ສຳເລັດ 60% ໂຄງການກໍ່ສ້າງຫໍສະພາແຫ່ງຊາດ

  ໃນຕອນແລງຂອງວັນທີ 23 ກໍລະກົດ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີພ້ອມດ້ວຍຄະນະໄດ້ໄປຢ້ຽມຢາມໂຄງການກໍ່ສ້າງຫໍສະພາແຫ່ງຊາດຫຼັງໃໝ່, ໂດຍມີທ່ານ ນາງ ປານີ ຢາທໍ່ຕູ້, ປະທານສະພາແຫ່ງຊາດພ້ອມດ້ວຍທ່ານ ພົນຕີ ຫງວຽນ ກ໋ວກຢຸງ, ຜູ້ບັນຊາການແມ່ທັບນ້ອຍ 11 ກະຊວງປ້ອງກັນປະເທດແຫ່ງ ສສ ຫວຽດນາມ ໃນນາມບໍລິສັດຮັບເໝົາກໍ່ສ້າງໂຄງການດັ່ງກ່າວ ແລະຄະນະໃຫ້ການຕ້ອນຮັບ.

  ໃນໂອກາດນີ້, ທ່ານ ພົນຕີ ຫງວຽນ ກ໋ວກຢຸງ ໄດ້ລາຍງານສະພາບລວມກໍຄືສະພາບການກໍ່ສ້າງໂຄງການໃຫ້ທ່ານນາຍົກລັດຖະມົນຕີ ແລະຄະນະໄດ້ຮັບຊາບ,ຊຶ່ງເຫັນວ່າ: ໂຄງການຫໍປະຊຸມສະພາແຫ່ງຊາດລາວຫຼັງໃໝ່ເປັນອາຄານ 5 ຊັ້ນ, ສູງ34,6 ແມັດ, ມີເນື້ອທີ່ອາຄານປຸກສ້າງທີ່ຕິດກັບໜ້າດິນ 7.171 ຕາແມັດ; ເປັນອາ ຄານທີ່ມີຄວາມສວຍງາມ, ແຂງແຮງ, ໂອໂຖງ,ເຄັ່ງຂຶມ, ສະຫງ່າ ແລະນຳໃຊ້ໄດ້ຍາວນານ; ມີລວດລາຍ-ດວງດອກທີ່ເປັນເອກະລັກທາງດ້ານສິລະປະວັດທະນະທຳຂອງລາວປະສົມປະສານກັບຄວາມທັນສະໄໝຂອງຍຸກສະໄໝ; ເປັນເອກະລັກສະເພາະຂອງສະພາແຫ່ງຊາດ, ມີຄວາມແຕກຕ່າງກັບຕຶກອາຄານ, ເຮືອນຊານທີ່ພັກພາອາໄສ, ສຳນັກງານ-ອົງການ, ຫໍວັດທະນະທຳ, ວັດວາອາຣາມ, ໂບດສິມ ແລະສິ່ງປຸກສ້າງອື່ນໆ; ມີຄວາມກົມກືນກັບສິ່ງປຸກສ້າງອື່ນຢູ່ບໍລິເວນອ້ອມຂ້າງເດີ່ນພະທາດຫຼວງ, ມີຫ້ອງປະຊຸມ, ຫ້ອງເຮັດວຽກ, ຫ້ອງບໍລິຫານ, ບໍລິການຮັບໃຊ້ ແລະລະບົບຄວາມປອດໄພທີ່ໄດ້ມາດຕະຖານ, ໃນນັ້ນທັງໝົດອາຄານສາມາດບັນຈຸໄດ້ 800-1.000 ຄົນ, ຫ້ອງປະຊຸມສະພາແຫ່ງຊາດສາມາດບັນຈຸໄດ້ 433 ຄົນ, ໂດຍແມ່ນແມ່ທັບນ້ອຍ 11 ກະຊວງປ້ອງກັນປະເທດຫວຽດນາມເປັນບໍລິສັດຮັບເໝົາກໍ່ສ້າງຫຼັກ, ສ່ວນທຶນໃນການກໍ່ສ້າງແມ່ນໄດ້ຮັບການຊ່ວຍເຫຼືອຈາກ ສສ ຫວຽດນາມມູນຄ່າ 100 ລ້ານໂດລາບົນຈິດໃຈແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງພັກ,ສອງລັດ ແລະປະຊາຊົນສອງຊາດລາວ-ຫວຽດນາມ ເພື່ອມອບເປັນຂອງຂວັນໃຫ້ແກ່ພັກ-ລັດ ແລະປະຊາຊົນລາວ, ຊຶ່ງຫໍປະຊຸມສະພາແຫ່ງຊາດຫຼັງນີ້ຈະກາຍເປັນໜຶ່ງໃນສັນຍາລັກແຫ່ງຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ, ທັງຈະເປັນມູນມໍລະ ດົກອັນລໍ້າຄ່າໃຫ້ແກ່ລູກຫຼານຂອງພວກເຮົາໄດ້ປົກປັກຮັກສາ ແລະ ສືບຕໍ່ນຳໃຊ້ໃນອະນາຄົດ. ປະຈຸບັນການກໍ່ສ້າງແມ່ນສຳເລັດປະມານ 60% ແລະ ຄາດວ່າຈະສຳເລັດ ສົມບູນໃນກາງປີ 2021.

