ກາເຟຜາໂກຍຖືກຮັບຮອງເປັນສິນຄ້າໂອດັອບ

 ພິທີປະກາດຮັບຮອງເອົາກາເຟຜາໂກຍເຂົ້າເປັນສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼືສິນຄ້າໂອດັອບໄດ້ຂຶ້ນເມື່ອບໍ່ດົນຜ່ານມານີ້ທີ່ຫ້ອງປະຊຸມຂອງຫ້ອງການສາທາລະນະສຸກ ເມືອງກາສີ ແຂວງວຽງຈັນ, ໂດຍເຂົ້າຮ່ວມມີທ່ານ ສີທົນ ແສງພະຈັນ ເຈົ້າເມືອງໆກາສີ, ມີທ່ານ ໄພວັນ ປະທໍາມະວົງ ຫົວໜ້າພະແນກອຸດສາຫະກໍາ ແລະການຄ້າແຂວງພ້ອມດ້ວຍບັນດາຫົວໜ້າ-ຮອງຫົວໜ້າຫ້ອງການ, ແຂກຖືກເຊີນພ້ອມດ້ວຍຜູ້ປະກອບການກຸ່ມຜູ້ຜະລິດກາເຟຜາໂກຍເຂົ້າຮ່ວມຢ່າງພ້ອມພຽງ.

  ທ່ານ ແຫຼວທອງ ແສງສຸລິຍາ ຫົວໜ້າຫ້ອງການອຸດສາຫະກໍາ ແລະການຄ້າເມືອງໄດ້ຂຶ້ນຜ່ານບົດລາຍງານຫຍໍ້ກ່ຽວກັບການເຄື່ອນໄຫວຊຸກຍູ້ສົ່ງເສີມສິນຄ້າໂອດັອບຢູ່ເມືອງກາສີຮູ້ວ່າ: ການຄັດເລືອກສິນຄ້າໂອດັອບແມ່ນປະຕິບັດຕາມບົດແນະນໍາເລກທີ 3558/ສພຄ, ລົງວັນທີ 26 ພະຈິກ 2012 ກ່ຽວກັບເງື່ອນໄຂ ແລະຂັ້ນຕອນໃນການຄັດເລືອກສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ.

  ຜ່ານການລົງເຄື່ອນໄຫວຕົວຈິງຢູ່ເມືອງກາສີເຫັນວ່າຜະລິດຕະພັນສິນຄ້າທີ່ພົ້ນເດັ່ນ ແລະມີເງື່ອນໄຂທີ່ຈະກາຍເປັນສິນຄ້າໂອດັອບໄດ້ນັ້ນມີໜຶ່ງຜະລິດຕະພັນຄື: ຜະ ລິດຕະພັນກາເຟຜາໂກຍຂອງກຸ່ມຜະລິດກາເຟຜາໂກຍຂອງທ່ານ ບຸນມີ ສຸມຸນທອງ ຢູ່ບ້ານພູຄຳ ຫຼັງຈາກນັ້ນທາງຫ້ອງການອຸດສາຫະກໍາ ແລະການຄ້າເມືອງໄດ້ສົມທົບກັບຄະນະກໍາມະການຄັດເລືອກສິນຄ້າໜຶ່ງເມືອງໜຶ່ງຜະລິດຕະພັນເພື່ອປະກອບເອກະສານໃຫ້ກຸ່ມຜະລິດກາເຟຜາໂກຍແລະນໍາສະເໜີຕໍ່ຂັ້ນເທີງຕາມຂັ້ນຕອນເພື່ອຢັ້ງ ຢືນກາໝາຍສິນຄ້າໂອດັອບ.

  ມາຮອດປະຈຸບັນຢູ່ເມືອງກາສີໄດ້ຮັບຢັ້ງຢືນກາໝາຍສິນຄ້າໂອດັອບແຫ່ງຊາດແລ້ວ 2 ຫົວໜ່ວຍຄື: ຜະລິດຕະພັນນໍ້າປູກາສີຄໍາຂອງກຸ່ມປຸງແຕ່ງນໍ້າປູບ້ານນາມົນ ແລະຜະລິດກາເຟຜາໂກຍຂອງກຸ່ມຜະລິດກາເຟຜາໂກຍຂອງທ່ານ ບຸນມີ ສຸມຸນທອງ ບ້ານພູຄໍາ.

_____________

ຂຽນໂດຍ: ອໍາພອນ ນ້ອຍສິນນະລັກ  

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์