ອາກອນຫຼວງພະບາງສະຫຼຸບວຽກກາງປີ

  ສ່ວຍສາອາກອນແຂວງຫຼວງພະບາງໄດ້ຈັດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະທິດທາງແຜນການ 6 ທ້າຍປິ 2020 ຊຶ່ງໄດ້ຈັດຂຶ້ນໃນວັນທີ 24 ກໍລະ ກົດ 2020 ນີ້ຢູ່ຫ້ອງປະຊຸມສjວຍສາອາກອນແຂວງໂດຍການເປັນປະທານຮ່ວມຂອງທ່ານ ຄິນຄຳ ເລັ່ງສະຫວັດ ຫົວໜ້າພະແນກການເງິນແຂວງ,ທ່ານ ຄຳມົນ ຈັນມະວົງຫົວໜ້າສ່ວຍສາອາກອນແຂວງມີຫົວໜ້າຂະແໜງ-ຮອງຫົວໜ້າສ່ວຍອາກອນເມືອງ 11 ເມືອງ ແລະ 1 ນະຄອນພ້ອມດ້ວຍພະນັກງານວິຊາການພາຍໃນຂະແໜງສ່ວຍສາອາກອນແຂວງເຂົ້າຮ່ວມ.

  ທ່ານ ຄຳມົນ ຈັນມະວົງ ໃນນາມປະທານກ່າວເປີດກອງປະຊຸມໄດ້ກ່າວວ່າ: ກອງປະຊຸມຄັ້ງນີ້ສຸດທີ່ມີຄວາມໝາຍຄວາມສໍາຄັນຊຶ່ງບັນດາຫົວໜ້າໜ່ວຍງານອາກອນທີ່ມາຈາກ 11 ເມືອງ 1 ນະຄອນຄື: ນະຄອນຫຼວງພະບາງ, ເມືອງຊຽງເງິນ, ນານ, ພູຄູນ, ປາກອູ, ຈອມເພັດ, ປາກແຊງ, ໂພນໄຊ, ນໍ້າບາກ, ງອຍ, ວຽງຄໍາ ແລະເມືອງໂພນທອງຈະໄດ້ພ້ອມກັນປຶກສາຫາລືຮ່ວມກັນໃນການແກ້ໄຂບັນຫາວຽກງານອາກອນທີ່ຍັງຄົງຄ້າງແນໃສ່ເຮັດໃຫ້ການເກັບລາຍຮັບ, ຄຸ້ມຄອງລາຍຈ່າຍໄດ້ໄປຕາມເປົ້າໝາຍທີ່ວາງໄວ້ຈາກນັ້ນ, ທ່ານ ຄຳເພັດ ສີລາທອງນິດ ຮອງຫົວໜ້າສ່ວຍສາອາກອນແຂວງໄດ້ຂຶ້ນຜ່ານລາຍງານການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍ ປີ 2020 ໂດຍຈະຕ້ອງໄດ້ວາງແຜນຈຸດສຸມ6 ເດືອນທ້າຍປີ 2020 ຕິດພັນກັບການປະຕິບັດ 8 ວຽກຈຸດສຸມ 9 ຕົວ ຊີ້ວັດຢ່າງຕັ້ງໜ້າໂດຍຍົກໃຫ້ເຫັນຜົນງານດ້ານດີ, ດ້ານອ່ອນ, ບົດຮຽນທີ່ຖອດຖອນໄດ້ ແລະຂໍ້ຄົງຄ້າງທີ່ຈະພ້ອມກັນແກ້ໄຂໃນຕໍ່ໜ້າ, ໃນໄລຍະ 6 ເດືອນຕົ້ນປີຂະແໜງສ່ວຍສາອາກອນແຂວງໄດ້ມີການປະສານງານກັບບັນດາຫ້ອງການແຕ່ລະເມືອງເພື່ອເຮັດໜ້າທີ່ຂອງຕົນດ້ວຍຄວາມຮັບຜິດຊອບສູງເປັນຕົ້ນແມ່ນໄດ້ສຸມໃສ່ສຶກສາອົບຮົມວຽກງານ ການເມືອງແນວຄິດໃຫ້ແກ່ສະມາຊິກ, ພະນັກງານໄດ້ມີແນວຄິດອຸ່ນອຽງ, ທຸ່ນທ່ຽງ ແລະມີຄວາມຫ້າວຫັນໃນການເຮັດໜ້າທີ່ວິຊາສະເພາະຂອງຕົນໃນ 6 ເດືອນຕົ້ນປີ ສາມາດເກັບລາຍຮັບເຂົ້າງົບປະມານໄດ້ 37,58% ຂອງແຜນການປີ.  

  ພ້ອມດຽວກັນນີ້ ທ່ານ ຄິນຄຳ ເລັ່ງສະຫວັດ ໄດ້ເນັ້ນຄຳເຫັນເນັ້ນໃຫ້ຂະແໜງສ່ວຍສາອາກອນໃນທົ່ວແຂວງເປັນເຈົ້າການເຮັດໜ້າທີ່ວຽກງານວິຊາສະເພາະຂອງຢ່າງຕັ້ງໜ້າໂດຍສຸມໃສ່ແກ້ໄຂຂອດທີ່ຍັງອ່ອນ ແລະຄົງຄ້າງເປັນຕົ້ນແມ່ນຕ້ອງໄດ້ສືບຕໍ່ໂຄສະນາເຜີຍແຜ່ລະບຽບກົດໝາຍ ແລະ ນິຕິກຳຕ່າງໆໃຫ້ຫົວໜ້າທຸລະກິດ ແລະ ສັງ ຄົມໄດ້ຮັບຮູ້ເຂົ້າໃຈ, ປະສານສົມທົບກັບພາກສ່ວນທີ່ກ່ຽວຂ້ອງລົງເກັບກຳຂໍ້ມູນຄືນໃໝ່ໃຫ້ຈະແຈ້ງຊັດເຈນ, ເອົາໃຈໃສ່ແກ້ໄຂຫາງສຽງຈົ່ມວ່າຂອງສັງຄົມຕິດພັນກັບການ ແກ້ໄຂປາກົດການຫຍໍ້ທໍ້ຢູ່ພາຍໃນເພື່ອສ້າງທຸກເງື່ອນໄຂເຮັດໃຫ້ການເກັບລາຍຮັບເຂົ້າງົບປະມານໄດ້ຕາມແຜນການທີ່ວາງໄວ້.

_____________

ຂຽນໂດຍ: ສີສຸວັນ

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์