  ໃນໂອກາດດຽວກັນ, ທ່ານນາຍົກລັດຖະມົນຕີໄດ້ມີຄຳເຫັນໂອ້ລົມຕໍ່ບໍລິສັດທີ່ຮັບເໝົາກໍ່ສ້າງ, ໂດຍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການກໍ່ສ້າງກໍຄືຄວາມຮັບຜິດຊອບ, ຄວາມເປັນມືອາຊີບ ແລະຄວາມເປັນເຈົ້າການສູງຂອງພະນັກງານ-ກຳມະກອນ ແລະພາກສ່ວນທີ່ກ່ຽວຂ້ອງທີ່ເຮັດໃຫ້ການກໍ່ສ້າງມີຄວາມຄືບໜ້າເປັນກ້າວໆ, ໄດ້ຄຸນນະພາບຕາມມາດຖານເຕັກນິກການອອກແບບ ແລະສົມກັບຄວາມໄວ້ເນື້ອເຊື່ອໃຈຂອງພັກ-ລັດຖະບານລາວ ແລະຫວຽດນາມຢ່າງແທ້ຈິງ, ພ້ອມກັນ ນັ້ນ ທ່ານນາຍົກລັດຖະມົນຕີຍັງໄດ້ກ່າວຢໍ້າວ່າໂຄງການກໍ່ສ້າງຫໍສະພາແຫ່ງຊາດເປັນໂຄງການທີ່ມີຄວາມໝາຍຄວາມສຳຄັນຢ່າງຍິ່ງຂອງພັກ, ລັດ ແລະປະຊາຊົນສອງຊາດລາວ-ຫວດນາມ, ອາຄານຫໍສະພານີ້ຈະກາຍເປັນມູນມໍລະດົກ ແລະກາຍເປັນສັນຍາລັກແຫ່ງການພົວພັນ ແລະ ຮ່ວມມືຂອງລາວ ແລະ ຫວຽດນາມຈົນຊົ່ວກາລະ ນານ, ຊຶ່ງເຊື່ອໝັ້ນວ່າຄົນລາວ, ປະຊາຊົນລາວຈະຮັບຮູ້ ແລະຈົດຈໍາບຸນຄຸນຈາກການຊ່ວຍເຫຼືອຂອງພັກ, ລັດ ແລະປະຊາຊົນຫວຽດນາມຕະຫຼອດໄປ.

แชร์