແຜນດິນລາວ” ໃນຄະແນນ 311, ທີ 2 ທ່ານ ຫົງເຫີນ ຂຸນພິທັກ ໄດ້ຮັບລາງວັນປະເພດບົດກະວີຊື່ “ລ່ອງນໍ້າເຊບັ້ງຫຽງ” ໃນຄະ ແນນ 308, ທີ 3 ພະບຸນທະວີ ກົມພະພັນ ໄດ້ຮັບລາງວັນປະເພດບົດກະວີຊື່ “ແພພັນລາຍຈາກປາຍມືແມ່” ໃນຄະແນນ 302, ທີ 4 ທ່ານນາງ ຂັນຄໍາ ສຸດທະວິ ໄລ ໄດ້ຮັບລາງວັນປະເພດບົດກະວີຊື່ “ປິດສະໜາ” ໃນຄະແນນ 295, ທີ5 ທ່ານ ສຸລິ ເດດວົງພັນ ໄດ້ຮັບລາງວັນປະເພດບົດກະວີຊື່ “ລູກແຜ່ນກິນຖິ່ນຄົນຫານ” ໃນຄະ ແນນ 283, ທີ 6 ພະແກ້ວຈ່ອຍ ບົວສາມາດ ໄດ້ຮັບລາງວັນປະເພດບົດກະວີຊື່ “ຫອມແຜ່ນດິນກິ່ນບໍ່ຄາຍ” ໃນຄະແນນ 283, ທີ 7 ທ່ານ ສົມຫວັງ ລາບບັນດິດ ໄດ້ຮັບລາງວັນປະເພດບົດກະວີຊື່ “ຄູບ້ານນອກ” ໃນຄະແນນ 267, ທີ 8 ທ່ານ ສົມພອນ ສີສຸວັນນະ ໄດ້ຮັບລາງ ວັນປະເພດບົດກະວີຊື່ “ແມ່ຮັກລູກ” ໃນຄະແນນ 260, ທີ 9 ທ່ານ ແສງຈັນ ສຸຂະເສມ ໄດ້ຮັບລາງວັນປະເພດບົດກະວີຊື່ “ຄຸນຄ່າແຄນ” ໃນຄະແນນ 250.
  ທ່ານ ທອງໃບ ໂພທິສານ ກ່າວວ່າ: ຕ້ອງຂໍຊົມເຊີຍນັກປະພັນລາວທີ່ໄດ້ລາງວັນມາຄອງລາງວັນຊີໄຣ ແມ່ນເປັນລາງວັນວັນນະກໍາສ້າງສັນຍອດຢ້ຽມແຫ່ງອາຊຽນຊຶ່ງມາຮອດປະຈຸບັນນັກປະພັນລາວແມ່ນໄດ້ຮັບລາງວັນລະດັບອາຊຽນເປັນຈໍານວນຫຼາຍໂດຍໄດ້ສ້າງຊື່ສຽງ ແລະບົດບາດໃຫ້ແກ່ປະເທດຊາດດ້ານຂຸມຊັບທາງປັນຍາ, ທຸກເລື່ອງທຸກບົດທີ່ໄດ້ຮັບລາງວັນແມ່ນມີຄວາມໝາຍສໍາຄັນທີ່ສຸດ ແລະນັບມື້ເວທີນັກຂຽນຍິ່ງມີການແຂ່ງຂັນສູງທຸກຄົນກໍເຮັດໜ້າທີ່ອອກມາໄດ້ດີຈົນໄດ້ຮັບລາງວັນ.

_____________

ຂຽນໂດຍ: ວົງມະນີ             

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์