ສຳເລັດກອງປະຊຸມເປີດກວ້າງຄະນະພັກ ທຫລ

  ກອງປະຊຸມເປີດກວ້າງຄະນະບໍລິຫານງານພັກທະນາຄານແຫ່ງ ສປປ ລາວ (ທຫລ) ຄັ້ງທີ 8 ສະໄໝທີ III ໄດ້ຈັດຂຶ້ນ ແລະສຳເລັດລົງດ້ວຍໝາກຜົນອັນຈົບງາມໃນວັນທີ 24 ກໍລະກົດ 2020 ທີ່ສະຖາບັນການທະນາຄານນະຄອນຫຼວງວຽງຈັນພາຍໃຕ້ການເປັນປະທານຂອງ ສະຫາຍ ສອນໄຊ ສິດພະໄຊ ກຳມະການສຳຮອງສູນ ກາງພັກ, ເລຂາຄະນະພັກ, ຜູ້ວ່າການ ທຫລ; ພ້ອມນີ້, ກໍມີບັນດາສະຫາຍຄະນະປະຈຳພັກ, ຄະນະພັກ, ຄະນະພັກຮາກຖານ-ຄະນະໜ່ວຍພັກ, ພະນັກງານຫຼັກແຫຼ່ງ ແລະສະມາຊິກພັກທີ່ຂຶ້ນກັບອົງຄະນະພັກ ທຫລ ເຂົ້າຮ່ວມ.
  ກອງປະຊຸມໃນຄັ້ງນີ້, ສະຫາຍ ເລຂາຄະນະພັກ ທຫລ ໄດ້ເຜີຍແຜ່ມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ຊຶ່ງ ເນື້ອໃນຕົ້ນຕໍແມ່ນຕິດພັນກັບການຕີລາຄາຄວາມຄືບໜ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະແຜນເງິນຕາປະຈຳໄຕມາດ 1 ປີ 2020 ແລະທິດທາງໃນຕໍ່ໜ້າ; ການກະກຽມເນື້ອໃນກອງປະຊຸມໃຫຍ່ຄັ້ງທີ XI ຂອງພັກ ແລະທິດປັບປຸງກົງຈັກລັດຖະບານເພື່ອໃຫ້ພະນັກງານຫຼັກແຫຼ່ງ, ສະມາ ຊິກພັກ,ພະນັກງານທົ່ວຂະແໜງການທະນາຄານໄດ້ຮັບຮູ້, ກຳແໜ້ນ, ເຊື່ອມຊຶມ ແລະເປັນເອກະພາບສູງຕໍ່ບັນດາເນື້ອໃນທີ່ສຳຄັນຂອງມະຕິກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ແລະພ້ອມກັນຕັ້ງໜ້າຫັນເອົາມະຕິດັ່ງກ່າວເປັນທິດທາງ ແລະແຜນການອັນລະອຽດເຂົ້າໃນການຈັດຕັ້ງປະຕິບັດສູ່ລວງເລິກໃນຂະແໜງການຂອງຕົນຢ່າງແຂງແຮງ, ຕໍ່ເນື່ອງ ແລະໄດ້ຮັບຜົນສຳເລັດເປັນຢ່າງດີ.
   ທີ່ປະຊຸມ, ຍັງໄດ້ຮັບຟັງການສະເໜີຂອງບັນດາສະຫາຍຄະນະປະຈຳພັກ, ຄະນະພັກ ທຫລ ກ່ຽວກັບການກະກຽມກໍ່ຄືການປັບປຸງຮ່າງລາຍງານການເມືອງ; ຮ່າງແຜນພັດທະນາຂະແໜງການທະນາຄານ ແລະຮ່າງບົດສຳຫຼວດການນຳພາລວມຂອງຄະນະພັກ ທຫລ ສະໄໝທີ III ຕາມການປະກອບຄຳເຫັນໃນໄລຍະ ຜ່ານມາ; ລາຍງານໂດຍສັງເຂບຕໍ່ກັບຜົນສຳເລັດການດຳເນີນຊີວິດການເມືອງທ້າຍສະໄໝຂອງຄະນະພັກ ທຫລ ສະໄໝທີ III ແລະ ຊີ້ແຈງບາງບັນຫາຕາມຄວາມເຫັນສົ່ງຂ່າວຂອງຖັນແຖວສະມາຊິກພັກຕໍ່ການນຳພາລວມ ແລະ ອັນສະເພາະບຸກຄົນຂອງຄະນະພັກ ທຫລ ສະໄໝທີ III ແລະ ໃນໂອກາດດັ່ງກ່າວກໍໄດ້ມີການປະກອບຄຳຄິດຄຳເຫັນຂອງບັນດາສະຫາຍຄະນະໜ່ວຍພັກ-ສະມາຊິກພັກທີ່ເຂົ້າຮ່ວມຢ່າງມີປະຊາທິປະໄຕແນໃສ່ເພື່ອເຮັດໃຫ້ຮາກຖານພັກ ແລະໜ່ວຍພັກປອດໃສເຂັ້ມແຂງໜັກແໜ້ນ ຫຼາຍຂຶ້ນກ່ວາເກົ່າ.
   ພ້ອມກັນນີ້; ບັນດາສະຫາຍຜູ້ແທນສົມບູນ ແລະ ຜູ້ແທນສຳຮອງຂອງຮາກຖານພັກ ແລະ ໜ່ວຍພັກຕ່າງອ້ອມຂ້າງອົງຄະນະພັກ ທຫລ ທີ່ຈະເຂົ້າຮ່ວມກອງປະຊຸມໃຫຍ່ຜູ້ແທນຄັ້ງທີ IV ຂອງອົງຄະນະພັກ ທຫລ ໃນຕໍ່ໜ້າກໍ່ໄດ້ມີການເລືອກເຟັ້ນບຸກຄະລາກອນເພື່ອອອກສະໝັກເຂົ້າໃນຄະນະພັກ ທຫລ ສະໄໝທີ IV (ຮອບທີ III) ໂດຍການນຳສະເໜີ ຂອງສະຫາຍ ຄຳວົງ ທິບພະວົງ ຮອງເລຂາຄະນະພັກ ທຫລ ຊຶ່ງໄດ້ແນະນຳມາດຕະຖານຂອງຄະນະພັກ ທຫລ ຊຸດໃໝ່, ແນະນຳກ່ຽວກັບການມີຄຳເຫັນຕໍ່ບັດທາບທາມ ແລະ ຈາກນັ້ນບັນດາສະຫາຍຜູ້ແທນສົມບູນ ແລະ ສຳຮອງກໍໄດ້ດຳເນີນການລົງຄວາມເຫັນໃສ່ບັດທາບທາມຕົວຈິງຢ່າງມີປະຊາທິປະໄຕ ແລະ ໃນຕອນທ້າຍສະຫາຍເລຂາຄະນະພັກ ທຫລ ກໍໄດ້ສັງລວມກ່ຽວກັບການດຳເນີນກອງປະຊຸມເປີດກ້ວາງຄະນະບໍລິຫານງານພັກ ທຫລ ຄັ້ງທີ 8 ສະໄໝທີ III ແລະ ທັງຊີ້ນຳໃຫ້ບັນດາຜູ້ແທນທີ່ເຂົ້າຮ່ວມກອງປະຊຸມຈົ່ງພ້ອມກັນຈັດຕັ້ງປະຕິບັດໃຫ້ໄດ້ຮັບໝາກຜົນດີໃນຕໍ່ໜ້າ.

____________

ຂຽນໂດຍ: ຣັດສະໝີ ດວງສັດຈະ       

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์